ශ්‍රී ලංකාවේ ආණ්ඩුව ප්‍රකාශ කළ පරිදි පසුගිය සතිය වන විට වසංගත තත්වය පාලනය කරගත හැකි වෙනු ඇතැයි පළවූ අපේක්ෂාව බිඳ වැටෙමින් තිබෙන බවට අනතුරු අඟවන ඉකුත් පාර්ලිමේන්තුවේ හිටපු අගමැති ඇතුළු විරුද්ධ පක්ෂයේ බහුතරයක් නියෝජනය කරන දේශපාලන පක්ෂ ඊට මුහුණ දීම සඳහා සහාය දීම සඳහා පාර්ලිමේන්තුව විසුරුවා හැරීමේ නියෝගය අවලංගු කරන ලෙස ජනාධිපතිවරයාගෙන් ඉල්ලා සිටී.
රනිල් වික්‍රමසිංහ, ආර් සම්බන්ධන්, සජිත් ප්‍රේමදාස, රවුෆ් හකීම්, රිෂාඩ් බදියුද්දීන්, මනෝ ගනේෂන් සහ පාඨලී චම්පික රණවකගේ අත්සනින් යුතුව ජනාධිපති ගෝඨාභය රාජපක්ෂට දැනුම් දී ඇත්තේ 2020 මාර්තු 2 විසුරුවා හරින ලද පාර්ලිමේන්තුව නැවත කැඳවන්නේ නම් “වගකීමෙන් සහයෝගය දීමට” තමන් එකඟ බවයි.
එහිදී තමන් තුල කිසිදු සැඟවුණු න්‍යාය පත්‍රයක් නැති බවටද එම පක්ෂ ජනාධිපතිවරයාට සහතික වෙයි. ශ්‍රී ලංකාවේ කොරෝනා රෝගීන් සංඛ්‍යාව පන්සියය ඉක්මවා යද්දී විපක්ෂයේ නායක පිරිසක් විසින් නිකුත් කරන ලද ඒකාබද්ධ ප්‍රකාශය පහතින්:
1.COVID-19 වසංගතය ව්‍යාප්ත වීම සහ එය මැඩපැවැත්වීමට රජය ගෙන ඇති ක්‍රියාමාර්ග ඇතුළු පසුබිම තුල, ලෝකයේ අනෙක් රටවල මෙන්ම අපේ රටේද පෙර නොවූ විරු අභියෝග ගණනාවක් මතු වී තිබේ. පසුගිය සතිය වනතුරු වසංගතයේ ව්‍යාප්තිය පාලනය කිරීමට හැකි වෙනු ඇතැයි අපේ රටේ ගොඩනගා තිබු අපේක්ෂාව දැන් බිඳවැටෙමින් තිබේ. ඉදිරි සති කිහිපය තුල තීරණාත්මක ලෙස එහි ව්‍යාප්තිය පාලනය කිරීමට නොහැකි වුවහොත්, රටේ දැනට පවතින මහජන සෞඛ්‍ය අර්බුදයට අමතරව ආර්ථික, සමාජීය, හා දේශපාලන ක්ෂේත්‍ර වලද අර්බුද ඇතිවිය හැක.
2.සිය ගණනක් ජනතාව ආසාදනය වීමත්, දහස් ගණනක් ජනතාවට ඔවුන්ගේ ජීවනෝපාය අහිමි වීමත්, බෙහෙවින් කණගාටුදායක තත්වයකි. පෙරටුගාමී සෞඛ්‍ය සේවකයින්, තමන්ගේ ආරක්ෂාවද නොතකා, අප සියල්ලන්ම ආරක්ෂා කිරීමට, ඔවුන්ගේ උපරිම උත්සාහයන් දරමින් සිටිති. අපේ දේශපාලන තීන්දු හේතුවෙන් ඔවුන්ගේ උත්සාහයන් නිෂ්එල නොවිය යුතුය.
3.පාර්ලිමේන්තුව විසුරුවා හැර තිබීමත්, ආණ්ඩුක්‍රම ව්‍යවස්ථාවෙන් නියමිත පරිදි නව පාර්ලිමේන්තු මැතිවරණය පැවැත්වීමට නොහැකි වීමත්, රටේ පවත්නා දේශපාලන වාතාවරණය තුල අවිනිශ්චිතතාවන් ඇති කිරීමට විශේෂයෙන් තුඩු දී තිබේ. මැතිවරණ කොමිෂන් සභාව විසින් පාර්ලිමේන්තු මැතිවරණය සඳහා නියම කරන ලද 2020 ජුනි 20 වන දිනදීත් මැතිවරණය පැවැත්වීමට හැකි වේද යන්න අවිනිශ්චිතය. මෙම දිනයද, රටේ පවත්නා මහජන සෞඛ්‍ය තත්වය සලකා, නැවත සලකා බැලෙනු ඇති බව මැතිවරණ කොමිෂන් සභාවද ප්‍රකාශ කර තිබේ.
