පළාත් පාලන ජන්දයෙන් එජාපය ලද පරාජය හේතුවෙන් තමන් අගමැති ධුරයෙන් ඉවත් වීමට පෙර ධුරයෙන් ඉල්ලා අස්විය යුත්තේ ජනාධිපතිවරයා බව අගමැතිවරයා පෙන්වා දී ඇතැයි වාර්තා වේ.
ජනපති හා අගමැති අතර 12 සඳුදා පැවති සාකච්ඡාවේදී අගමැති රනිල් වික්‍රමසිංහ ජනපති මෛත්‍රීපාල සිරිසේන හට මේ බව කියු බව නම සඳහන් නොකරන ලෙස ඉල්ලා සිටි අගමැති සමීපතමයකු සිලෝන් ජර්න්ල් හා කියා සිටියේය.
එජාපයේ ජන්ද පදනම දියාරු වී නොමැති බව පෙන්වා දී ඇති අගමැතිවරයා, සිදු ව ඇත්තේ ජනාධිපතිවරයා විසින් මෙහෙයවන ලද ශ්‍රී ලංකා නිදහස් පක්ෂයේ ජන්ද සෝදාපාලු වී යාම බව අවධාරණය කර ඇත.
පළාත් පාලන මැතිවරණයේ සමස්ත ජන්ද ප්‍රතිඵලයට අනුව එක්සත් ජාතික පක්ෂයට දෙවන ස්ථානය හිමිව ඇති අතර ශ්‍රී ලංකා නිදහස් පක්ෂයට හිමි ව ඇත්තේ හතර වන ස්ථානයයි.
එක්සත් ජනතා නිදහස් සන්ධානයේ සහ ශ්‍රී ලංකා නිදහස් පක්ෂයේ ජන්ද ප්‍රතිශතය එකතු කළ ද එක්සත් ජාතික පක්ෂය ඊට ඉහළින් ඇති බව පෙන්වා දී ඇති අතර තමන් ඉවත් වන්නේ නම් ජනාධිපතිවරයා ද ඉවත් විය යුතු බව අගමැතිවරයා පෙන්වා දී තිබේ.
මේ අතර මාධ්‍ය නාළිකා යොදා ගනිමින් ජනාධිපතිවරයාට සමීප පුද්ගලයන් විසින් එජාපය සහ තමන් ඉලක්ක කර එල්ල කරන මඩ ප්‍රහාර නවතා දමන ලෙස ඉල්ලා ඇති අගමැතිවරයා එජාප ආණ්ඩුවක් පිහිටුවීමට සහාය දෙන ලෙස ජනපතිගෙන් ඉල්ලා ඇත.
ජනාධිපති මෛත්‍රීපාල විසින් ප්‍රසිද්ධියේ අගමැතිවරයා විවේචනය කළ ද අගමැතිවරයා විසින් ජනපති හෝ යහපාලන රජයේ පාර්ශවකරුවන් විවේචනය නොකරන ලෙසට රනිල් වික්‍රමසිංහ අගමැතිවරයා එජාප මැති ඇමැතිවරුන්ට උපදෙස් දී ඇති බවද සිරිකොත ආරංචි මාර්ග පවසයි.
Facebook Comments
