බුද්ධී අංශ සුදු වෑන් මෙහෙයවු බව ගෝඨා පිළිගනී

0
ඡායා -රොෂාන් චතුරංග

පුද්ගලයන් පැහැරගැනීම සඳහා රජයේ ඔත්තු සේවා විසින් සුදුවෑන් යොදාගන්නා ලද බව රාජපක්ෂ පාලනයේ ආරක්ෂක ලේකම් වරයා විසින් පිළිගෙන තිබේ.

තමන් බලයේ සිටි සමයේ සිදුවූ මාධ්‍යවේදීන්ට එරෙහි මාරාන්තික ප්‍රහාර සම්බන්ධයෙන් වගකිවයුත්තන් පිළිබඳ දැන සිටියත් ඒ සම්බන්ධයෙන් පරීක්ෂණ නොපැවැත්වූ බව ඔහු විසින් හෙළිකර තිබේ.

රජයේ ඔත්තු සේවා මගින් ‘ප්‍රශ්න කිරීම සඳහා’ ඇතැම් පුද්ගලයන් අත් අඩංගුවට ගැනීමට සුදු වෑන් භාවිතා කළ බව හිටපු ආරක්ෂක ලේකම් ගෝඨාභය රාජපක්ෂ ඩේලි මීරර් පුවත්පතේ සම්මුඛ සාකච්ඡාවකට එක් වෙමින් ප්‍රකාශ කර ඇත.

“සැකකරුවකු ප්‍රශ්න කිරීම සඳහා අත්අඩංගුවට ගන්නේ ඒ වගේ ක්‍රම හරහා.” යි ගෝඨාභය රාජපක්ෂ පවසා තිබේ.

රාජපක්ෂ ආණ්ඩුව යටතේ අතුරුදහන්වූ බොහෝ දෙනකු සුදු පැහැති වෑන් රථ මගින් පැහැරගෙන යනු ලැබූ බවට ජාතික හා ජාත්‍යන්තර මානව හිමිකම් කණ්ඩායම් දීර්ඝ කාලයක් තිස්සේ චෝදනා එල්ල කළහ.

“ඒක මම හඳුන්වලා දුන්න දෙයක් නෙවෙයි. මේ ක්‍රමවේදයන් ලෝකය පුරාම යොදාගෙන තියෙනවා. අපේ ඔත්තු සේවාත් සුදු පාට හයි ඒස් වෑන් රථ පාවිච්චි කරන්න ඇති. මම ඒක හඳුන්වලා දුන්නේ නැහැ. කලින් ආණ්ඩු යටතේත් ඒ දේවල් සිද්ධවුණා. ජේවීපී කාලයේ ප්‍රචණ්ඩ ක්‍රියා ගත්තත්, ඉතාම තරුණ අයට හැරෙන්න, අනික් හැම හැමකෙනෙක්ම දන්නවා තරුණයන්ව පැහැරගෙන ගියේ කොහොමද කියලා.”

හිටපු ආරක්ෂක ලේකම් ඔවුන්ගේ ගරිල්ලා සටන් ක්‍රමයට ප්‍රතිප්‍රහාර දීමේදී “සාමාන්‍ය ක්‍රමය” අතහැරදැමූ බව කියා සිටියේය.

ලසන්ත සහ ප්‍රගීත්

යුදසමයේ කොළඹ තදාසන්නයේ මහමග මරා දමනු ලැබූ ලසන්ත වික්‍රමතුංග සහ පැහැරගෙන ගොස් වධදෙනු ලැබූ කීත් නොයාර් මාධ්‍යවේදීන්ට සිදුකළ අපරාධ සම්බන්ධයෙන් ඔත්තු සේවා නිලධාරීන්ට චෝදනා එල්ල වීම ගැන ඩේලි මිරර් මාධ්‍යවේදී කැලුම් බණ්ඩාර සිය සම්මුඛ සාකච්ඡාවේදී විශේෂයෙන් විමසා තිබුනි.

මාධ්‍යකරුවන්ට එරෙහිව එල්ල කළ ප්‍රහාරවලට සම්බන්ධ පුද්ගලයන් හිටපු ආරක්ෂක ලේකම්වරයා දැන සිටියද, ඒ සම්බන්ධයෙන් පරීක්ෂණ කිරීම සඳහා පොලිසිය හෝ ඔත්තු සේවා නොයෙදු බව හිටපු ආරක්ෂ ලේකම්වරයා පිළිගෙන තිබේ.

“අපි ප්‍රගීත් එක්නැලිගොඩ කියන පුද්ගලයාගේ අතුරුදහන්වීම ඇතුළු මේ කියන කිසිම දෙයකට සම්බන්ධ නැහැ. ඒ වගේ දේවල් කරන්න අපිට අවශ්‍ය වුණේ නැහැ. මේවා තනිකරම පුද්ගලික හේතුවලට එක්තරා පුද්ගලයන් දෙදෙනෙක් විසින් කරපු දේවල්. ඒ අය නම් කරන්න මට අවශ්‍ය නැහැ. ලසන්ත වික්‍රමතුංග ඝාතනය කළ වෙලාවේ, හිටපු විපක්ෂ නායක රනිල් වික්‍රමසිංහයි, හිටපු මන්ත්‍රී ජෝසප් මයිකල් ප්‍රනාන්දුයි පාර්ලිමේන්තුවේදී කිව්වා ඒ ඝාතනය කළේ ඒ කාලයේ හිටපු හමුදාපතිවරයා කියලා.”

සියල්ල තමන් පිට පැටවීම එක්සත් ජාතික පක්ෂයේ මුලිකත්වයෙන් ගෙන යන ප්‍රචාරයක් බවටයි ගෝඨාබය රාජපක්ෂ චෝදනා කරන්නේ.

“යුද්ධයක් යනකොට අපි සම්පූර්ණයෙන්ම අවධානය යොමුකරන්නේ ඒකටයි. ඒක ඇත්ත. ඒ වගේ තත්ත්වයක් යටතේ යුද්ධය නවත්වලා වෙනත් විවිධ විමර්ශන කරන්න සම්පූර්ණයෙන්ම කැපවෙන්න අපිට බැහැ. රහස් පොලිසියට සහ ඔත්තු සේවාවලට පැවරුණු කාර්යයක් තිබුණා. රට පුරා බෝම්බ පුපුරනකොට, ත්‍රස්තවාදීන් විසින් හැමතැනකම ඝාතන සිදුකරනකොට ඒව මැඩලන්න සම්පත් යොදවන්න අපිට සිද්ධ වුණා. ඒක තමයි යථාර්ථය”යි රාජපක්ෂ ප්‍රකාශ කර තිබේ.

යුද සමයේත්ඉන් පසුවත් ශ්‍රී ලංකාවේ දකුණු පළාතේ මාධ්‍යවේදීන් ඇතුළු කිහිප දෙනකු පැහැර ගැනීම්,වධ දීම් සහ ඝාතන සම්බන්ධයෙන් සිදු කරන ලද පොලිස් පරීක්ෂණ වලින් චූදිතයන් ලෙස නම්කර ඇති බහුතරයක් යුද හමුදා බුද්ධි අංශ නිලධාරීන්ය.

Facebook Comments

wedding people