ජනතා විමුක්ති පෙරමුණේ ඉහල පෙලේ දූත මණ්ඩලයක් දකුණු ආසියානු බලවතාගේ නිල ආරාධනයෙන් එරට කරන සංචාරයක් ආරම්භයේ පැවති සාකච්ඡා ‘යහපත්’ බව ඉන්දීය විදේශ අමාත්‍යවරයා පවසයි.
ආරම්භයේ පටන්ම ඉන්දීය විරෝධී ස්ථාවරයක් දැරූ ජවිපෙ සමග මුල්ම වතාවට රාජ්‍ය මට්ටමින් සාකච්ඡා කිරීම ඉන්දීය විදේශ ප්‍රතිපත්තියේ මෙන්ම ජවිපෙ දේශපාලන ස්ථාවරයේ ද වෙනසක් සනිටුහන් කරන බවට විශ්වාස කෙරේ.
දිල්ලි ගිය ජවිපෙ නායකයා මෙන්ම ජාතික ජන බලවේගයේ ජනාධිපති අපේක්ෂක අනුර කුමාර දිසානායක ප්‍රමුඛ නියෝජිත පිරිස අනතුරුව විදේශ අමාත්‍ය සුබ්‍රමනියම් ජයශංකර් සමාජ මාධ්‍යයේ පවසා තිබුනේ “අපේ ද්විපාර්ශවික සබඳතා සහ එය තවත් ගැඹුරට යාමෙන් ඇතිවන අන්‍යොන්‍ය වාසි සම්බන්ධ යහපත් සාකච්ඡාවකි. ශ්‍රී ලංකාවේ ආර්ථික අභියෝග සහ ඉදිරි ගමන් මග ගැනත් කතා කළෙමු,” යනුවෙනි.
ඉන්දීය සංචාරය ‘ගෝලීය වේදිකාවේ NPP සහ ශ්‍රී ලංකාව සඳහා දැවැන්ත ඉදිරි ගමනක්’ ලෙසින් මහත් උත්කර්ෂයට නංවමින් ජාතික ජන බලවේගය දිල්ලි ගමන දැක තිබුනේ අනුර කුමාර දිසානායකගේ නායකත්වයෙන් යුත් එම පක්ෂය ඉදිරි මැතිවරණයකදී ශ්‍රී ලංකාවේ බලය ගන්නා බවට ඉන්දියාවෙන් ලද පිළිගැනීමක් ලෙසය.
“මෙම සංචාරයේදී ප්‍රදර්ශනය කරන ලද උපායමාර්ගික නියැලීම් සහ රාජ්‍ය තාන්ත්‍රික සියුම් බව ද්විපාර්ශ්වික සබඳතා ශක්තිමත් කරනවා පමණක් නොව ජාතියේ ඉරණම හැඩගැස්වීමේ ප්‍රධාන වගකිව යුත්තා ලෙස NPP ස්ථානගත කරයි,” යනුවෙන් ජාජබ ප්‍රතිපත්ති කමිටු සාමාජික ශාන්ත ජයරත්න ප්‍රකාශයක් නිකුත් කර තිබුණි.
කෙසේවෙතත්, ඉන්දීය මැදිහත්වීමෙන් නීතිගත කරන ලදුව ‘ඉන්දියානු ව්‍යාප්තවාදයේ’ අංගයක් ලෙසින් ජනතා විමුක්ති පෙරමුණේ නිරන්තර ගර්හාවට ලක්වුණු 13 වැනි ව්‍යවස්ථා සංශෝධනය ප්‍රකාර බලය විමධ්‍යගත කිරීම සම්බන්ධයෙන් ජෙයෂන්කර් – අනුර කුමාර හමුවේදී කිසිත් සාකච්ඡා වූ බවක් දැනගන්නට නැත.
ඉන්දීය සංචාරයට ජාතික ජන බලවේගයේ නායක අනුර දිසානායකට අමතරව එහි ලේකම් විශේෂඥ වෛද්‍ය නිහාල් අබේසිංහ, ජාතික විධායක සභිකයන් වන පාර්ලිමේන්තු මන්ත්‍රී විජිත හේරත් සහ මහාචාර්ය අනිල් ජයන්ත යන නියෝජිතයන් සහභාගී වී සිටින බව ජාජබ නිවේදනය කර ඇත.
Facebook Comments
