ඉදිරි ජනාධිපතිවරණයේ තම සහාය සජිත් ප්‍රේමදාස හට ලබා දීමට උතුරු පලාත් හිටපු මහ ඇමැතිවරයා තීරණය කර ඇතත් සහයෝගය ලබා දෙන අපේක්ෂකයෙකු පිළිබඳව මෙතෙක් අවසන් තීරණයකට එළඹ නැති බව දෙමළ ජාතික සන්ධානය ප්‍රකාශ කර තිබේ.
දැනට ඉදිරිපත් වී සිටින හා ඉදිරිපත් වෙන අපේක්ෂකයන් දෙස බලන විට තම සහාය ලබා දිය හැකි අපේක්ෂකයා සජිත් ප්‍රේමදාස බව හිටපු මහ ඇමැති සී.වී.විග්නේෂ්වරන් පවසා ඇත.
සජිත් ප්‍රේමදාස දෙමළ විරෝධියකු බව තවමත් පෙනෙන්න නොමැතිකම නිසා තමන් ඒ ගැන සතුටු වන බව පැවසූ හිටපු මහ ඇමැතිවරයා රටේ 75 % ක් සිංහල බෞද්ධ ජනතාව වන අතර උතුරු- නැඟෙනහිර ජනතාවගෙන් 85%ක් ම දෙමළ ජනතාව බවද ඔහු තේරුම් ගත යුතු බවත් කියා සිටියේය.
සජිත් ප්‍රේමදාස නිවැරැදි හා කාලෝචිත තීරණයකට එළඹ ක්‍රියා කළහොත් උතුරු- නැඟෙනහිර සියලු දෙමළ ජනතාවගේ සහාය ඔහුට ලබා ගත හැකි බව පවසන සී.වී.විග්නේෂ්වරන් සිංහල බෞද්ධකම කරපින්නා ගෙන රට පාලනය කිරීමට සූදානම් බවක් පෙනෙන්නට තිබීමත් රණවිරුවන්ව ආරක්ෂා කිරීමට සහතික ලබා දීමත් ඔහුගේ අඩුපාඩු වශයෙන් දකින බව ද සඳහන් කළේය.
මේ අතර ජනාධිපතිවරනයේදී සහය ලබා දෙන අපෙක්ෂකයා කව්රුන් දැයි යන්න පක්ෂය නිල වශයෙන් මේ වනතුරුත් අවසන් තීරණයක් ගෙන නොමැති බව දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ සුමන්තිරන් පවසනවා.
සියලු අපේක්ෂකයන් සමඟ තම පක්ෂය සාකච්ඡා කිරීමට සුදානම් බව කී මන්ත්‍රීවරයා එම සාකච්ඡා වලින් අනතුරුව සහාය ලබා දෙන්නේ කාටහද යන්න නිවේදනය කරන බව වැඩි දුරටත් කියා සිටියේය.
Facebook Comments
