පාර්ලිමේන්තු පනතක් මගින් තහනම් කර තිබියදීත්, ඉන්දීය ට්‍රෝලර් යාත්‍රා යොදා ගනිමින් ලංකා මුහුදේ මසුන් ඇල්ලීම සිදුවන්නේ මුදල් අල්ලස් මත බවට විපක්‍ෂ මන්ත්‍රීවරයෙකු අනාවරණය කර තිබේ.
ට්‍රෝලර් බෝට්ටු යොදා ගනිමින් මෙරට මුහුදට ඇතුල් වන ඉන්දීය ධීවරයන් මුහුදු සම්පත් විනාශ කරමින්, තමන්ට එල්ල කරන තර්ජනයට එරෙහිව ආණ්ඩුව කිසිදු පියවරක් නොගැනීමට විරෝධය පාමින් ඔක්තෝබර් 17 වැනිදා උතුරේ ධීවර සංගම් එක්ව විරෝධය දැක්විය.
මුලතිව් සිට පේදුරු තුඩුව දක්වා බෝට්ටු පෙළපාලියකින් ගිය ධීවරයෝ අවසානයේදී ජන හමුවක් පැවැත්වූහ.
“ඉන්දීය ආණ්ඩුවයි ලංකාවේ ආණ්ඩුවයි එකතුවෙලා ලංකා මුහුදේ ට්‍රෝලර් යොදා ගෙන ධිවර කටයුතු කරන්න ඉන්දීය ධීවරයන්ට තහනම් කළා, ඒ 2016 අවුරුද්දේ මංගල සමරවීර විදේශ ඇමැති විදිහටත්, මහින්ද අමරවීර ධීවර ඇමැති විදිහටත් ඉන්දියාවට ගිහින් කතා බහ කළාට පස්සේ ඒකාබද්ධ නිවේදනයකින් ඒ ගැන කීවා“ යැයි උතුරු නැගෙනහිර ධිවර -ගොවි විරෝධතා දෙදින සංවිධානයට මුල්වූ දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ. සුමන්දිරන් ජන හමුවට එක් වෙමින් පැවසීය.
ලංකා මුහුදු සීමාවට අනවසරයෙන් ඇතුල්වන ඉන්දීය ධීවරයන් මැඩලීමටත්, ට්‍රෝලර් ඇතුළු තහනම් ආම්පන්න භාවිතය වැලැක්වීමටත් සුමන්තිරන් මන්ත්‍රීවරයා විසින් ගෙන එන ලැබූ පෞද්ගලික මන්ත්‍රී යෝජනාවක් ආණ්ඩුවේ පනතක් ලෙස ඉදිරිපත් කරමින් 2017 වසරේදී පාර්ලිමේන්තුවේ සම්මත වී තිබේ.
එම පනතට අනුව ලංකා මුහුදේ ට්‍රෝලර් යාත්‍රා මගින් මසුන් මැරීම ඇතුළු අනෙකුත් අනවසර ක්‍රියා දඩුවම් ලැබිය යුතු වරදක් බැවින්,ඒ ගැන ඉන්දීය විදේශ අමාත්‍යංශය විසින් ඉන්දීය ධීවරයන්ට අනතුරු අඟවා තිබු බව සුමන්දිරන් මන්ත්‍රීවරයා අවධාරණය කළේය.
“ඒ පනත තවමත් වලංගුයි, අවුරුදු දෙකක් ඉන්දීය ට්‍රෝලර් යාත්‍රා අපේ මුහුදට ආවේ නැහැ, අපේ රටෙත් ට්‍රෝලර් යාත්‍රා වැහිවැහැලා, මේ ට්‍රෝලර් යාත්‍රාවලට එරෙහි සටන කියන්නේ අපේ අනාගත පරම්පරාවට මුහුදු සම්පත ආරක්ෂා කර දීමක්, මොකද මේ ට්‍රෝලර් මුහුදු පතුලේ ඉඳන්ම සම්පත් විනාශ කරනවා“ යැයි ද සුමන්දිරන් පවසයි.
පසුගිය කාලය පුරාම ඉන්දීය ධීවරයන්ගෙන් එල්ල වන තර්ජන ගැන ධීවර ඇමැතිවරයා දැනුවත් කළ ද ඊට එරෙහිව පියවර ගැනීමට කටයුතු නොකළ බවට උතුරු නැගෙනහිර ධීවරයෝ චෝදනා කරති.
මත්ද්‍රව්‍ය ඇතුළු නීති විරෝධී දෑ මෙරටට රැගෙන එන ජාවාරම්කරුවන් අල්ලා ගැනීමට සමත් වුවද, අනවසරයෙන් ලංකා මුහුදට ඇතුල් වන ඉන්දීය ධීවරයන් මැඩලීමට පියවර නොගන්නා බවට නාවික හමුදාවට ද විවේචන එල්ල වී තිබේ.
“ලංකාවේ ආණ්ඩුවේ ධීවර ඇමතිවරයා මේ ට්‍රෝලර් තහනම් කරන්න පියවර ගන්නේ නැහැ. අපිට ආරංචි විදිහට මේ නීති විරෝධී ට්‍රෝලර් යාත්‍රා වලින් දවසකට රුපියල් 5000ක් ගන්නවා කියලා, මේ වගේ හොර වැඩ කරන්න එපා. අපේ ධීවරයන් වෙනුවෙන් පනත ක්‍රියාත්මක කරන්න,“ යැයි ද මන්ත්‍රීවරයා ඉල්ලා සිටියේය.
ඉන්දීය ධීවරයන් මෙරට මුහුදු සීමාව ආක්‍රමණය කරමින්, මුහුදු සම්පත් විනාශ කිරීම නවතා ලීමට වහා පියවර ගන්නා ලෙස ඉල්ලා ධීවර සංගම් නියෝජිතයන් අත්සනින් යුත් සංදේශයක් කොළඹ සහ යාපනේ පිහිටි ඉන්දියානු මහ කොමසාරිස් කාර්යාලවලට බාර දී තිබේ.
දෙමළ ජාතික සන්ධානය සංවිධානය කරන ලද දෙදින විරෝධතා ව්‍යාපාරයේ පොහොර සහනාධාර කපා දැමීමට හා තවත් ගොවීන්ට බලපාන ගැටළු වලට විසදුම් ඉල්ලා උද්ඝෝෂණ ව්‍යාපාරයක් 18 වැනිදා උතුරු නැගෙනහිර පළාත්වල පැවැත්වූ බව ප්‍රාදේශීය වාර්තාකරුවෝ පවසති.
ප්‍රදේශයේ ගොවිජන මධ්‍යස්ථාන ඉදිරිපිට රැස්වූ ගොවියෝ බැනර් හා පුවරු ප්‍රදර්ශනය කරමින්, සටන් පාඨ කියමින් ආණ්ඩුවට සිය විරෝධය දැක්වුහ.
Facebook Comments
