ශ්‍රී ලංකාව තුළ ෆෙඩරල් ආණ්ඩුක්‍රමයක් ස්ථාපිත කිරිම තුළින් රට බෙදෙන බවට සිංහල ජනතාව අතර පතුරවා ඇති භිතිය පදනම් විරහිත බව පෙන්වා දෙන තීරණාත්මක නඩු තීන්දුවක් ශ්‍රේෂ්ඨාධිකරණය විසින් ලබා දී තිබේ.
දෙමළ ජාතික සන්ධානයේ ප්‍රධානත්වය උසුලන ඉලංගෙයි තමිල් අරසු පක්ෂය බෙදුම්වාදය වෙනුවෙන් පෙනී සිටින පක්ෂයක් ලෙස ප්‍රකාශයට පත් කරන මෙන් ඉල්ලා හික්කඩු කෝරාලලාගේ දොන් චන්ද්‍රසේන ගොනු කර තිබූ පෙත්සමට තීන්දුව ලබා දෙමින් ශ්‍රේෂ්ඨාධිකරණය මේ බව ප්‍රකාශ කර ඇත.
අග්‍ර විනිශ්චයකාරවරයා ප්‍රමුඛ ත්‍රිපුද්ගල විනිසුුරු මණ්ඩලය විසින් දෙන ලද ඒකමතික නඩු තීන්දුව මගින් ප්‍රකාශයට පත් කර ඇති පරිදි පවතින රාජ්‍යය තුල පෙඩරල් පන්නයේ ආණ්ඩුවක් පිහිටුවීම වෙනුවෙන් ශ්‍රී ලංකාවේ ප්‍රධාන දෙමළ දේශපාලන පක්ෂය පෙනී සිටීම බෙදුම්වාදයක් නොවේ.
ඒකීය සහ පෙඩරල්
ඒකීය රාජ්‍යයක් තුල ෆෙඩරල් අංග මෙන්ම ෆෙඩරල් රාජ්‍යයක ඒකීය ගුණාංග ද තිබිය හැකි බව ප්‍රකාශ කරන එම නඩු තීන්දුව, රාජ්‍යය ඒකීය සහ පෙඩරල් යනුවෙන් නාමකරණය ඇතැම් විට නොමග යවන සුළු විය හැකි බව පෙන්වා දෙයි.
“එමනිසා, හවුල් ස්වාධිපත්‍යය, බලය බෙදා හැරීම සහ විමධ්‍යගත කිරීම ඒකීය රාජ්‍යය ඇතුලත පවත්නා ෆෙඩරල් ආණ්ඩුවකට මගපාදයි,” යනුවෙන් එම නඩු තීන්දුවේ සඳහන් වෙයි.
අලුත් ආණ්ඩු ක්‍රම ව්‍යවස්ථාවක් සඳහා කිසිදු දෙමළ පක්ෂයක් වෙනම රාජ්‍යයක් වෙනුවෙන් යෝජනා ඉදිරිපත් කොට නැති බව ඒ සඳහා මහජන මත විමසූ කමිටුවේ ප්‍රධානී අධිනීතිඥ ලාල් විජේනායක මල්වතු මහ නාහිමියන් හමුවේ කියා තිබුනි.
පෙත්සමේ වග උත්තරකරුවන් ලෙස ITAK පක්ෂයේ ලේකම්වරුන් වන මාවයි සේනාධිරාජා හා කේ තුරෙයිරාසසිංහම්, මැතිවරණ කොමසාරිස් මහින්ද දේශප්‍රිය සහ නීතිපතිවරයා නම් කර තිබු අතර අගවිනිසුරු ප්‍රියසාද් ඩෙප් සමග නඩු තීන්දුව ලබා දී ඇත්තේ උපාලි අබේරත්න සහ අනිල් ගුණරත්න ශ්‍රේෂ්ඨාධිකරණ විනිශ්චයකාරවරුන්ය.
Facebook Comments
