ජාතික ප්‍රශ්න විසඳා ගැනීමට හැකි තරම් ආකාරයෙන් වත්මන් අගමැතිවරයා ක්‍රියාත්මත කරවා ගැනීමට ස්වයං තීරණ අයිතිය වෙනුවෙන් සටන් වදින වාමාංශික නායකයකු උත්සාහ කරමින් සිටී.
තමන් රනිල් වික්‍රමසිංහ අගමැතිවරයා හා සමීපව කටයුතු කරන්නේ ඒ සඳහා බව පවසන නව සම සමාජ පක්ෂ නායකයා ප්‍රජාතන්ත්‍රවාදය ඇති කිරීමට තමන් කරන ලද ඇතැම් යෝජනා අගමැතිවරයා විසින් ක්‍රියාවට නංවා ඇති බව කොළඹ පැවති මාධ්‍ය හමුවක දී කියා සිටියේය.
“වික්‍රමබාහු කරුණාරත්න කියන්නෙ කාටවත් නැමෙන්නෙ නැති කෙලින් නායකයෙක් කියලා තමයි කවුරුත් දන්නේ. ඒ දැන් මිනිස්සු කියනවා වික්‍රමබාහු රනිල්ට කඩේ යනවා කියලා මොකක්ද මේ ලෙංගතුකම?” යැයි මාධ්‍යවේදී චමිල්ක සම්පත් නැඟු පැනයකට පිළිතුරු දෙමින් “එයා මට කඩේ යනවා මිසක මම එයාට කඩේ යන්නෙ නෑ,” යි නසසප නායකයා පැවසීය.
“දෙමළ ජාතික ප්‍රශ්නය විසඳීම සඳහා සමානාත්මතාව, ස්ව පාලනය හා ස්වයං තීරණ අයිතිය ගැන කතා කරකර ඉන්න කොට මට පෙනුනා මේ වැඩපිලිවෙල ගෙනියන්න උදව් කර ගන්න පුලුවන් කෙනෙක් විදියට රනිල් වික්‍රමසිංහ මහත්තයා ඉන්නවා. මගේ වැඩේට කඩේ අරින්න පුලුවන් කෙනෙක් කියලා රනිල් වික්‍රමසිංහ මහත්තයා කියලා පෙනුනා,” යනුවෙන් ආචාර්ය වික්‍රමබාහු කරුණාරත්න සඳහන් කළේය.
ප්‍රජාතන්ත්‍රවාදය සඳහා අගමැති රනිල් වික්‍රමසිංහ ඉදිරිපත් කරන හොඳ වැඩ සඳහා සිය සහාය ලබා දෙන බව කී නසසප නායක වික්‍රමබාහු කරුණාරත්න තමන් ධනපති ක්‍රමය හෝ සුරාකෑම පිළිනොගන්නා බව ද වැඩි දුරටත් කියා සිටියේය.
Facebook Comments
