දැඩි මතධාරි ඉස්ලාම් අන්තවාදීන්ගේ ක්‍රියාකාරකම් හේතුවෙන් මෙරට සාම්ප්‍රදායික මුස්ලිම් ප්‍රජාව භීතියට හා පීඩනයට පත්ව ඇති බව සුළුතර අයිතිවාසිකම් වෙනුවෙන් සටන් වදින වාමාංශික නායකයකු පෙන්වා දී තිබේ.
ඉස්ලාමීය රාජ්‍ය සංවිධානය (ISIS) විසින් මහම්මත් තුමන්ගේ දහම යටපත් කර වෙනත් අභිධර්මයක් ලෝකයට හඳුන්වා දීමට උත්සාහ කරන පිරිසක් ලෙසයි නව සම සමාජ පක්ෂ නායකයා විසින් හඳුන්වා දෙන ලද්දේ.
“ISIS කාරයෝ කියන්නේ මහම්මත් තුමාගේ ධර්මය යට කරලා වෙනත් අභිධර්මයක් හදාගෙන ලෝකය පුරා ගෙන යන සියුම් වැඩපිළිවෙලක්.” යැයි ආචාර්ය වික්‍රමබාහු කරුණාරත්න 09 බ්‍රහස්පතින්දා කොළඹ පැවති මාධ්‍ය හමුවක දී චෝදනා කළේය.
එම ධර්මය භයානක බවට අනතුරු ඇඟවු ආචාර්ය වික්‍රමබාහු “තමන්ගේ ජිවිතයම සහ දරු පවුල ඔක්කොම බිලි දීලා, පරිත්‍යගයක් කරලා ස්වර්ගයට යන්න පුලුවන් කියන ගමන උඩයි ඒ ගමන යන්නේ,” යැයි පැවසීය.
මිනිසුන්ගේ මොළය වහල් භාවය පත් කරමින් ලෝකය පුරා කොමියුන් පද්ධතියක් නිර්මාණය කිරීමට දැඩි මතධාරි ඉස්ලාම් භක්තිකයන් උත්සාහ දරන බවට ඔහු චෝදනා කළේය.
මෙම අභිධර්මය බෙදාහරින පිරිස් මුස්ලිම් වීම හේතුවෙන් මහම්මත් තුමන් අදහන මුස්ලිම් ප්‍රජාව පාවා නිරන්තර පරීක්ෂාවට ලක් වීම නිසාවෙන් ඔවුන් පිඩාවට පත් වී ඇති බව පෙන්වා දෙන නව සම සමාජ පක්ෂ නායකයා එබැවින් ISIS පිරිස් සහ සම්ප්‍රදායික මුස්ලිම් ප්‍රජාව වෙන් කර හඳුනා ගැනීමට යම් වැඩ පිළිවෙලක් අවශ්‍ය බව ද යෝජනා කළේය.
Facebook Comments
