ශ්‍රී ලංකාවේ අධිකරණයේ ඉහලම ධුරය සඳහා ජනාධිපතිවරයා විසින් ඉදිරිපත් කරන ලද ජ්‍යෙෂ්ඨත්වයෙන් පහල ඉන්නා විනිසුරුවරයකුගේ නාම යෝජනාවට ආණ්ඩුක්‍රම ව්‍යවස්ථා සභාවේ අනුමැතිය ලැබී තිබේ.
විනිසුරු ප්‍රියසාද් ඩෙප් 12 සිකුරාදා විශ්‍රාම යාමත් සමග පුරප්පාඩු වන අග්‍ර විනිශ්චය කාර ධුරය සඳහා ජනාධිපති මෛත්රිපාල සිරිසේන විසින් නම් කොට ඇත්තේ ශ්‍රේෂ්ඨාධිකරණ විනිසුරු එච් නලින් ජයලත් පෙරේරාය.
ශ්‍රී ලංකාවේ 46 වැනි අග විනිසුරු ලෙසින් නලින් ජයලත් පෙරේරා 12 සිකුරාදා ජනාධිපතිවරයා ඉදිරියේ දිවුරුම් දුන්නේය.
අගවිනිසුරු වශයෙන් පත් කිරීමට ව්‍යවස්ථා සභාවට නම් කර යවන ලද්දේ අධිකරණ සේවයේ ජ්‍යෙෂ්ඨත්වය අනුව ඉහළින්ම සිටින විනිසුරුවරයා බව ජනාධිපතිවරයා ප්‍රකාශ කරයි.
අධිකරණයේ සේවා ජ්‍යෙෂ්ඨත්වය සළකා අගවිනිසුරු පත් කරනු ලැබුයේ තිස් අවුරුද්දකට පසුව යැයි බත්තරමුල්ල අපේ ගම පරිශ‍්‍රයේ පැවැති වන නිලධාරින් 310 කට පත්වීම් ප‍්‍රදානය කිරීමේ උත්සවයකට සහභාගි වෙමින් ජනාධිපති මෛත්රිපාල සිරිසේන පවසා ඇත.
පුරප්පාඩු වී ඇති අගවිනිසුරු ධූරය පත් කිරීම පිළිබඳව සලකා බැලූ කථානායකතුමාගේ ප්‍රධානත්වයෙන් පාර්ලිමේන්තුවේ රැස් වූ ආණ්ඩුක්‍රම ව්‍යවස්ථා සභාව ජනපති යෝජනාව අනුමත කර තිබේ.
“ඒ සඳහා ගරු ජනාධිපතිතුමා විසින් යොමු කරන ලද නාම යෝජනාවට ආණ්ඩුක්‍රම ව්‍යවස්ථා සභාවේ අනුමැතිය හිමි විය. ඒ අනූව, අදාල පත් කිරිම සඳහා ගරු ජනාධිපති තුමා වෙත සිය නිගමනය දන්වා යැවීමට ආණ්ඩුක්‍රම ව්‍යවස්ථා සභාව කටයුතු කරන ලදී,” යි කතානායක මාධ්‍ය ඒකකය විසින් නිකුත් කරන ලද නිවේදනයක දැක්වේ.
කෙසේ වෙතත්, ජනාධිපතිවරයා විසින් නම් කර ඇත්තේ ජ්‍යෙෂ්ඨත්වයෙන් පස් වැනි තැන ඉන්නා විනිසුරුවරයෙකි.
දැනට ජ්‍යෙෂ්ඨතම ශ්‍රේෂ්ඨාධිකරණ විනිසුරුවරිය ඊවා වනසුන්දරය. බුවනෙක අලුවිහාරේ, සිසිර ද ආබෘ සහ ප්‍රියන්ත ජයවර්ධන ඊළඟට ඉන්නා විනිසුරන්ය.
හිටපු ජනාධිපති මහින්ද රාජපක්ෂ විසින් අභියාචනාධිකරණ විනිසුරු වරයකු ලෙස පත් කරන ලද 64 හැවිරිදි නලින් පෙරේරා 2016 දී වර්තමාන ජනාධිපතිවරයා විසින් ශ්‍රේෂ්ඨාධිකරණයට ඔසොවා තබන ලද්දෙකි.
Facebook Comments
