ජනාධිපති මෛත්‍රීපාල සිරිසේනගේ ධුරකාලය 2020 වසරේ ජුනි මාසය දක්වා පවතින බවට පෙනී යන බැවින් ඒ පිළිබඳ ශ්‍රේෂ්ඨාධිකරණයෙන් විමසා බැලීමට කටයුතු කරන බව ශ්‍රී ලංකා නිදහස් පක්ෂය ප්‍රකාශ කර තිබේ.
නීත්‍යානුකූලව එම කාලය තුළ ජනාධිපති මෛත්‍රීපාල සිරිසේන හට තම ධුරය දැරීමට හැකියාව ලැබුන හොත් ජනාධිපතිවරණයට පෙර ම මැතිවරණය පවත්වන බව පක්ෂයේ මහලේකම් නීතිඥ දයාසිරි ජයසේකර කියා සිටියේය.
19 වැනි ආණ්ඩුක්‍රම ව්‍යවස්ථා සංශෝධනයට අනුව ජනාධිපතිවරයාගේ ධුර කාලය පස් වසරකට සීමා කෙරුණි.
ඒ අනුව වත්මන් ජනාධිපතිවරයා ධුර කාලය ආරම්භ වන්නේ 19 වන ව්‍යවස්ථා සංශෝධනයට කතානායකවරයා අත්සන් කළ දිනයේ සිටද යන්න ගැටලුවක් මතු වී ඇති ඇත.
කිසිදු පනතක් අතීතයට බලපාන්නේ නැති බැවින් ධුර කාලය ගණනය කිරීම පනතට අත්සන් කළ දිනයේ සිට ආරම්භ වන බවයි දයාසිරි ජයසේකර මන්ත්‍රීවරයා පෙන්වා දෙන්නේ.
අධිකරණ තීන්දුවකින් එය තහවුරු වුවහොත් ජනාධිපති මෛත්‍රීපාල සිරිසේන හට 2020 වසරේ ජුනි 21 දක්වා ජනාධිපතිධුරය දැරිය හැකි බව 09 අඟහරුවාදා පැවති මාධ්‍ය හමුවක දී මන්ත්‍රීවරයා ප්‍රකාශ කළේය.
මෛත්‍රීපාල සිරිසේන ජනාධිපති ධුරයට පත් වීමෙන් පසුව සම්මත කර ගන්නා ලද 19 වැනි ව්‍යවස්ථා සංශෝධනයට අනුව ඔහුගේ ධුර කාලය වසර 5 කට සීමා වන බව ශ්‍රේෂ්ඨාධිකරණය මීට පෙර ජනාධිපතිවරයා වෙත දැනුම් දී තිබුණි.
Facebook Comments
