අන්තවාදයෙන් අන්තවාදය පරාජය කළ නොහැකි බව සහ අන්තවාය හා ජාතිවාදය එකිනෙකට සේවය කරමින් වර්ධනය වන බව ජනතා විමුක්ති පෙමුණ පෙන්වා දී ඇත.
එබැවින් එය පරාජය කළ හැකි වන්නේ කිසිදු වර්ගයක ජාතික හෝ ආගමික හෝ අන්තවාදයක් වර්ධනය වීමට ඉඩකඩ ලබා නොදිමෙන් බව එම පෙරමුණේ නායක අනුර කුමාර දිසානායක මුස්ලිම් නායකයින් හමුවු අවස්ථාවේ ප්‍රකාශ කර තිබේ.
“එක් අන්තවාදයක් පරාජයට පත්කළ හැකි වන්නේ තව අන්තවාදයකින් නෙවෙයි. අන්තවාදයේ ස්වභාවයම තමයි එක් අන්තවාදයක් විසින් තවත් අන්තවාදයක් පොෂණය කරනවා. එක් ජාතිවාදයක් විසින් තව ජාතිවාදයක් පෝෂණය කරනවා. එක් ආගමික අන්තවාදයක් විසින් තව ආගමික අන්තවාදයක් පෝෂණය කරනවා. අන්තවාදය ජාතිවාදය කියලා කියන්නේ එකිනෙකාට සේවය කරමින් වර්ධනය වෙන එකක්.”
කවර වර්ගයේ අන්තවාදයක් හෝ පරාජයට පත් කළ හැකිවන්නේ ජාතික සමගියෙන් සහ හැමදෙනාගේම අයිතිය පිළිගැනීමෙන් පමණක් බව අවධාරණය කර ඇති ජවිපෙ නායකයා ජාතිවාදී ගැටුමක් රටේ දේශපාලකයන්ගේ පාපන්දුවක් බවට පත් නොකර ගත යුතු යැයි ප්‍රකාශ කර ඇත.
ජාතික සමගිය තමයි රටේ ජාතික ආරක්ෂාවේ මුල්ගල බව පෙන්වා දී ඇති අනුර කුමාර දිසානායක මන්ත්‍රීවරයා සමාජයේ බෙදී ඇත්නම් ගැටුම ඇතිවීම නාවතාලිය නොහැකි යැයි 08 බදාදා ජනතා විමුක්ති පෙරමුණ සහ මුස්ලිම් සංවිධාන කිහිපයක් අතර පැවති හමුවක දී පැවසීය.
මෙවැනි අන්තවාදී කොටස් මුස්ලිම් සමාජය තුළ සිටින බවට තමන් හඳුනාගෙන තිබුණද ඔවුන් මෙතරම් බලවත්වේවි යැයි හෝ මෙවැනි විනාශයක් සිදු කරාවි යැයි තමන් කිසි විටෙක නොසිතූ බව එම සාකච්ඡාවට එක්වූ මුස්ලිම් නායකයින් සඳහන් කළ බව ජවිපෙ සඳහන් කර තිබේ.
ජාතීන් අතර විරසකය නැතිකිරීම සඳහා ගතයුතු පිවරයන් ලෙස එම මුස්ලිම් නායකයින් අපේක්ෂා කරන පියවරයන් කවරේද යන්න පිළිබඳව ඉදිරියේදී ජනතා විමුක්ති පෙරමුණට ලියවිල්ලක් ඉදිරිපත් කිරීමටත් මෙම මුස්ලිම් නායකයින් එහිදී එකඟ වී ඇත.
සමස්ත ලංකා ජමියතුල් උලමා සංවිධානය, ශ්‍රී ලංකා මුස්ලිම් කවුන්සිලය, යන්ග් මුස්ලිම් මෙන් ඇසෝසියේෂන්, ශ්‍රී ලංකා ජමාතේ ඉස්ලාම් සංවිධානය, මුස්ලිම් නීතිඥයින්ගේ සංවිධානය, මුස්ලිම් වියතුන්ගේ සභාව, ජාතික සූරා සභාව ඇතුළු සංවිධාන නියෝජනය කරමින් මුස්ලිම් නායකයින් රැසක් මෙම සාකච්ඡාවට සහභාගි වී සිටියහ.
Facebook Comments
