මුලතිව්හි මතභේදයට තුඩුදී ඇති පුරාවිද්‍යා බිමක රාජ්‍ය අනුග්‍රහයෙන් බෞද්ධ විහාරයක් ඉදිකිරීමට එරෙහිව පැවති අරගලයක මුල්පෙළේ දෙමළ ක්‍රියාධරයන් දෙදෙනකු පොලිසිය විසින් ‘සාපරාධී බලහත්කාරය’ පෑමේ චෝදනා මත අත්අඩංගුවට ගත් පසු ඔවුන් නිදහස් කරන ලෙස බලකරමින් දියත් කරන ලද මහජන විරෝධයකින් අනතුරුව අධිකරණය විසින් ඇප පිට නිදහස් කර යවා තිබේ.
ප්‍රදේශවාසීන් සහ සිවිල් ක්‍රියාකාරීන් එක්ව සැප්තැම්බර් 22 බ්‍රහස්පතින්දා මුලතිව් සමුපකාරය ඉදිරිපිටින් ආරම්භ කළ විරෝධතා පා ගමනින් මුලතිව් පොලිස්ථානය දක්වා පැමිණ බල කර සිටියේ පෙර දිනයේ රාත්‍රියේ අත්අඩංගුවට ගත් හිටපු පළාත් සභා මන්ත්‍රී තුරෛරාජා රවිහරන් සහ සිවිල් සමාජ ක්‍රියාධර රත්නරාජා මයුරන් වහාම නිදහස් කරන ලෙසයි.
දෙමළ ජනයා වන්දනාමාන කරන ආදි සිවන් අයියනාර් හින්දු කෝවිල් භූමියේ, රාජ්‍ය අනුග්‍රහ ලත් බෞද්ධ භික්ෂූන් විසින් විහාරයක් ඉදිකිරීම තහනම් කරමින් මුලතිව් අධිකරණය ජුනි 12දා නියෝගයක් නිකුත් කර තිබියදීත්, හමුදා ආරක්ෂාව යටතේ පුරා විද්‍යා දෙපාර්තමේන්තුව විසින් කිසිදු බාධාවකින් තොරව සිදුකරන ඉදිකිරීම් වලට එරෙහිව දිගින් දිගට නැගුනු විරෝධතාවලට ඒ දෙදෙනා නායකත්වය දී තිබුණි.
“දෙමළ අපට ඒක නීතියක්-සිංහලයන්ට තව නීතියක්” යනුවෙන් සටන් පාඨ හඬ නැගු අරගලකරුවන් පෙන්වා දුන්නේ අධිකරණ නියෝග නොතකා ඉදිකිරීම් කරන සිංහල බෞද්ධයන්ට නැති අවහිර පොලිසිය තමන්ට එරෙහිව කරන බවයි.
මුලතිව් කුරුන්තුර්මලේ තන්නිමුරිප්පු වැව් දියෙන් ගොවිතැන් කරන ගොවීන්ගේ වගා බිම් අක්කර 632 ක් පුරාවිද්‍යා දෙපාර්තමේන්තුව මගින් සැප්තැම්බර් 11 වැනිදා මායිම් සලකුණු කොට මැනුම් කටයුතු සදහා ද සැප්තැම්බර් 21 වැනිදාට දින නියම කර තිබුනි.
එදින කුරුන්තුර්මලේ පිහිටි කුමුලමුනේ ගම්මානයට රැස්වූ ප්‍රදේශයේ දෙමළ ජනයාගේ විරෝධය හමුවේ මැනුම් කටයුතු අත්හැර දමා යළිත් වතාවක් පසු බැසීමට නිලධාරීන්ට සිදුවු නමුත් විහාරස්ථානය ඉදි කරන ස්ථානයේ උද්ඝෝෂණයට සහභාගිවී විරෝධතා දැක්වීම නිසා තුරෙයිරාසා රවිහරන් හා රත්නරාසා මයුරන් මුලතිව් ඊයේ රාත්‍රියේ පොලිස් අත්අඩංගුවට ගෙන තිබුනි.
” අපේ ඉඩම් අපිට ඔන, මයුරන් සහ රවිහරන් නිදහස් කරනු, අධිකරණ නියෝගය ක්‍රියාත්මක කරන ලෙස පොලීසියට බල කරනු, උතුරු හා නැගෙනහිර දෙමළ නිජ භුමියයි ” ආදී සටන් පාඨ කියමින් විරෝධතා කරුවන් අද උද්ඝෝෂණය දියත් කර තිබුනි.
උද්ඝෝෂණය අවසන් වීමෙන් පසු මුලතිව් පොලිස්ථානය වෙත පැමිණි පුරා විද්‍යා දෙපාර්තමේන්තුවේ නිලධාරීන් විසින් පෙර දිනයේ තමන්ගේ රාජකාරියට බාධා කළ පුද්ගලයන් හය දෙනකු පිළිබදව විස්තර පොලීසියට ලබා දී ඇති බව පළාත් බද වාර්තාකරුවෝ පවසති.
එම නම් අතර තුරෙයිරාසා රවිහරන් හා රත්නරාසා මයුරන් ද වේ.
තවත් දෙදෙනකුගේ නම්ද අනෙක් දෙදෙනාගේ හැඩ හුරු කම්ද පුරා විද්‍යා නිලධාරීන් විසින් පොලීසියට ලබා දී ඇති බවයි වාර්තාකරුවන් වැඩි දුරටත් පවසන්නේ.
Facebook Comments
