ශ්‍රී ලංකාවේ කොවිඩ් මරණ අඩුවීම ගැන සහෝදර උපහාරයක්

නිසි වේලාවට ගුවන් තොටුපල වසා නොදැමීම නිසා ශ්‍රී ලංකාවට වසංගතය උවමනාවෙන්ම ගෙන්නාගත් බවට විපක්ෂය චෝදනා කරද්දී කොරෝනා වෛරසයෙන් මෙරට තුලදී මිය ගිය ප්‍රමාණය අවම වීමට හේතුව සිය සහෝදරයා ජනාධිපති ධුරය දැරීම බව අග්‍රාමාත්‍යවරයා පවසයි.

එංගලන්තයේ පදිංචි වී සිටි ශ්‍රී ලාංකිකයන් 25 දෙනෙකු මේ වන විට කොරෝනා රෝගය හේතුවෙන් මිය ගොස් තිබුණද, මෙරට තුලදී ශ්‍රී ලාංකිකයන් මිය ගොස් ඇත්තේ නව දෙනෙක් පමණක් වීම සැලකිය යුතු කරුණක් බවයි අගමැති මහින්ද රාජපක්ෂ පවසන්නේ.

2019 වසරේ නොවැම්බර් 16 දින ගෝඨාභය රාජපක්‍ෂ ජනාධිපති නොවුයේ නම්, මෙම ජයග්‍රහන ජනතාවට නොලැබෙන බව අගමැති මහින්ද රාජපක්ෂ පවසා ඇත්තේ “කොරෝනා රෝගය පාලනය කර, ක්‍රමිකව සාමාන්‍ය ජන ජීවිතය ආරම්භ කිරීම” මැයෙන් මාධ්‍ය නිවේදනයක් නිකුත් කරමිනි.

මෙරටින් රෝගීන් වාර්තා වු මුල් අවස්ථාවේ සිටම රෝගීන් ඇසුරු කළ පුද්ගලයන් සොයා ගොස් ත්‍රිවිධ හමුදාව හා පොලීසිය විසින් ඔවුන්ව නිරෝධායනයට ලක් කිරීම නිසා මේ රෝගය සතුටුදායක මට්ටමකට පාලනය වී ඇති බව පෙන්වා දෙන අගමැතිවරයා පවසන්නේ මේ අවස්ථාව වනවිට, කොරෝනා රෝගය පාලනය කිරීම පැත්තෙන් ලංකාව ලෝකයේ ඉදිරියෙන්ම සිටින රටක් බවයි.

“ඒ ගැන අපේ රජයේ වෛද්‍යවරුන්, හෙදියන් ඇතුලු සෞඛ්‍ය අංශයත්, රෝගීන් ඇසුරු කළ පුද්ගලයන් සෙවීම සාර්ථකව සිදු කළ බුද්ධි අංශත්, මේ සටනේ පෙරමුණේ සිට ජනතාව මෙහෙයවීමේ කටයුතු කළ ත්‍රිවිධ හමුදාව, පොලීසිය හා මහජන සෞඛ්‍ය පරීක්‍ෂකවරුන් ඇතුලු සියලුම පිරිස් ඔවුන් කළ මේ මෙහෙවර ගැන සැබවින්ම ආඩම්බර විය යුතුය.”

මේ සියලු ජයග්‍රහන වල අයිතිය සිය සහෝදර ජනාධිපති ගෝඨාභය රාජපක්ෂ වෙත පිරිනමන අගමැති මහින්ද රාජපක්ෂ සිය නිවේදනය මගින් කටයුතු කර තිබේ.

මැයි 10 දින නිකුත් කර තිබෙන එම නිවේදනය මගින් අග්‍රාමාත්‍යවරයා අවධාරණය කර ඇත්තේ කොරෝනා වෛරස් අවදානම පාලනයකට යටත් කොට ඇතත්, සම්පූර්ණයෙන්ම නැති වී නැති නොමැති බවයි.

