ජපානයේ රාජකීය කිරුළු අත්හැරීමට එරට අකිහිතෝ අධිරාජ්‍යයා සූදානමින් සිටින බව විදෙස් වාර්තා පවසයි.
තමාගේ මහළු බවත්, පිරිහුණු සෞඛය තත්වයත් හේතුවෙන් රටට ඉටුවිය යුතු සේවය නොපිරිහෙලා ඉටුකිරීමට අපහසු බැවින් මෙසේ කිරුළු අත්හැරීමට බලාපොරොත්තු වන බව අධිරාජ්‍යයා ප්‍රකාශ කර ඇත.
82 හැවිරිදි වියේ පසුවන අකිහිතෝ අධිරාජ්‍යයා එරට රූපවාහිනිය ඔස්සේ ජාතිය අමතමින් මෙම අදහස් දක්වා තිබේ.
අධිරාජ්‍යයාගේ මෙම ප්‍රකාශය සම්බන්ධයෙන් වඩාත් අවධානය යොමුකරමින්, ඒ සම්බන්ධයෙන් ගත හැකි පියවර ගැන ජපාන රජය සමග සාකච්ඡා කරන බව මෙම ප්‍රකාශයෙන් පසුව මාධ්‍ය වෙත අදහස් දැක්වූ අගමැති ෂින්සෝ අබේ පවසා සිටියේය.
හිරෝහිතෝ අධිරාජ්‍යයාගේ ඇවෑමෙන් පසුව ඔහුගේ පුතු ලෙස අකිහිතෝ වර්ෂ 1989 දී ජපානයේ කිරුළට හිමිකම් කී අතර, ඔහු මේ ආකාරයෙන් කිරුළ අත්හැරීමට ක්‍රියා කළහොත්, ඔහුගේ වැඩිමහලු පුත් නරුහිතෝ ඔටුන්නට හිමිකම් කියනු ඇති බව විදෙස් වාර්තා පවසයි.
ජපානයේ වත්මන් කිරුළ හිමි අකිහිතෝ අධිරාජයා සිය කිරුළ අත්හැරීමට කටයුතු කළහොත් වර්ෂ 1817 දී කොකාකු අධිරාජයාගෙන් පසු තමාගේ අභාවයට පෙර ඔටුන්නට සමුදුන් දෙවැනි ජපාන අධිරාජයා ලෙස අකිහිතෝ ඉතිහාසගත වනු ඇත.
Facebook Comments
