බදු අයකර ගැනීම වඩා කාර්යක්ෂම සහ විධිමත් කර ජාතික ආර්ථිකය ශක්තිමත් කළ යුතුයි

0

රට තුළ බදු අය කර ගැනීම සඳහා පවතින ක‍්‍රමවේදයන් වඩා කාර්යක්ෂම සහ විධිමත් කර ගනිමින් රටේ ජාතික ආර්ථිකය ශක්තිමත් කළයුතු බව ජනාධිපතිවරයා පවසයි.

රාජ්‍ය ආයතන, ඇතැම් පෞද්ගලික ව්‍යාපාර ආයතන සහ ආයෝජන ව්‍යාපෘති තුළින් රාජ්‍ය ආදායමට එක්විය යුතු බොහෝ බදු ලැබීම්වල පවතින දුර්වලතා හේතුවෙන් ගැටලු රැසක් මතුව ඇති බව ද සඳහන් කළ ජනාධිපති මෛත්‍රීපාල සිරිසේන රටේ ජාතික ආර්ථිකය ශක්තිමත් කරමින් පොදු ජනතාවට වඩා උසස් ජීවන තත්ත්වයක් උදාකරදීමට සහ සමෘද්ධිමත් ආර්ථිකයක් ඇති කිරීමට සියලුදෙනා තම වගකීම් සහ යුතුකම් ඉටුකළ යුතු බවට අවධාරණය කර සිටියේ දේශීය ආදායම් කොමසාරිස්වරුන්ගේ සංගමයේ 16 වන වාර්ෂික සමුළුව අමතමිනි.

ජාතික ආර්ථිකයේ හදවතට රුධිරය සපයන දේශීය ආදායම් බදු ක්ෂේත‍්‍රය මෙරට ජාතික ආර්ථිකය ශක්තිමත් කිරිම වෙනුවෙන් ඉටුකරන මෙහෙවර ද මෙහිදී ජනාධිපතිවරයාගේ ඇගයීමට ලක් වු අතර දේශීය ආදායම් බදු සේවයේ ගුණාත්මක භාවය ඉහළ නැංවීම උදෙසා එහි කාර්ය මණ්ඩලවලට අවශ්‍ය විදේශීය පුහුණු අවස්ථා ඉදිරියේදී වැඩි වැඩියෙන් උදා කර දීමට කටයුතු කරන බව ද ප්‍රකාශ කළේය.

“අපේ රටේ තිබෙන බදු ක‍්‍රමය පිළිබඳව බොහෝ වෙලාවට ප‍්‍රසාදය – අප‍්‍රසාදය විවේචන පළවෙනවා. එය අපිට පමණක් සීමා වූ දෙයක් නොවේ. ලෝකයේ සංවර්ධිත රටවල්වල ශක්තිමත් ආර්ථිකයක් ඇති රටවල්වල බදු ක‍්‍රම අද නව තාක්ෂණය සමග මුසුවී ඇති ආකාරය අප විසින් අධ්‍යයනය කිරීම ඒ පිළිබඳව අවබෝධය සහ අවශ්‍ය පුහුණුවීම් ලබා ගැනීම අතාවශ්‍ය බවයි මගේ හැඟීම.” යි ජනාධිපති මෛත්‍රීපාල සිරිසේන වැඩිදුරටත් පැවසීය.

මුදල් අමාත්‍ය රවී කරුණානායක, රාජ්‍ය අමාත්‍ය ලක්ෂ්මන් යාපා අබේවර්ධන, දේශීය ආදායම් කොමසාරිස් ජනරාල් කල්‍යාණි දහනායක යන අයවලුන් ද, දේශීය ආදායම් කොමසාරිස්වරුන්ගේ සංගමයේ සභාපති මහින්ද ගුණවීර ඇතුළු සාමාජික සාමාජිකවන් මෙම අවස්ථාවට එක්ව සිටියහ.

Facebook Comments

wedding people