හිටපු ජනපති මහින්ද රාජපක්ෂව නෙල්සන් මැන්ඩෙලා කෙනකු කිරීමට තමන් උත්සාහ දැරුවද ඔහු මුගාබේ වීමට තීරණය කළ බවට ජාතිවාදයට එරෙහිව සටන් වදින ආණ්ඩු පාක්ෂික ඇමැතිවරයකු චෝදනා කරයි.
නොබෙල් සාම ත්‍යාගය දිනා ගැනීමට තිබු ස්වර්ණමය අවස්ථාවක් මහින්ද රාජපක්ෂ අහිමි කරගත් බව සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න 27 බ්‍රහස්පතින්දා “අන්තවාදය එපා, ප්‍රජාතන්ත්‍රවාදය සුරකිමු” තේමාවෙන් සිවිල් සංවිධාන සහ වෘත්තීය සමිති එකමුතුව සංවිධානය කළ සමුළුවක් අමතමින් කියා සිටියේය.
“මම මහින්ද රාජපක්ෂට කිව්වේ ඔයා දෙවැනි මැන්ඩෙලා වෙන්න. ස්වර්ණමය අවස්ථාවක් ඇවිත් තියෙන්නෙ ලාංකික නායකයකුට නොබල් ත්‍යාගය දිනා ගන්න. මම ඇප්ලිකේෂන් එක ගෙනල්ලා දුන්න අතට, අවාසනාව මම එයාට මැන්ඩෙලා කරන්න හැඳුවා එයා තෝරගත්තා මුගාබේ කෙනෙක් වෙන්න.”
එම මුගාබේට එරෙහිව තමන් ඇතුළු පිරිස නැඟි සිට ජනබලයක් නිර්මාණය කළ බව කී අමාත්‍ය රාජිත සේනාරත්න එයින් නොනැවති ජනවාරි 8 වනදා ඔහු පරාජය කළ බව කියා සිටියේ රැස්ව සිටි පිරිසගේ අත්පොළසන් මධ්‍යයේය.
මහින්ද රාජපක්ෂ තවමත් ජතිවාදය, ආගම්වාදය හා කුලවාදය ඇති කරමින් දේශපාලනයේ නිරත වන ඔවුන් “පසුගාමී, ප්‍රතිගාමී දේශපාලන නායකයෝ,” යයි සුව ඇමැතිවරයා පැවසීය.
හිටපු ජනපති ජාතිවාදය වපුරමින් මිනිසුන් මරා රට විනාශ කර නැවතත් බලය ගැනීමට උත්සාහ කරන බවට දොස්තර රාජිත සේනාරත්න චෝදනා කළේය.
බෝම්බ ප්‍රහාර, වෙඩි උණ්ඩ වලට මුහුණ දෙමින් ජාතිවාදයට හා ආගම්වාදයට එරෙහි සටන් වැදී “අවසන් සටන” ජයගන්නා බව ද රාජිත සේනාරත්න ඇමැතිවරයා විසින් අවධාරණය කරන ලදී.
Facebook Comments
