යහපාලන රජය බිහි කිරීමට ගෙන එන ලද ප්‍රධාන පොරොන්දුවක් වු විධායක ජනපති ධුරයේ බලතල කප්පාදු කල හා ස්වාධීන කොමිෂන් සභා පිහිට වු 19 වන ව්‍යවස්ථා සංශෝධනය හකුලා ගන්නා ලෙස පුංචි ජන්දය ජයගත් හිටපු ජනපති මහින්ද රාජපක්ෂ රජයට බල කර සිටි.
එම සංශෝධනය වෙනස් කර කඩිනමින් පාර්ලිමේන්තු මැතිවරණයක් පවත්වා රටේ පවතින ආර්ථික තත්වය හා අස්ථාවරභාවය ආදී සියල්ල වෙනස් කිරීමට කටයුතු කල යුතු බවයි හිටපු ජනපති පවසන්නේ.
ව්‍යවස්ථා සංශෝධනය වෙනස් කිරිමේ යෝජනාව ආණ්ඩුව විසින් ගෙන ආ යුතු බව කී මහින්ද රාජපක්ෂ එයට තම සහාය හිමි වන බව ද කියා සිටියේ පාර්ලිමේන්තු මැතිවරණයක් පැවැත්වීමටනම් 19 වැනි ව්‍යවස්ථා සංශෝධනය සම්බන්ධයෙන් පාර්ලිමේන්තුවේ යෝජනාවක් ඉදිරිපත්විය යුතු නොවේදැයි මාධ්‍යවේදීයෙකු නැගු ප්‍රශ්නයකට පිළිතුරු දෙමිනි.
“නෑ ඉතිං අපිට ආණ්ඩුවෙන්නේ ඉල්ලන්න තියෙන්නේ. ඒක ආණ්ඩුවෙන් ගේන්න, මොකද අපි ගෙනාවොත් ඔය කට්ටිය විරුද්ධ වෙනවානේ,” යැයි පාර්ලිමේන්තු මන්ත්‍රී මහින්ද රාජපක්ෂ සඳහන් කර සිටියේ පොහොට්ටුව ලකුණින් පොදුජන පෙරමුණ යටතේ තරගකර පළාත් පාලන මැතිවරණයෙන් ලබාගත් ජයග්‍රහනය සම්බන්ධයෙන් 12 සඳුදා පැවති මාධ්‍ය හමුවේදීය.
19 ව්‍යවස්ථා සංශෝධනය හකුලා මහ මැතිවරණයක් කැඳවීම වෙනුවෙන් ජනමතය නිර්මාණය කිරිමට මාධ්‍යවේදින් කටයුතු කල යුතු බව මෙන්ම ජනතා මතයට ඇහුන්කන් දීමට රජයක් පුරුදු විය යුතු බව හිටපු ජනපති මහින්ද රාජපක්ෂ වැඩි දුරටත් කියා සිටියේය.
යහපාලන රජය බලයට පත්වීමෙන් පසුව සිදු කළ 19 වෙනි ආණ්ඩුක්‍රම ව්‍යවස්ථා සංශෝධනය අනුව මහ මැතිවරණයක් පවත්වා වසර හතර හමාරක් ගතවන තුරු පාර්ලිමේන්තුව විසුරුවා හැරීමේ බලය ජනාධිපතිවරයා සතු නොවේ.
Facebook Comments
