දසවද ගැන ගෝටාට නඩු දැමු දහයෙන් දෙකක් සිංහල

0
ඡායා -රොෂාන් චතුරංග

ශ්‍රී ලංකා යුද හමුදාව යුද්දයෙන් පසු කාල පරිච්ජේදයේ තරුණ කාන්තාවන් ලිංගික වහලියන් ලෙස කඳවුරු ගතකොට තබා ගත් බව එක්සත් ජනපද අධිකරණයක ගොනු කර ඇති නඩුවේ පැමිණිලිකරුවෝ දස දෙනා අතර සිංහලයන් දෙදෙනකුද සිටී.

මේ බියජනක චෝදනාව එල්ල කෙරුනේ යුද සමයේ ආරක්ෂක ලේකම් ගෝඨාභය රාජපක්ෂට එරෙහිව තවත් දස දෙනකු හා එක්ව කැලිෆෝනියා දිසා අධිකරණයේ නඩු පැවරූ දෙමළ කාන්තාවක විසිනි.

දණ්ඩ මුක්තිය භුක්ති විඳිමින් සැකකරුවන් සංවිධානාත්මකව පැහැර ගනිමින්, වද දෙමින්, දූෂණය කරමින්, කප්පම් මුදල් ලබා ගත් ආරක්ෂක හමුදා වලට අණ දුන්නේ 2005 සිට 2015 දක්වා ශ්‍රී ලංකාවේ ආරක්ෂක ලේකම් ධුරයේ කටයුතු කළ ගෝඨාභය රාජපක්ෂ බව ජූනි 26 දා ගොනු කළ ලියවිලි වලින් පැමිණිලිකරුවෝ කියා සිටිති.

විද්‍යා ජයකුමාර් යන අන්වර්ථ නාමයෙන් සිය පැමිණිල්ල ඉදිරිපත් කරන දෙමළ කාන්තාව පවසන්නේ 2009 මැයි මාසයෙන් පසු තමන් අවුරුදු තුනක කාලයක් හමුදා කඳවුරු වල සිරකොට ගෙන ලිංගික වහල්කමේ යොදවා ගත් බවයි.

හවුස්ෆෙල්ඩ් ජාත්‍යන්තර නීතිඥ සමාගම හා එක්ව මේ නඩුකරය පවරා ඇත්තේ පුරා අවුරුදු හයක් තිස්සේ විමර්ශනයක යෙදුනු දකුණු අප්‍රිකාවේ ජොහැන්නස්බර්ග් නුවර මුලස්ථාන කොටගත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP)යි.

කඳවුරේ අණදෙන නිලධාරියාට කුරිරු ලෙස ඇය දූෂණය කරනු පිණිස සිංහල සෙබලියන් පිරිසක් විසින් පළමු රාත්‍රියේදී තමන්ට අලුත් ඇඳුමක් අන්දා ඇඳක ගැට ගසනු ලැබී යැයි විද්‍යා චෝදනා කරන බව හවුස්ෆෙල්ඩ් සහ ITJP නිකුත් කළ මාධ්‍ය නිවේදනයක දැක්වේ.

කඳවුරේ අණදෙන නිලධාරියාට අමතරව, තමන්ට කෙලින්ම වධහිංසා කළ බවට චෝදනා ලබන තවත් ආරක්ෂක අංශ නිලධාරීන්ද වධයට පාත්‍ර වූවන් විසින් නම් කර තිබේ. ඒ අතර ශ්‍රී ලංකාවේ ඉමහත් ප්‍රසිද්ධියක් ලබා සිටින ඉහලම රහස් පරීක්ෂකයකුද වෙයි.

“ශ්‍රී ලාංකිකයන්ට රට තුල යුක්තිය සාක්ෂාත් කරගත නොහැක්කේ මන්ද යන්න අපරාධ චූදිතයන් පොලිසියේ ප්‍රධාන විමර්ශක තනතුරු වල හිඳීමෙන් පෙනී යයි,” යනුවෙන් ITJP විධායක අධ්‍යක්ෂිකා යස්මින් සූකා පවසන්නීය.

කැලිෆෝනියාවේ ගොනු කරන ලද නෛතික ලියවිලිවල 2008 සහ 2013 අතර කාල වකවානුවේ දී, කුප්‍රකට වවුනියාවේ ජෝසප් කෑම්ප් ඇතුළු හමුදා කඳවුරු තුලද, කොළඹ සහ පුල්මුඩේ පොලිස් ස්ථානවලද, බූස්ස රැඳවුම් මධ්‍යස්ථානයේද සිදුකළ වධහිංසා පිළිබඳ සවිස්තර සාක්ෂි වාචක ඇතුලත් වෙයි.

හමුදා බුද්ධි අංශය, අපරාධ පරීක්ෂණ දෙපාර්තමේන්තුව, ත්‍රස්තවාදී විමර්ශන කොට්ඨාශය සහ විශේෂ බුද්ධි සේවාව වගකිවයුතු ඒකක ලෙස නම් කර ඇත.

මෙම අලුත් නඩු දහය පවරන ලද්දේ මීට ඉහත කැනඩා වාසී රෝයි සමාදානම් වෙනුවෙන් අප්‍රේල් 5 වැනිදා මුලින්ම ගොනු කරනු ලැබූ පැමිණිල්ලක් ඉවතලන ලෙස ගෝඨාභය රාජපක්ෂ අධිකරණයෙන් ඉල්ලීමක් කරනු ඇතැයි අපේක්ෂා කෙරෙද්දීය.

වධ වින්දිතයන් සමග කටයුතු කර ඇති සිය පහළොස් අවුරුදු සේවා කාලය තුලදී “මේසා බියකරු කුරිරුකම් ගැන අසා නැති තරම්,” යැයි නඩුව පැවරූ හවුස්ෆෙල්ඩ් සමාගමේ මානව හිමිකම් නීතිඥ ස්කොට් ගිල්මෝර් නිකුත් කළ ට්විටර් පණිවිඩයක දැක්වේ.

Facebook Comments

wedding people