හමුදාව කඳවුරු බැඳ සිටින තම ඉඩම් නිදහස් කරන ලෙස ඉල්ලා කේපාපුලව් ගම් වැසියන් සිදු කරන විරෝධතාවය යුක්ති සහගත බව අධිකරණය තීන්දු කර තිබේ.
හැත්තෑ වැනි නිදහස් සමරුව දා ඉඩමේ අයිතිය ඉල්ලා විරෝධතාවයක යෙදුන කේපාපුලව් ගම් වැසියන්ට එරෙහිව මුල්ලියවලේ පොලීසිය විසින් අධිකරණය හමුවේ ගොනුකළ පැමිණිල්ලක් 12 සඳුදා විභාගයට ගත් මුලතිව් දිසා අධිකරණය උද්ඝෝෂණය සිදු කිරිම ජනතාවගේ අයිතියක් බව තහවුරු කර ඇත.
ජනතාවගේ ප්‍රජාතන්ත්‍රවාදී අයිතීන් වෙනුවෙන් උද්ඝෝෂණ කිරීමේ අයිතිය ජනතාව සතුව පවතින අතර සාමයට බාධා නොවන අයුරින් ඔවුන් කටයුතු කළ යුතු බවයි මුලතිව් දිසා විනිසුරු එස්. ලෙනින් කුමාර් එහිදි පවසා ඇත්තේ.
උද්ඝෝෂණයේ යෙදුනු පස්දෙනෙකුගේ නම් ඇතුලත් කරමින් පොලිසිය අධිකරණයේ කරුණු දක්වා ඇති අතර එම නම් අතර එක් අයෙකු එදින විරෝධතාවයට සම්බන්ධ නොවුන බව අධිකරණයට දැනුම් දී ඇති ගම් වැසියන් හමුදාව අල්ලා ගෙන සිටින තම ඉඩම් නිදහස් කරන්නේ නම් තමන්ට විරෝධතාවයේ නිරත වීමේ අවශ්‍යතාවයක් නැති බවද පෙන්වා දෙන ලදී.
Facebook Comments