ඉදිරියේදීත් කොරෝනා වෛරස් රෝගීන් හමුවිය හැකි බව පවසන අගමැතිවරයා එවැනි තත්වවයන් පාලනය කිරීමේ ක්‍රමවේදයන් මෙරට සෞඛ්‍ය අංශ මේ වන විට ප්‍රගුණ කර ඇති බවට විශ්වාසය පළ කරයි.

ඉදිරියටද අවශ්‍ය වුවහොත් කලින් මෙන්ම යම් ප්‍රදේශ හුදකලා කිරීම, පොලිස් බලප්‍රදේශ තුළ ඇඳිරිනීතිය පැනවීම යනාදිය අවශ්‍ය වීමට ඉඩ ඇති බවට අනතුරු අගවන අගමැති මහින්ද රාජපක්ෂ රෝගය පැතිරීම පාලනය කිරීමත්, හැකි හැම තැනකම සාමාන්‍ය ජන ජීවිතය නැවත ආරම්භ කිරීමත් සමබරව පවත්වාගෙන යෑම සිදු කළ යුතු බව අවධාරණය කරයි.

කොරෝනා රෝගය පාලනය කර ගැනීමට ජනතාවගෙන් සෞඛ්‍ය අංශවලට හා ත්‍රිවිධ හමුදාවටත්, පොලීසියටත් ලැබුණු ආකාරයේම සහයෝගයක්, රට සාමාන්‍ය තත්වයට පත්කිරීමේ ක්‍රියාවලියටත් ලැබෙනු ඇතැයි අග්‍රාමාත්‍යවරයා සිය නිවේදනය මගින් විශ්වාසය පළ කර තිබේ.

ලංකාවේ පළමු කොරෝනා රෝගියා සොයා ගනු ලැබු මාර්තු 10 වැනිදා රාත්‍රියේ සිට මැයි මස 11 සදුදා උදෑසන වන විට ශ්‍රී ලංකාවෙන් වාර්තා වී ඇති සමස්ත වෛරස් ආසාදිතයන් ගණන 863 කී.

කොව්ඩ් – 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානි, ආරක්‍ෂක මාණ්ඩලික ප්‍රධානී මෙන්ම යුද්ධ හමුදාධිපති ලුතිනන් ජෙනරාල් ශවේන්ද්‍ර සිල්වා පවසන පරිදි ඒ අතුරින් 400 ට වැඩි පිරිසක් මෙරට ආරක්ෂක අංශ සාමාජිකයෝ වෙති.

කොවිඩ් 19 වෛරසය මැඩ පැවැත්වීමේ රාජකාරි වලදී ආණ්ඩුව විසින් ආරක්ෂක අංශ වලට ප්‍රමුඛත්වය ලබා දීම සම්බන්ධයෙන් සෞඛ්‍ය ක්ෂේත්‍රයේ ක්‍රියාධාරීන් ජනාධිපතිවරයාට චෝදනා ද එල්ල කර තිබේ.

නිල ගැසට් නිවේදනයක් පවා නොමැතිව යුද අපරාධ චූදිත හමුදා සෙන්පතියකු ශ්‍රී ලංකාවේ කොරෝනා මර්දන වැඩපිළිවෙලේ නායකත්වයට පත්කිරීම සම්බන්ධයෙන් ජාත්‍යන්තර විරෝධයද එල්ල වී තිබුනි.

දකුණු අප්‍රිකාව මුලස්ථාන කොටගත් ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) විසින් නිකුත් කරන ලද වාර්තාව අනුව ව්‍යසනයකට මුහුණ දීමේදී හමුදාවට මුල්තැන දී සිදුකරන මෙහෙයුම් කටයුතු වලින් සිදුවන්නේ මානව හිමිකම් මෙන්ම නීතිය හා සාමය අනතුරේ වැටීම බව එහි අවධාරණය කර තිබුනි.