සාමය හා සංහිඳීයාව ශක්තිමත් කරමින් නව වැඩපිළිවෙලක් ඔස්සේ රට ඉදිරියට ගෙන යන බව අගමැතිවරයා පවසයි.
මල්වතු පාර්ශ්වයේ මහනායක අතිපූජ්‍ය තිබ්බටුවාවේ ශ්‍රී සුමංගල නාහිමිපාණන් වහන්සේ සහ අස්ගිරි පාර්ශ්වයේ මහනායක අතිපූජ්‍ය වරකාගොඩ ඥාණරතන නාහිමිපාණන් වහන්සේ බැහැ දැක අගමැති රනිල් වික්‍රමසිංහ රජයේ ඉදිරි වැඩපිළිවෙල සම්බන්ධයෙන් උන්වහන්සේලා දැනුවත් කල බව 18 බදාදා මහනුවර දී මාධ්‍ය අමතිමින් කියා සිටියේය.
පසුගිය වසරේ මෙන් අවාසනාවන්ත සිදුවීම වලට මුහුණ දීමට සිදු නොවන බවට විශ්වාසය පල කල අගමැතිවරයා සාමයත්, සමගියත්, සංහිදියාවත් ශක්තිමත් කිරිමට කටයුතු කරන බව අවධාරණය කළේය.
“පළමුවෙන් අප බලාපොරොත්තු වන්නේ මේ රටේ සාමයත්, සමගියත්, සංහිදියාවත් ශක්තිමත් කිරීමයි. අප ඒ වෙනුවෙන් අවශ්‍ය වැඩ කටයුතු සිදු කරනවා. පරණ අවුරුද්දෙ වගේ අවාසනාවන්ත සිද්ධි නැතිව අපි ඉදිරියට යන්න ඕනේ” යැයි අගමැතිවරයා පැවසීය.
රජය විසින් ආරම්භ කර ඇති ව්‍යපෘති ගණනාවක් මේ වසරේ අවසන් වන බව මෙන්ම ව්‍යපෘති කිහිපයක් අලුතින් ආරම්භ වන බවද අගමැති රනිල් වික්‍රමසිංහ මෙහිදි සඳහන් කළේය.
ජනාධිපතිවරයාගේ බ්‍රිතාන්‍ය සංචාරය නිමවා නැවත ශ්‍රී ලංකාවට පැමිණි පසු රට වෙනුවෙන් නව වැඩසටහනක් ආරම්භ කිරීමට නියමිත බව අගමැතිවරයා මාධ්‍ය අමතමින් වැඩි දුරටත් කියා සිටියේය.
Facebook Comments
