එක්සත් ජාතික පක්ෂයේ ප්‍රතිපත්තීන්ට එකඟ වන පර්ශව එකතු කර ගනිමින් තනි එජාප ආණ්ඩුවක් නිර්මාණය කරන ලෙස අගමැතිවරයාගෙන් ඉල්ලා සිටි බව පුත්තලම් දිස්ත්‍රික්කයේ පාර්ලිමේන්තු මන්ත්‍රීවරයෙකු පවසයි.
පළාත් පාලන ජනවරමින් කියා පාන්නේ එක්සත් ජාතික පක්ෂයේ තනි ආණ්ඩුවක අවශ්‍යතාවය බව හෙක්ටර් අප්පුහාමි මන්ත්‍රීවරයා 13 අඟහරුවාදා අගමැති රනිල් වික්‍රමසිංහ සමඟ පැවති සාකච්ඡාවකින් අනතුරුව සිලෝන් ජර්නල්ස් හා කියා සිටියේය.
“අපි අගමැතිගෙන් තනි ආණ්ඩුවක් හදන්න ඉල්ලුවා. මේ ජන වරම කියවෙන්නෙ එජාප තනි ආණ්ඩුවක් අවශ්‍යයි කියන එක” යැයි හෙක්ටර් අප්පුහාමි මන්ත්‍රීවරයා පවසයි.
ජනාධිපති සහ අගමැති අතර 12 සඳුදා පැවති සැකච්ඡාවේදී රනිල් වික්‍රමසිංහ අගමැති ධුරයේ කටයුතු කිරීමට ශ්‍රීලනිප ඇතැමි පිරිස් විරුද්ධ බව ජනපති දන්වා ඇති අතර අගමැතිවරයා තීරණය කල යුත්තේ එජාපය මිස ශ්‍රීලනිපය නොවන බවයි මන්ත්‍රීවරයා පවසන්නේ.
එක්සත් ජාතික පක්ෂයේ ප්‍රතිපත්ති සමඟ එකඟ වන ඕනෑම කෙනෙකු එකතු කර ගනිමින් එජාප ආණ්ඩුවක් නිර්මාණ කිරීමට පියවර ගන්නා ලෙසට අගමැතිවරයාගෙන් කරන ලද ඉල්ලීමට යහපත් ප්‍රතිචාරයක් ලැබුණ බව කී මන්ත්‍රීවරයා අද හෙටම ආණ්ඩු වෙනසක් සිදු වනු ඇති බවට විශ්වාසය පළ කළේය.
ශ්‍රීලනිප පිරිසක්
මේ අතර එජාප ආණ්ඩුවක් සැකසීම ශ්‍රීලනිප මන්ත්‍රීවරුන් 10 වැඩි පිරිසක් එජාපය සමඟ එකතු වීමට කැමැත්ත පල කර ඇති බව සිරිකොත ආරංචි මාර්ග පවසයි.
එක්සත් ජාතික පක්ෂයේ අමාත්‍යවරුන් සහ ජනාධිපති මෛත්‍රීපාල සිරිසේන අතර විශේෂ සාකච්ඡාවක් අද පස්වරුවේ පැවැත්වීමට නියමිතව ඇති අතර එහිදි එජාප සරල බහුතරය පෙන්වා ආණ්ඩුව සැකසීමේ නිල අදහස ජනාධිපතිවරයා වෙත ඉදිරිපත් කිරීමට නියමිතව ඇතැයි වාර්තා වේ.
Facebook Comments
