තම සිතැඟි පරිදි ජනාධිපතිවරයා විසින් බොදුබල සේනා නායකයා නිදහස් කර හැරීමට ව්‍යවස්ථාදායක සභාව විරෝධය පළ නොකිරීම මානව හිමිකම් ක්‍රියාධාරිනියකගේ දැඩි දෝෂ දර්ශනයට ලක්ව තිබේ.
“මම දැක්කෙ නැහැ ව්‍යවස්ථාදායකයේ කිසිම පක්ෂයක් TNA එක හැර වෙන කිසිම පක්ෂයක් කතා කරනවා,” යැයි ජනාධිපතිවරයාගේ ක්‍රියාවට විරෝධය පළ කල දෙමළ ජාතික සන්ධානය සන්ධ්‍යා එක්නැළිගොඩගේ ප්‍රශංසාවට ලක් විය.
අධිකරණයට අපහාස කිරිමේ වරදට හය අවුරුද්දක සිර ගත කොට බොදුබල සේනා නායක ගලබොඩඇත්තේ ඥනසාර හිමියන් නිදහස් කර යැවීම ජනාධිපතිවරයා විසින් අධිකරණයේ ගෞරවය විනාශ කර දැමීමක් ලෙස පෙන්වා දෙන ඇය “ව්‍යවස්ථාදායකයෙත් වගකීම වෙන්නේ අධිකරණයේ ගෞරවය රැකීම,” යැයි පවසන්නීය.
ජනාධිපතිවරයාගේ ක්‍රියාවට එරෙහිව අධිකරණයේ විනිසුරන් හෝ නීතිඥවරුන් මැදිහත් වන බවක් දැක ගන්නට නැති බව පවසන සන්ධ්‍යා එක්නැළිගොඩ අධිකරණයේ ගෞරවය ආරක්ෂා කර පුරවැසියන්ට නීතියේ අධිපත්‍ය පිළිබඳව විශ්වාසය ඇති කරන ලෙස ඉල්ලා සිටියාය.
ජාතිවාදයට හා ආගම්වාදයට මුවාවී අධිකරණයේ ගෞරවය විනාශ කිරීම නතර කිරීමට මැදිහත් වන ලෙසට ජනධිපති අගමැති ප්‍රමුඛ මැති ඇමැතිවරුන්ගෙන් සන්ධ්‍යා එක්නැළිගොඩ වැඩි දුරටත් ඉල්ලීමක් කළාය.
Facebook Comments
