රට තුළ සංහිඳියාව ගොඩනැගීමට සහ ප‍්‍රජාතන්ත‍්‍රවාදී සංශෝධන වෙනුවෙන් ජනාධිපති මෛත්‍රිපාල සිරිසේන ගත් පියවර වල ප‍්‍රතිඵල අතිශයින් ප‍්‍රශංසනීය බව එක්සත් ජනපදයේ වැඩබලන සහකාර රාජ්‍ය ලේකම් ඇලිස් වෙල්ස් පවසයි.
නොයෙකුත් විවේචන සහ අභියෝග හමුවේ ජනාධිපතිවරයා ගෙන ඇති එම ඓතිහාසික පියවර සාර්ථකත්වය උදෙසා එක්සත් ජනපදයේ අඛණ්ඩ සහය ලබාදෙන බව 30 බදාදා ජනාධිපති නිල නිවසේදී ජනාපති හමු වූ එක්සත් ජනපදයේ වැඩබලන සහකාර රාජ්‍ය ලේකම්වරිය ප‍්‍රකාශ කල බව ජනාධිපති මාධ්‍ය ඒකකය කියා සිටියි.
යුක්තිය හා සාධාරණත්වය, වාර්ගික සහජීවනය, ව්‍යවස්ථා සංශෝධනය, සාමයේ ස්ථාවරත්වය යනාදී සෑම ක්ෂේත‍්‍රයක් තුළම මේ වන විට ශ්‍රී ලංකාව ප‍්‍රගතියක් ලබා ඇති බව ඇමරිකාව විශ්වාස කරන බව ද ඇලිස් වෙල්ස් මෙහිදී සඳහන් කර ඇත.
හෙමින් යන සාර්ථක ගමන
සංහිඳියා වැඩපිළිවෙළ ඉදිරියට ගෙනයාමේදී නොයෙකුත් බාධක තිබෙන බව ලේකම්වරියට පෙන්වා දී ඇති ජනපති මෛත්‍රීපාල සිරිසේන දේශපාලන වශයෙන් අයුතු වාසි ලබාගැනීම සඳහා ඇතැම් අන්තවාදී කොටස් සංහිඳියා වැඩපිළිවෙළට බාධා කරමින් සිටින නමුත් තම ඉදිරි ගමන් මාර්ගය වෙනස් නොකරන බව ද ජනාධිපතිවරයා අවධාරණය කළේය.
සංහිඳියා වැඩපිළිවෙළේ ප‍්‍රතිඵල වේගවත් නොවුව ද එය ස්ථීර අරමුණක් කරා සෙමෙන් නමුත් සාර්ථකව ඉදිරියට යන ගමනක් බවයි ජනාධිපතිවරයා මෙහිදී අවධාරණය කර ඇත්තේ.
පසුගියදා දකුණු ආසියාව සහ ශාන්තිකර කලාපය සඳහා වූ ඇමරිකාවේ නව ක‍්‍රමෝපාය වැඩසටහන සම්පාදනය කිරීමට අනුමැතිය ලබාදුන් බව ප‍්‍රකාශ කළ එක්සත් ජනපද වැඩබලන සහකාර රාජ්‍ය ලේකම්වරිය ඒ යටතේ ද ශ්‍රී ලංකාව වැදගත් හවුල්කරුවෙකු ලෙස එක්සත් ජනපදය සළකන බව සඳහන් කර ඇත.
ඇමරිකානු විදේශ ආධාර ආයතනය වන සහශ‍්‍ර අභියෝග සහ සංස්ථා වැඩසටහන යටතේ නුදුරේදීම ශ්‍රී ලංකාවට ලබාදෙන ආධාර ඉහළ නැංවීමට කටයුතු කරන බව ද ඇලිස් වෙල්ස් වැඩි දුරටත් ප‍්‍රකාශ කළාය.
Facebook Comments
