යුරෝපා සංගමයේ ඉහල පෙලේ දූත මණ්ඩලයක් ශ්‍රී ලංකා ආණ්ඩුවේ මානව හිමිකම් චර්යාව පිළිබදව විමර්ශනයක් ආරම්භ කළ දිනයේම ආයුධ සන්නද්ධව පැමිණි පිරිසක් නැගෙනහිර පළාතේ පුද්ගලයකු පැහැරගෙන ගොස් තිබේ.
සැප්තැම්බර් 28 වැනි අඟහරුවාදා උදෑසන හයට පමණ පැහැර ගෙන ගොස් ඇත්තේ හමුදා පුනරුත්ථාපනය යටතේ රඳවා තබාගෙන නිදහස් කර සිටි ත්‍රිකුණාමලයේ වරෝධ්‍යන් නගර් හි පදිංචි 39 හැවිරිදි මනෝහරදාස් සුභාෂ් බවයි ඥාතීන් පවසන්නේ.
ආයුද සන්නද්ධව සිවිල් ඇදුමින් පැමිණි දෙදෙනෙක් සිය සැමියා පැහැරගෙන ගිය අතර ඔවුන් කවුරුන්දැයි විමසු විට තමන් උප්පුවේලි පොලිසියේ යැයි පැවසු බව සුභාෂ්ගේ බිරිද මාධ්‍යවේදීන් සමග පවසා තිබේ.
පැහැරගැනීමට ලක්වු මනෝහරදාස් සුභාෂ්ගේ බිරිදත්, මවත් වහාම උප්පුවේලි පොලිසිය වෙත ගොස් ඒ සම්බන්ධයෙන් විමසු විට පොලිසිය පවසා ඇත්තේ ඒ සම්බන්ධයෙන් තමන් කිසිවක් නොදන්නා අතර තම පොලිස්ථානයේ කිසිවෙකුත් ඔහුව අත්අඩංගුවට ගැනීම සදහා ගොස් නොමැති බවයි.
අනතුරුව මනෝහරදාස් සුභාෂ්ගේ බිරිඳත්, මවත් ශ්‍රී ලංකා මානව හිමිකම් කොමිෂන් සභාවේ ත්‍රිකුණාමලය ප්‍රදේශිය කාර්යාලයට පැමිණිලි කර තිබේ.
“අපි එයාව ගෙනියන්න දුන්නේ නැති උනාම අපිට තුවක්කු දික්කරලා බලෙන් එයාව අරගෙන ගියා. අපි හේතුවක් ඇහුවාම කිව්වේ එයා ගැන තියෙන සැකයකට පරීක්ෂණයක් තියෙනවා, ඒක ඉවරවුනාම එවනවා කියලා,” යි පැමිණිලි කිරීමෙන් අනතුරුව සුභාෂ් මැතිනිය මාධ්‍යවේදීන්ට පවසා සිටියාය.
සුභාෂ්ගේ මව මාධ්‍යවේදීන්ට පැවසුවේ පැහැරගත්තවුන් නිල ඇඳුමින් නොසිටි නිසා ඔවුන් ත්‍රස්ත මර්දන පොලිසියේ යයි විශ්වාස කළ හැකි බවයි.
ත්‍රස්තවාදය වැළක්වීමේ පනත ක්‍රියාවේ යෙදවීම ඇතුළු මානව විරෝධී කටයුතු දිගටම සිදුකරන ශ්‍රී ලංකාවේ ආණ්ඩුවේ මානව හිමිකම් චර්යාව යුරෝපයට භාණ්ඩ අපනයනය සඳහා තව දුරටත් බදු සහන සලසා දීමට ගැලපෙන්නේදැයි විමර්ශනය කිරීම සඳහා ලංකාවට පැමිණ සිටින පංච පුද්ගල දුත මණ්ඩලය සිය විමර්ශනය අද දිනයේ ආරම්භ කර තිබුනි.
ඒ ත්‍රස්තවාදය වැළැක්වීමේ පනත ඉවත් කරගැනීම ඇතුළු මානව හිමිකම් ආරක්ෂා කිරීම සඳහා දී ඇති පොරොන්දු ඉටු නොකරන්නේ නම් ශ්‍රී ලංකාවට GSP + බදු සහනය මෙන්ම ත්‍රස්ත විරෝධී කටයුතු සඳහා ලබාදෙන ආධාරද ඉවත් කර ගැනීම ගැන සලකා බැලීමට යුරෝපා පාර්ලිමේන්තුව විසින් ජුනි මස මැදදි සම්මත කරගත් යෝජනාවේ ප්‍රතිඵලයක් වශයෙනි.
Facebook Comments
