දිනෙන් දින ඉහල යන ජීවන වියදම හමුවේ පීඩාවට පත්ව රට හැර දමා යෑමට උත්සාහ කළ බවට සැක කෙරෙන ශ්‍රී ලාංකිකයන් පිරිසක් උපන් බිමේම රඳවා ගන්නට ශ්‍රී ලංකා නාවික හමුදාව පියවර ගෙන තිබේ.
මුහුදු මාර්ග ඔස්සේ ඔස්ට්‍රේලියාවට සංක්‍රමණය වීමට උත්සහ කළ බවට සැකකෙරෙන පුද්ගලයන් 35 දෙනෙකු රැගත් බහුදින ධීවර යාත්‍රාවක් 23 වනදා සවස පානදුර ප්‍රදේශයට ඔබ්බෙන් වූ මුහුදු ප්‍රදේශයේ සිදුකළ සෝදිසි මෙහෙයුමක දී සිය බාරයට ගත් බව නාවික හමුදාව පවසයි.
ජාවාරම්කරුවන් 05 දෙනෙකු ඇතුළුව පිරිමි පුද්ගලයන් 25 ක්, කාත්තාවන් 04 ක් හා ළමුන් 06 දෙනෙකු එම බහුදින ධීවර යාත්‍රාවේ සිට ඇත.
අත්අඩංගුවට ගත් පිරිස ත්‍රිකුණාමලය, මන්නාරම, මඩකලපුව, මීගමුව, කල්පිටිය සහ නුවරඑළිය යන ප්‍රදේශවල පදිංචිකරුවන් බවටයි හඳුනාගෙන ඇත්තේ.
ඔවුන් නීතිමය කටයුතු සඳහා කොළඹ වරාය පොලිසිය වෙත බාර දුන් බවයි නාවික හමුදාව වැඩිදුරටත් පවසන්නේ.
රටින් පිටවීමට වෑයම් කරන සංඛ්‍යාව වැඩිවෙමින් පවතින බව දක්නට ඇති අතර නාවික හමුදාව විසින් ජුනි මාසය තුල පමණක් නීති විරෝධිව මුහුදු මාර්ගයෙන් විදෙස් ගත්වීමට උත්සහා කළ බව සැකකෙරෙන සියයකට වැඩි පිරිසකගේ ගමන නවත්වන ලදී.
Facebook Comments
