සිසේරියන් සැත්කම් සිදු කරන අතරතුර සිංහල කාන්තාවන් වන්ධ්‍යාකරණයට ලක් කළ බවට මුස්ලිම් වෛද්‍යවරයකුට එරෙහිව ව්‍යාජ මත පතුරුවා ජාතිවාදි සහ ආගම්වාද ය ඇවිස්සෙන ආකාරයේ ප්‍රකාශ නිකුත් කිරීම ගැන ජනාධිපති උපදේශක අතුරලියේ රතන විරුද්ධව විමර්ශන ඇරඹීමට ඉහළ පෙලේ පොලිස් නිලධාරින්ගේ අවධානය යොමුව තිබේ.
පාර්ලිමේන්තු මන්ත්‍රී අතුරලියේ රතන හිමිට මෙන්ම ත්‍රස්ත විමර්ශනයක රහසිගත බුද්ධි තොරතුරු ‘දිවයින’ පුවත්පතට ලබා දෙමින් ‘රාජ්‍ය රහස් හෙළි කිරීම සම්බන්ධයෙන් වයඹ පලාත භාර නියෝජ්‍ය පොලිස්පති කිත්සිරි ජයලත්ට එරෙහිවත් පොලිස් පරීක්ෂණ ආරම්භ වීමට නියමිත බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS)සංවිධානය පවසයි.
සිංහල කාන්තාවන් වන්ධ්‍යාකරණයට ලක් කළ බවට දිවයින ඇතුළු මාධ්‍ය සහ සිංහල බෞද්ධ බලවේග විසින් දොස්තර සෙයිගු ෂිල්හාබ්ඩීන් මොහොමඩ් සාෆි වෙත එල්ල කරන ලද චෝදනා සනාථ නොවු බව අපරාධ පරීක්ෂණ දෙපාර්තමේන්තුව ජුනි 27 වනදා අධිකරණයට දැනුම් දෙන ලදී.
වෛද්‍යවරයා කිසිදු ත්‍රස්ත සංවිධානයකට සම්බන්ධ නැතැයි යුද හමුදා බුද්ධි අංශය, නාවික හා ගුවන් හමුදා බුද්ධි අංශ, පොලිස් බුද්ධි අංශවලින් පමණක් නොව, රාජ්‍ය බුද්ධි සේවය හා ජාතික බුද්ධි කාර්යාංශයෙන් ද ලබා ගත් වාර්තා වලින් රහස් පොලිසිය තහවුරු කරගෙන ඇති බව ඔහු වෙනුවෙන් පෙනී සිටින නීතිඥ හිජාස් හිස්බුල්ලාහ් JDS සංවිධානයේ කිත්සිරි විජේසිංහ හා පවසා ඇත.
“ඒ සෑම බුද්ධි අංශයකින්ම අපිට එවුවේ වෛද්‍ය ශාෆි කිසිම ත්‍රස්ත ක්‍රියාවකට හෝ සැක කටයුතු කිසිම දෙයකට හෝ සම්බන්ධ වී නැතැයි කියන සහතිකයයි. ඒ කාරණාව තමයි ඒ එස් පී තිසේරා උසාවියේ දී කිවුවේ,” යි පවසා ඇති නීතිඥවරයා වෛද්‍ය සාෆිගේ දුරකතන දතත වලින්ද එවැන්නක් ඔප්පු වී නැතැයි ප්‍රකාශ කර තිබේ.
අවම වශයෙන් දුරකථන ඇමතුමක් සම්බන්ධයෙන් හෝ සැක කළ නොහැකි පුද්ගලයකු රැඳවුම් නියෝග යටතේ රඳවාගෙන සිටිම අසාධාරණ යැයි තමන්ට හැඟෙන බව සහකාර පොලිස් අධිකාරිවරයා අධිකරණය හමුවේ පැවසී යැයි ද නීතිඥ හිස්බුල්ලාහ් සඳහන් කළේය.
