රටවල් හයක රාජත්‍රාන්ත්‍රික ධුර සඳහා නම් කර ඇති පුද්ගලයන් සම්බන්ධයෙන් විරෝධතා ඉදිරිපත් කිරීමට මහජනතාවට අවස්ථාවක් සලසා දී තිබේ.
එම විරෝධතා සැප්තැම්බර් 23 වන දින හෝ එදිනට පෙර උසස් නිලතල පිළිබඳ පාර්ලිමේන්තු කාරක සභාව වෙත ලිඛිතව දැනුම් දෙන ලෙස පාර්ලිමේන්තු මහලේකම් වරයා නිකුත් කළ නිවේදනයක දැක්වේ.
ඉස්ලාමීය ඇෆ්ගනිස්ථාන ජනරජයේ ශ්‍රී ලංකා තානාපති ලෙස විශ්‍රාමික අද්මිරාල් කේ.කේ.වී.පී හරිශ්චන්ද්‍ර ද සිල්වා, ජපානයේ ශ්‍රී ලංකා තානාපති ලෙස සංජීව් ගුණසේකර, අමෙරිකා එක්සත් ජනපදයේ ශ්‍රී ලංකා තානාපති ලෙස රවිනාථ ආර්යසිංහ, ප්‍රංශ ජනරජයේ ශ්‍රී ලංකා තානාපති ලෙස මහාචාර්ය ශානිකා හිරිබුරේගම, චීනයේ ශ්‍රී ලංකා තානාපති ලෙස ආචාර්ය පාලිත කොහොන හා ඉන්දියානු ජන රජයේ ශ්‍රී ලංකා මහ කොමසාරිස් ලෙස අසෝක මිලින්ද මොරගොඩ නම් කර තිබේ.
මෙම නව රාජතාන්ත්‍රිකයන් පත් කිරිමට අදාළව උසස් නිලතල පිළිබඳ පාර්ලිමේන්තු කාරක සභාවේ ඇනුමැතිය හිමි වූ වහාම ඔවුන් අදාළ තනතුරුවල රාජකාරි කටයුතු ආරම්භ කිරිමට නියමිතය.
සිංහල ඩයස්පෝරා විරෝධය
ඉන්දියාවේ ශ්‍රී ලංකා මහ කොමසාරිස් ලෙස මිලින්ද මොරගොඩ නම් කිරීමට පෙරම සිංහල ඩයස්පෝරා සංවිධානයක් ජනාධිපතිවරයාගෙන් සහ විදේස කටයුතු අමාත්‍යවරයාගෙන් ඉල්ලා තිබුනේ ඉන්දියාවේ ශ්‍රී ලංකා මහ කොමසාරිස් පදවිය සදහා හිටපු අමාත්‍යවරයකු වන මිලින්ද මොරගොඩ පත් නොකරන ලෙසයි.
ජාතියේ උපායමාර්ගික වැදගත්කම් සහිත තනතුරු සදහා උචිත උදවිය නම් කිරීමේ ජනාධිපති සතු පරම අයිතියට ගරුකරන අතරම, ඉංදියාවේ තානාපති ලෙස මිලින්ද මොරගොඩ වැනි පුද්ගලයෙකු පත් කිරීම ජාතියේ යහපතට විරුද්ධ ප්‍රතිඵල ලගා කර දෙන්නක් බවට ශ්‍රී ලංකාවේ සාමය එක්සත්කම හා මානව හිමිකම් සදහා සංසදය අනතුරු අගවා තිබුනි.
ජනපතිගේ ස්ථාවරය
තමන් කරන පත්වීමකට විරුද්ධව එය වෙනස් කරන ලෙස බලපෑම් නොකරන්නැයි විශේෂ ඉල්ලීමක් කළ ජනාධිපතිවරයා පසුගියදා අවධාරණය කර තිබුනේ පත්වීම් කරනු ලබන්නේ “ගැඹුරින් සිතා බලා” බවයි.
එහිදී “ජාති හිතෛෂිබව” සුදුසු කමක් ලෙස සැලකිල්ලට ගෙන තිබේ.
“තඩි ප්‍රියන්ත” නැවතුනු හැටි
වර්තමාන ආණ්ඩුවේ මුල්ම එක්සත් ජාතීන්ගේ නිත්‍ය නියෝජිත ලෙස නම්කර තිබූ සී ඒ චන්ද්‍රප්‍රේම ජිනීවා නුවර යාම පසුගිය පෙබරවාරියේ අත්හිටුවා තිබුනි.
අසුව දශකය අගභාගයේ අතුරුදහන් කිරීම් සහ මිනීමැරීම් සම්බන්ධයෙන් චෝදනා ලබන ප්‍රා සංවිධානයේ නායකයකු වන “තඩි ප්‍රියන්ත” ලෙසින් ප්‍රසිද්ධ වර්තමාන ජනාධිපතිවරයාගේ නිල ජීවිත රචකයා වන මාධ්‍යවේදී චන්ද්‍රප්‍රේම ජිනීවා තානාපති ධුරය සඳහා තම සුදුසුකම් ඔප්පු කළ යුතු පාර්ලිමේන්තු කමිටුවට දෙවතාවක්ම කැඳවා තිබුණද ඊට සහභාගි නොවූ බව සන්ඩේ ටයිම්ස් පුවත්පත වාර්තා කර තිබේ.
උසස් නිලතල පිළිබඳ කාරක සභාව
නව වැනි පාර්ලිමේන්තුවේ පළමුවන සැසිවාරය සඳහා පත්කළ සාමාජිකයන් 18 දෙනකුගෙන් සමන්විත උසස් නිලතල පිළිබඳ කාරක සභාව කථානායක මහින්ද යාපා අබේවර්ධන විසින් සැප්තැම්බර් 8 අඟහරුවාදා නිවේදනය කර තිබුනි.
එහි සාමාජිකයන් ලෙස චමල් රාජපක්ෂ, නිමල් සිරිපාල ද සිල්වා, දිනේෂ් ගුණවර්ධන, ජොන්ස්ටන් ප්‍රනාන්දු, ඩග්ලස් දේවානන්ද, බන්දුල ගුණවර්ධන, කෙහෙලිය රඹුක්වැල්ල, උදය ගම්මන්පිල, රමේශ් පතිරණ, සුදර්ශනී ප්‍රනාන්දුපුල්ලේ, විදුර වික‍්‍රමනායක, ජෝන් සෙනෙවිරත්න, අනුර ප්‍රියදර්ශන, යාපා විජිත හේරත්, රිෂාඩ් බදියුදීන්, තලතා අතුකෝරාල, ෆීල්ඩ් මාෂල් සරත් ෆොන්සේකා යන පාර්ලිමේන්තු නියෝජිතයන් ස්ථාවර නියෝග 124 අනුව පත්කර තිබේ.
Facebook Comments
