ශ්‍රී ලංකාවේ කාළගුණ විපර්යාසයෙන් සිදු වන පීඩාව අවම කර ගැනීම සඳහා කෘෂිකර්මික ක්ෂේත්‍රයේ රැකියා කප්පාදු කරන ලෙස ලෝක බැංකුව නිර්දේශ කර තිබේ.
කාලගුණ විපර්යාස දකුණු ආසියාවේ ජන ජීවිතයට අනාගතයේදී බලපාන ආකාරය පිළිබඳව ලෝක බැංකුව නිකුත් කළ අලුත්ම වාර්තාවේ දැක්වන පරිදි ශ්‍රී ලංකාවට නිර්දේශ කර ඇත්තේ අධ්‍යාපනය නගා සිටුවීම, වෙළෙඳපොල ප්‍රවේශය දියුණු කිරීම සහ කෘෂිකර්මික ක්ෂේත්‍රයේ රැකියා කප්පාදුවයි.
කාලගුණයේ අහිතකර බලපෑම නිසා 2050 වන විට බංග්ලාදේශයේ, ඉන්දියාවේ, පකිස්තානයේ හා ශ්‍රී ලංකාවේ ජීවන තත්වය කඩා වැටෙන බව පවසන ලෝක බැංකුව ඉන් වඩාත්ම පීඩාවට පත්වනු ඇත්තේ ශ්‍රී ලංකාව බව පෙන්වා දී ඇත.
කෘෂිකාර්මික නොවන රැකියා සියයට තිහකින් වැඩි කළ හොත් කාලගුණ විපර්යාසයෙන් ජීවන තත්වයට ඇතිවන බලපෑම මුළුමනින්ම අහෝසි කරගත හැකිවනු ඇති බව ලෝක බැංකුවේ විශ්වාසයයි.
එම බලපෑම සාලකිය යුතු මට්ටමකින් අවම කර ගැනීම සඳහා අධ්‍යාපනය ලබන සංඛ්‍යාව සියයට 30කින් ඉහල නැංවීම සුදුසු බවටයි ලෝකු බැංකුව “දකුණු ආසියාවේ ගිනියම් කලාප: උෂ්ණත්වයේ සහ වර්ෂාපතනයේ වෙනස්කම් ජීවන තත්වයට බලපාන ආකාරය” වාර්තාව ප්‍රකාශ කරයි.
ගිනියම් උතුර
යුද්ධයෙන් බැට කෑ උතුරේ ජනයා ඉහල යන උෂ්ණත්වය හා වැසි වැටීමේ අපිළිවෙල නිසා ශ්‍රී ලංකාවේ වැඩිම පීඩාවට ගොදුරු වනු ඇති බවටයි ලෝක බැංකු වාර්තාව පෙන්වා දෙන්නේ.
එම හේතුවෙන් උතුරේ දිස්ත්‍රික්ක පහේම ජීවන තත්වය තවදුරටත් පහත වැටෙනු ඇති බවටයි ලෝක බැංකු වාර්තාව අනතුරු අඟවන්නේ.
උතුරු පළාතේ යැපනය දිස්ත්‍රික්කය වැඩිම ගිනියම් කලාපය වන බව පවසන ලෝක බැංකුව පිළිවෙලින් වයඹ පළාතේ පුත්තලම සහ උතුරු පළාතේ මන්නාරම හා කිලිනොච්චිය උෂ්ණත්වය ඉහළ යන දිස්ත්‍රික්ක ලෙස හඳුන්වා දෙයි.
බලපෑම අවම කරගැනීමට පියවර නොගතහොත් ශ්‍රී ලංකාවට සිදුවන ආර්ථික පාඩුව ඇමරිකානු ඩොලර් කෝටි පන්දාහක් වන බව ලෝක බැංකුව අනතුරු අඟවා සිටී.
Facebook Comments