4.නිදහස් හා සාධාරණ මැතිවරණයක් පැවැත්වීමට සුදුසු වාතාවරණයක් ඉදිරි මාස දෙක තුලදී බිහිවෙනු ඇතැයි අපට සාධාරණ අපේක්ෂාවක් තැබිය නොහැක. එමෙන්ම නුදුරු කාලයේදී මහා මැතිවරණයක් පැවැත්වීම මගින් අප රටේ ජනතාව විශාල සෞඛ්‍ය අවදානමකට අනාවරණය කිරීම නොකළ යුතු දෙයක් යැයි අප සිතමු. ශ්‍රී ලංකා ජනතාව මැතිවරණ ව්‍යාපාරයට සක්‍රිය ලෙස සහභාගි වෙමින්ද, ඉහල ප්‍රතිශතයක් චන්දය දීමට ඉදිරිපත් වීමෙන්ද, ප්‍රජාතන්ත්‍රවාදී ක්‍රියාවලිය වෙත තමන් සතු කැපවීම සෑම අවස්ථාවකම ප්‍රදර්ශනය කර ඇත. එබැවින් නිදහස් හා සාධාරණ මැතිවරණයක් සඳහා බාධා රහිත චන්ද ප්‍රචාරක ව්‍යාපාර වලටද අවකාශ තිබිය යුතුය. මහජන සහභාගිත්වයෙන් යුත් මැතිවරණ ප්‍රචාරක ව්‍යාපාර, COVID-19 වයිරසය පැතිරීමට අනුබලයක් වනු ඇත. පසුගිය දිනවල සිදුවූ රෝගීන්ගේ සංඛ්‍යාවේ පෙර නොවූ විරු වැඩිවීම අප අමතක නොකළ යුතුය.
5.අන් සෑම ප්‍රජාතන්ත්‍රවාදයක මෙන්ම අප රටද පාලනය වන්නේ විධායකය, ව්‍යවස්ථාදායකය, සහ අධිකරණය යන ආයතන තුනෙන් වන අතර, ඒවාට එකිනෙකට වෙනස් හා නිශ්චිත වූ බලතල තිබේ. නීතියේ ආධිපත්‍යය පැවතීමට නම් මෙම ආයතන තුනම සක්‍රියව පැවතීම අත්‍යවශ්‍ය වේ. ඒවායේ සක්‍රිය පැවැත්ම අප රටේ වර්තමාන තත්වය නිසා අන් කවරදාටත් වඩා අද වැදගත් වී ඇත. එසේ වුවත් අප රටේ වර්තමාන අර්බුදයේ ඇති විශේෂත්වය නම් එය දිගහැරෙන්නේ පාර්ලිමේන්තුව අක්‍රිය කර ඇති පසුබිමක වීමයි. හදිසි අවස්ථාවක් පැන නැග ඇතැයි ජනාධිපතිතුමාට හැඟෙන්නේ නම්, විසුරුවා හැර ඇති පාර්ලිමේන්තුව යලි කැඳවීමට ආණ්ඩුක්‍රම ව්‍යවස්ථාවේ 70 වන ව්‍යවස්ථාව බලය ලබා දී ඇත. එම බලය ජනාධිපතිවරයා විසින් භාවිතා කර නැත. පාර්ලිමේන්තු මැතිවරණය නැවත නැවත කල් දැමීමට ඇති අවකාශය තුල, පාර්ලිමේන්තුව තවත් දිගු කලකට අක්‍රියව පැවතීමේ අනතුර රට ඉදිරියේ තිබේ.
6.අප විශ්වාස කරන්නේ විසුරුවා ඇති පාර්ලිමේන්තුව නැවත කැඳවීම සහ පාර්ලිමේන්තුවේ නියෝජනයන වන දේශපාලන පක්ෂ වලත්, මන්ත්‍රීවරුන්ගේත් සක්‍රිය සහයෝගය ලබා ගැනීම මගින්, දැනට පවත්නා අර්බුදය තුල මතුවී ඇති හදිසි ගැටළු ගණනාවක්ම නිරාකරණය කල හැකි බවයි. මහජන සෞඛ්‍ය තත්වය නිසා පැන නැගී ඇති අර්බුදයට මුහුණ දීමට අවශ්‍ය නව සහ සුදුසු නීති පැනවීමත්, ඒකාබද්ධ අරමුදල රජයේ වියදම් සඳහා යොදා ගැනීමට පාර්ලිමේන්තු අනුමැතිය ලබා ගැනීමත්, ඒ අතර ප්‍රධාන වේ.
