දෙවසරකට පෙර ශ්‍රී ලංකාව තුළ මුහුණු පොත හරහා මුස්ලිම් විරෝධී වෛරය ඇවිලවූ අපරාධකරුවන් ෆේස්බුක් සමාගමේ උදව්වෙන් හදුනා ගැනීමේ වගකීම ඇත්තේ නීතිපති දෙපාර්තමේන්තුවට බව හිටපු පාර්ලිමේන්තු මන්ත්‍රීවරයකු පවසයි.
මුහුණු පොත පුරා පැතිරුණු කටකතා හා වෛරී ප්‍රකාශ, 2018 වසරේදී දිගන සහ තෙල්දෙණිය ප්‍රදේශ ඇවිලූ මුස්ලිම් ජනයාට එරෙහි ප්‍රචණ්ඩතාවට හේතු වූ බව විමර්ශනයකින් අනාවරණය වීමත් සමග ලංකාව සසල කළ මාරාන්තික වාර්ගික ප්‍රහාරය තුළ සිය භූමිකාව පිළිබඳව ෆේස්බුක් සමාගම පසුගිය සතියේ සමාව ඉල්ලා තිබුනි.
ෆේස්බුක් හෙළිදරව්ව සම්බන්ධයෙන් විශේෂ ප්‍රකාශයක් කරමින් එක්සත් ජාතික පක්ෂයේ හිටපු පාර්ලිමේන්තු මන්ත්‍රී මුජිබර් රහුමාන් කියා සිටියේ ජාතිවාදී මතවාද ප්‍රචාරය කළ පුද්ගලයන්ට එරෙහිව නීතිමය පියවර ගැනීම නීතිපති දෙපාර්තමේන්තුවට බාර කටයුත්තක් බවයි.
කන්ද උඩරට මුස්ලිම් ජනයා ඉලක්ක කරගනිමින් පසුගිය ආණ්ඩු සමයේ දියත් කළ ප්‍රහාරවලට සම්බන්ධ වූවන් විශාල පිරිසක් එම දිනවලම අත්අඩංගුවට ගෙන නඩු පවරා ඇති බව ඔහු පවසයි.
මුස්ලිම් විරෝධී ප්‍රහාර මාලාව දියත් කිරීමට එළිපිටම හවුල්වූ පිරිස් වලට එරෙහිව අධිකරණයේ නඩු පවරා තිබෙන අතර මුහුණු පොත හරහා වෛරය පැතිරවීමටත්, ජාතීන් අතර සැකය, අවිශ්වාසය ඇතිකිරීමට දායකත්වය ලබා දුන් පිරිස් ෆේස්බුක් සමාගම හරහා කොටුකර ගනිමින් ඔවුන්ට එරෙහිවත් නීතිය ක්‍රියාත්මක කිරීමට නීතිපති දෙපාර්තමේන්තුවට හැකියාව පවතින බවයි හිටපු මන්ත්‍රීවරයා පෙන්වා දෙන්නේ.
තමන්ද සාමාජිකත්වය දැරූ රජයක් සමයේ සිදුවු ජාතිවාදී ප්‍රහාරය මෙහෙයවීම ගැන එවකට විපක්ෂය නියෝජනය කළ දේශපාලනඥයන් කිහිප දෙනකු වෙත චෝදනා එල්ල වු බව පෙන්වා දෙන හිටපු මන්ත්‍රීවරයා අවධාරණය කරන්නේ එම චූදිතයන් අද වන විට පාලකයන් වී සිටින බවයි.
“අපි බලාපොරොත්තු වෙනවා ඒ පවරපු නඩු ඒ විදිහටම යයි කියන බලාපොරොත්තුවක් අපිට තිබෙනවා. මේකේ වගකීම විශේෂයෙන්ම නීතිපති දෙපාර්තමේන්තුවට තියනවා. මේ නඩු මේවාට සම්බන්ධ වෙච්ච පුද්ගලයන්ට දඩුවම් ලබාදීමේ එම ක්‍රියා පිලිවෙත නීතිපති දෙපාර්තමේන්තුව ඉදිරියට ගෙනියයි කියලා,” යි හිටපු මන්ත්‍රීවරයා වැඩි දුරටත් සඳහන් කළේය.
Facebook Comments
