පාතාල කල්ලි නායකයෙකු හා මත්ද්‍රව්‍ය ඡාවාරම්කරුවෙකු ලෙස නම් කර ඇති මාකඳුරේ මධුෂ් ඇතුළු පිරිස අත්අඩංගුවට ගැනීමට ශ්‍රී ලංකා ආරක්ෂක අංශ වල සම්බන්ධයක් නැති බව හෙළිව තිබේ.
එම පිරිස අත්අඩංගුවට ගෙන ඇත්තේ ඩුබායි පොලිසිය විසින් දියත් කරන ලද මෙහෙයුමකට අනුව බව හා එම පිරිස අතර රාජතාන්ත්‍රික ගමන් බලපත්‍රයක් හිමි තැනැත්තෙකු සිටින බවට පල වු මාධ්‍ය වාර්තා ද අසත්‍ය බවයි වාර්තා වන්නේ.
මාකඳුරේ මධුෂ් ඇතුළු පිරිස අත්අඩංගුවට ගැනීම මෙරට ආරක්ෂ අංශ ද එක්ව කල මෙහෙයුමක් බවත් ඒ අතර රාජතාන්ත්‍රික ගමන් බලපත්‍රයක් හිමි තැනැත්තෙකු ද සිටින බව මෙරට මාධ්‍ය වාර්තා කර තිබුණි.
විශාල අපරාධ සම්බන්ධ වලට පුද්ගලයෙකු අත්අඩංගුවට ගත් පසු පොලිස් මාධ්‍ය ප්‍රකාශකවරයා විසින් මාධ්‍ය හමුවක් පැවැත්වීම සාමාන්‍ය පිළිවෙත වුවත් අපරාධ රැසකට සම්බන්ධ බවට සැක කරන හා මෙරට මත්ද්‍රව්‍ය ඡාවාරමේ ප්‍රධානියා ලෙස ආරක්ෂක අංශ විසින් නම් කර ඇති මාකඳුරේ මධුෂ් ඇල්ලීම සම්බන්ධ පොලිස් මාධ්‍ය ප්‍රකාශවරයා නිල නිවේදනයක් නිකුත් නොකිරීම විශේෂත්වයකි.
මාකඳුරේ මධුෂ් අත්අඩංගුවට ගත් දිනට පසුදා ඒ සම්බන්ධව මාධ්‍ය හමුවක් කැඳවා තිබුණද එය ද අවසාන මොහොතේ අවලංගු කරන ලදී.
ඩුබායි හිදී අත්අඩංගුවට ගත් පාතාල කල්ලි සාමාජිකයින් මෙරටට ගෙන්වා ගැනීම ද ගැටලු සහගත වී ඇති බවටයි පොලිස් මුලස්ථාන ආරංචි මාර්ග පවසන්නේ.
Facebook Comments
