‘කළු දින’ විරෝධතාවට කළ පොලිස් හිරිහැර ජාත්‍යන්තර හෙලා දැකීමට ලක්වේ

ශ්‍රී ලංකාවේ නිදහස් දිනය කළු දිනයක් ලෙස සලකා උතුරු නැගෙනහිර සාමකාමී විරෝධතා පැවැත්වූ යුද පීඩිත දෙමළ ජනතාවට පොලිස් අඩන්තේට්ටමට මුහුණ දීමට සිදුවී තිබේ.

76 වැනි ජාතික නිදහස් දිනය කොළඹ යුද සරඹ පවත්වා සැමරූ සේනාධිනායක රනිල් වික්‍රමසිංහ ජනාධිපතිවරයා විසින් යුද්ධ හමුදා නිත්‍ය හා ස්වෙච්ඡා බලසේනාවල නිලධාරින් 211 දෙනකුට සහ සෙසුනිලයන් 1239 දෙනකුට ඊළඟ නිලයට උසස්වීම් ලබා දුන් බව යුද හමුදාව නිවේදනය කරයි.

යාපනය විශ්ව විද්‍යාලයේ ශිෂ්‍ය සංගමය විසින් කිලිනොච්චියේ සංවිධානය කර තිබු ‘කළු දින’ පෙළපාලියක් විසුරුවා හැරීමට පොලිසිය ජල කාලතුවක්කු සහ කඳුළු ගෑස් යොදාගෙන තිබේ.

ඉරණමඩු හන්දියේ සිට ඒ 9 මාර්ගය ඔස්සේ පෙරට ඇදුනු පෙළපාලියට බාධා කිරීමට යොදා තිබු යකඩ වැටවල් ඉවත් කර යාමට උත්සාහ කළ අරගලකරුවන්ට පොලිස් ප්‍රහාරය මුදා හරිනු ලැබීම ජාත්‍යන්තර හෙලා දැකීමට ලක්වී තිබේ.

උපාධි අපේක්ෂකයන් හත් දෙනකු අත් අඩංගුවට ගන්නා ලදී.

සිසුවකු අත් අඩංගුවට ගැනීමෙන් වළකාලීමට ඔහු බදාගත් ඉලංගෙයි තමිල් අරසු කච්චි (ITAK) නව නායක සිවඥානම් ශ්‍රීධරන් මන්ත්‍රීවරයා පොලිසිය විසින් තල්ලු කර දමන වීඩියෝවක් දෙමළ මාධ්‍ය ඇතුළු සමාජ මාධ්‍ය ඔස්සේ මහත් ප්‍රචාරයක් ලද්දේය.

තාර පාර දිගේ පොලිසිය විසින් සිසුවකු ඇදගෙන යන ආකාරයද එම වීඩියෝවේම දැකගන්නට පුළුවන.

පොලිසිය යකඩ වැටවල් තල්ලු කිරීම නිසා අරගලකරුවන් කිහිප දෙනකුට තුවාල සිදුවූ බව පළාත්බද මාධ්‍යවේදීහු පවසති.

කිලිනොච්චියේ සාමකාමී විරෝධතා කරුවන්ට පොලිසිය එල්ල කළ ප්‍රහාරය ‘අනීතික බලය යෙදීමක්’ ලෙස ඇම්නස්ටි ජාත්‍යන්තරයේ හෙලා දැකීමට ලක් වී තිබේ.

සාමකාමී දෙමළ විරෝධතාවකට එරෙහිව පොලිස් ප්‍රචණ්ඩතාව යෙදවීමෙන් ශ්‍රී ලංකා ආණ්ඩුව තම භීෂණකාරී මුහුණ ලෝකය හමුවේ නිරාවරණය කොට ඇති බව ITAK නායකයා පවසයි.

“දෙමළ ජනතාවගේ ස්වෛරීභාවය පැහැරගත් යටත් විජිත පාලකයන් එය සිංහල පාලකයන්ට පැවරූ දිනය ශ්‍රී ලංකාව නිදහස් දිනය ලෙස සැමරුවාට අපිට ඒක කළු දිනයක්,” යයි ශ්‍රීධරන් මන්ත්‍රීවරයා කියා සිටියේය.

පොලිස් ප්‍රචණ්ඩතාවට විරෝධය පාමින් ITAK නායකයා සහ චාර්ල්ස් නිර්මලනාදන් මන්ත්‍රීවරයා ඇතුළු අරගලකරුවන් පැය තුනකට වැඩි කාලයක් ඒ 9 මාර්ගයේ වාඩිලාගෙන සිටීමෙන් අනතුරුව පොලිසිය අත් අඩංගුවට ගත් උපාධි අපේක්ෂකයන් පිරිස චෝදනා නැතිව නිදහස් කර යවා තිබේ.

මුලතිව් නගර මධ්‍යයේ දෙමළ ජාතික ජනතා පෙරමුණේද සහභාගිත්වයෙන් පැවති කළු දින විරෝධතාවට එක්වූ දෙමළ ජනතාව යුද අපරාධ සහ අතුරුදහන් කිරීම් වෙනුවෙන් යුක්තිය ඉල්ලා සිටියහ.

මඩකලපුවේ සංවිධානය කර තිබු විරෝධතාවට එරෙහිව පොලිසිය අධිකරණ වාරණ නියෝගයක් ලබාගෙන තිබුණි.