7.අද අප සියලු දෙනාම මුහුණ පා සිටින්නේ පෙර නොවූ ආකාරයේ සහ කවදා අවසන්වනු ඇතැයි අනාවැකි කිව නොහැකි, බරපතල ජාතික අර්බුදයකටය. මෙම අර්බුදය විසඳීම සඳහා, විසුරුවා හැර ඇති පාර්ලිමේන්තුවේ මන්ත්‍රීන් වන අපට වගකීමක් ඇති අතර, ඒ සඳහා වගකිවයුතු සහයෝගීතාවයක් ජනාධිපතිවරයාට ලබා දීමට සුදානම් බව ප්‍රකාශ කර සිටිමු. පෙර නොවූ විරූ අර්බුදයක් මධ්‍යයේ දේශපාලන බෙදීම් අභිභවා යමින්, සියලුම දේශපාලන පක්ෂ සහ දේශපාලන නායකයින්ට, ජනතාවගේ සහ රටේ පොදු යහපත සඳහා එකට වැඩ කිරීමේ යුතුකමක් හා අභියෝගයක් ඇති බව අපි අවධාරණය කරමු.
8.අපේ රටේ ආණ්ඩුකරන ක්‍රියාවලිය නිසි පරිදි, නිත්‍යානුකුලව, සහ ආණ්ඩුක්‍රම ව්‍යවස්ථාවට අනුකුලව සිදුවන බවට සහතික කරනු පිණිස, පාර්ලිමේන්තුවේදී ආණ්ඩුවට සහය දීමට අප සුදානම්ය. අප මෙම කාලය තුලදී වැටුප් ලබා නොගන්නා බවටත්, ආණ්ඩුව පරාජය කිරීමට උත්සහ නොගන්නා බවටත්, ආණ්ඩුව ගන්නා අවශ්‍ය ක්‍රියාමාර්ග කඩාකප්පල් කිරීමට කටයුතු නොකරන බවටත් අපි ජනතාවට සහතික වෙමු. නිත්‍යානුකුලව පනවා නොතිබුනත් දැනට බලපවත්නා “ඇඳිරි නීතිය” පවත්වා ගැනීමට පුර්ණ සහයෝගය දැක්වීමෙන් අපි මේ බව දැනටමත් තහවුරු කර ඇත්තෙමු.
9.මෙම පසුබිම තුල අප ගරු ජනාධිපතිතුමාගෙන් ඉල්ලා සිටින්නේ මෙම තීරණාත්මක අවස්ථාවේදී අප සද්භාවයෙන් ඉදිරිපත්කර සිටින “වගකීමෙන් සහයෝගය දීමේ” යෝජනාවට යහපත් ප්‍රතිචාරයක් දක්වමින් පාර්ලිමේන්තුව විසුරුවා හැරීමට 2020 මාර්තු 02 දින නිකුත් කල නියෝගය ආපසු කැඳවන ලෙසයි. එසේ කිරීම කොරෝනා වයිරසයේ අභියෝගය ජය ගැනීමට සහයෝගයෙන් සහ එක්ව වැඩ කිරීමටත්, එසේ කරන සියලු දේ නිත්‍යානුකුලව සහ ආණ්ඩුක්‍රම ව්‍යවස්ථාවට එකඟව සිදුකිරීමටත් ඉඩ ප්‍රස්ථාව ලබා දෙනු ඇති බව අපේ දැඩි විශ්වාසයයි. ඉන් පසුව පාර්ලිමේන්තු මැතිවරණයක් පැවැත්වීමට සුදුසු අවස්ථාව පැමිණ ඇතැයි හැඟෙන අවස්ථාවක පාර්ලිමේන්තුව විසුරුවා හැරීමට ජනාධිපතිතුමාට හැකි වනු ඇත.
10. පාර්ලිමේන්තුව විසුරුවාහැරීමේ නියෝගය ආපසු කැඳවීම නොකරන්නේ නම් , එයට විකල්ප ක්‍රියාමාර්ගයක් ලෙස, ආණ්ඩුක්‍රම ව්‍යවස්ථාවේ 70(7) ව්‍යවස්ථාව ප්‍රකාරව ඇති බලතල අනුව අඩු තරමින් විසුරුවා ඇති පාර්ලිමේන්තුව යලි කැඳවන ලෙස ඉල්ලා සිටිමු. “වගකීමෙන් සහයෝගය දීමේ” මෙම යෝජනාව අප ඉදිරිපත් කරන්නේ අවංක චේතනාවෙන් පමණක් බවට අප ජනාධිපතිතුමාට සහ මුළු රටටම සහතික වන අතර, අප එසේ කරන්නේ කිසිඳු සැඟවුණු න්‍යාය පත්‍රයක් නොමැතිව සහ රටේත්, ජනතාවගේත් උපරිම සුභසිද්ධිය අරභයා බවත් ප්‍රකාශ කරන්නෙමු.
Facebook Comments
