“තරුණයන්ගේ යකඩ හීන තැළීම නතර කරනු” යන තේමාව යටතේ කොළඹ පිහිටි ජනපති නිල නිවස ඉදිරිපිට උද්ඝෝෂණයක් පැවැත්වීම සඳහා සමස්ත ලංකා යතුරුපැදිකරුවන්ගේ සංගමය විසින් කරන ලද ඉල්ලීමක් පොලීසිය විසින් ප්‍රතික්‍ෂේප කර තිබේ.
මෙම උද්ඝෝෂණය පැවැත්වීම සඳහා අවසර ලබාදෙන්නැයි ඉල්ලා සමස්ත ලංකා යතුරුපැදිකරුවන්ගේ සංගමයේ ලේකම් චිරන්ත අමරසිංහ විසින් පසුගිය 27 වැනිදා කුරුඳුවත්ත පොලිස් ස්ථානයෙන් ලිඛිතව ඉල්ලා ඇති අතර එයට පිළිතුරු වශයෙන් ඊයේ දිනයේදී පොලිසිය එම සංගමයට ලිඛිතව දන්වා ඇත්තේ එවැනි උද්ඝෝෂණයක් සඳහා අවසර ලබාදිය නොහැකි බවයි.
වාහන වෙනස් කිරිමේ නීතියේ ඇති ගැටලු සම්බන්ධයෙන් මෙම විරෝධතාවය පවත්වන බව පවසන එම සංගමය මෙම නිතීය හරහා මෝටර් රථ කොමසාරිස් කාර්යාලයේ සහ පොලිසියේ අතැම් නිලධාරින් අයථා ලෙස මුදල් උපයන බවට චෝදනා කරයි.
“තරුණයන්ගේ යකඩ හීන තැළීම නතර කරනු” යන තේමාව යටතේ ලබන 13 වැනිදා ගාලුමුවදොර පිටියේ සිට පාගමනින් පැමිණ ජනාධිපතිවරයාගේ නිල නිවස ඉදිරිපිටදී මෙම උද්ඝෝෂණය පැවැත්වීමට යතුරුපැදිකරුවන්ගේ සංගමය සැලසුම් කර තිබිණි.
ජනාධිපතිවරයා ඇතුළු ප්‍රභූන්ගේ ආරක්ෂාවට තර්ජනයක් එල්ල විය හැකි බැවින් මෙම උද්ඝෝෂණයට ඉඩ ලබාදිය නොහැකි බව විරෝධතාවයට අවසර ලබා නොදෙමින් කුරුඳුවත්ත පොලීසිය දන්වා තිබේ.
කෙසේ වෙතත් සැලසුම් කර පරිදි ලබන 13 වැනිදා ගාලුමුවදොර පිටියෙන් විරෝධතා පාගමන ආරම්භ කරන බව පවසන සමස්ත ලංකා යතුරුපැදිකරුවන්ගේ සංගමයේ ලේකම් චිරන්ත අමරසිංහ එය අවසන් කරන ස්ථානය හෙළි නොකරන බව ද කියා සිටී.
Facebook Comments
