ලෝක කම්කරු දිනය සමග යෙදී තිබෙන වෙසක් සතිය සැලකිල්ලට ගනිමින් මැයි 01 වනදා පෙළපාලි සහ රැස්වීම් මැයි 07 වන දිනට කල් දැමීමට කැබිනට් මණ්ඩලය තීරණය කර තිබේ.
මහා සංඝරත්නය විසින් කරන ලද ඉල්ලීම සැලකිල්ලට ගනිමින් එම තීරණයට එළැඹි බව පවසන ජනාධිපතිවරයා ඒ අනුව එළැඹෙන වෙසක් පුන් පොහෝ දිනය සහ එම සතිය බුද්ධාලම්භන ප්‍රීතියෙන් යුතුව රට තුළ උත්කර්ෂවත් අන්දමින් සැමරීමට මහා සංඝරත්නයේ අවවාද සහ අනුශාසනා මත අවශ්‍ය සියලු කටයුතු සළසන බවයි පවසන්නේ.
පෙළපාලි සහ රැස්වීම් පැවැත්වෙන මැයි 07 වනදා රජයේ නිවාඩු දිනයක් බවට ප‍්‍රකාශයට පත්කරන අතර, එදිනට ලෝක කම්කරු දින වැඩසටහන් සඳහා එක්වන ලෙස තමා සියලු දේශපාලන පක්ෂ සහ වෘත්තීය සමිති වෙත ආරාධනා කරන බව ද ජනාධිපති මෛත්‍රීපාල සිරිසේන ප්‍රකාශ කරයි.
ශ‍්‍රී ලංකා අමරපුර මහා සංඝ සභාවේ අභිනව සභාපති ධූරයෙන් පිදුම් ලද ශ‍්‍රී ලංකා අමරපුර මහා නිකායේ චූලගණ්ඨි පාර්ශ්වයේ මහානායක ශාස්ත‍්‍රපති අතිපූජ්‍ය ගන්තුනේ අස්සජි ස්වාමින් වහන්සේ වෙත අක්ත පත‍්‍ර පිළිගැන්වීම වෙනුවෙන් 27 අඟහරුවාදා පැවති උත්සවය එක් වෙමින් ජනපති මේ බව සඳහන් කළේය.
පෝය දවසේ ටියුෂන්
පසළොස්වක පොහෝ දින පෞද්ගලික පංති පැවැත්වීම පිළිබඳ මහා සංඝරත්නයෙන් කෙරෙන දීර්ඝ කාලීන ඉල්ලීම පිළිබඳව ද මෙහිදී සිහිපත් කළ ජනාධිපති මෛත්‍රීපාල සිරිසේන ඒ පිළිබඳ ඉදිරියේදී දැඩි අවධානයක් යොමු කරමින් නිසි වැඩපිළිවෙළක් ක්‍රියාත්මක කිරීමට අපේක්ෂා කරන බව ප්‍රකාශ කර තිබේ.
එහිදී අදාළ පෞද්ගලික පංති පවත්වාගෙන යනු ලබන ආයතන වලින් ඉල්ලීමක් සිදු කිරීමට මෙන්ම සුදුසු ව්‍යවස්ථාපිත තත්ත්වයක් සකස් කිරීමට ද බලාපොරොත්තුවන බව ජනපති වැඩි දුරටත් කියා සිටියේය.
Facebook Comments