මුස්ලිම් වෛද්‍යවරයා අත් අඩංගුවට ගත් කුරුණෑගල පොලිසිය ඔහු වරදකරු කිරීම සඳහා ව්‍යාජ ලේඛන සකස් කර ඇති බවද අධිකරණයේදී හෙළිවී තිබේ.
“වෛද්‍ය ශාෆිව අත්අඩංගුවට අරන් තියෙන්නේ සැකය සහ ව්‍යාජ තොරතුරු මත කියලයි පොලිස් අධිකාරිවරයා කිවුවේ. ඒ වගේම ඔහු දැඩිව කියපු එකක් තමයි කුරුණෑගල පොලිසිය වෛද්‍ය ශාෆිගෙන් කට උත්තර අරන් ඒවයේ දමා තිබෙන්නේ ඒ ප්‍රකාශ ලබාගත් දින නොව, එයට පෙර දිනයන් බව. ඒ කියන්නේ, එම දින වකවානු කුරුණෑගල පොලිසිය විසින් ව්‍යාජව දමපු ඒවා. පොලිස් අධිකාරිවරයා මහේස්ත්‍රාත්තුමාට කිවුවා එහෙම ව්‍යාජ දින දමලා ප්‍රකාශ ගැනීම නීත්‍යානුකූල නෑ, ඒ නිසා ඒ සම්බන්ධවත් තම දෙපාර්තමේන්තුව විසින් කරුණු විමර්ශනය කරනවා කියලා,” යි නීතිඥ හිස්බුල්ලාහ් JDS වෙත පවසා ඇත.
වයඹ පලාත් නියෝජ්‍ය පොලිස්පතිවරයා සහ කුරුණෑගල පොලිසියේ අපරාධ අංශයේ ස්ථානාධිපතිවරයා විසින් වෛද්‍ය ශාෆිට එරෙහිව කටයුතු කර ඇති ආකාරය සැක කටයුතු බව නම හෙළි නොකළ වෛද්‍ය සාෆි සම්බන්ධයෙන් විමර්ශන සිදුකරන පරික්ෂණ කණ්ඩායමේ නිලධාරියෙකු ද JDS සංවිධානයේ කිත්සිරි විජේසිංහ හා ප්‍රකාශ කර තිබේ.
“අපි දිර්ඝව හොයලා බැලුවා. වෛද්‍ය ශාෆි කිසිම මුස්ලිම් සංවිධානයක් හෝ අන්තවාදි අදහස් දරන පුද්ගලයන් එක්ක හෝ සම්බන්ධතා පවත්වලා නෑ. පොලිසියෙන් ඔහුව අත්අඩංගුවට අරන් තියෙන්නේ සාක්ෂි තියා සැකයක්වත් නැතුව. අපි කුරුණෑගලින් ඇහුවා ඔය ගොල්ලෝ බුද්ධි වාර්තා මත පදනම්ව ඩොක්ටර් ශාෆිව අත්අඩංගුවට ගත්තනම්, ඒ වාර්තා මොනවද, එයට සාක්ෂි තියනවාද, කෝ ඒ වාර්තා කියලා. එහෙම අහපුවම කුරුණෑගලින් අපිට කියනවා, “එහෙම එකක් නෑ” කියලා,”
මේ අතර දොස්තර සෙයිගු ෂිල්හාබ්ඩීන් මොහොමඩ් සාෆි ගේ දියණියන් සම්බන්ධ කර ගනිමින් දිවයින පුවත්පත ගොතන ලද වාර්තාවකට එදිරිව කර්තෘ අනුර සොලමන්ස්, එම පුවත ලියු මනෝජ් අබේධීර සහ තවත් අයකුගෙන් රුපියල් මිලියන පනහ බැගින් වන්දි ඉල්ලා නඩු පවරන බව දැනුම්දෙමින් මේ වනවිට එන්තරවාසි යව ඇති බවත් බවයි නීතිඥ හිජාස් හිස්බුල්ලාහ් වැඩි දුරටත් JDS වෙත කියා තිබේ.
Facebook Comments
