දශ ලක්ෂයකට වැඩි පිරිසට නියංසායෙන් පිඩා

දිවයිනේ දිස්ත්‍රික්ක 17 කට බලපා තිබෙන අධික නියඟය හේතුවෙන් පවුල් 314589 ක පුද්ගලයන් 10,95757ක් පීඩාවට පත්ව ඇතැයි රජය නිවේදනය කරයි.

ආපදා කළමනාකරණ මධ්‍යස්ථානය නිකුත් කළ නවතම වාර්තාවට අනුව නියඟින් වැඩිම පීඩාවට පත්ව සිටින්නේ උතුරේ ජනතාවයි.

උතුරු පළාතට අයත් දිස්ත්‍රික්ක පහ තුල පමණක් පවුල් 133678 අයත් පුද්ගලයන් 462815 පීඩාවට පත්ව සිටින බවයි ආපදා කළමනාකරණ මධ්‍යස්ථානයේ වාර්තා පෙන්වා දෙන්නේ.

වයඹ පලාතේ තුන්ලක්ෂයකට ආසන්න ජනතාවක් නියඟයට මුහුණ දී ඇති අතර කුරුණෑගල දිස්ත්‍රික්කයේ පමණක් පවුල් 46100ක පුද්ගලයන් 151262ක් පීඩාවට පත්ව සිටී.

අගෝස්තුව වනවිට ශ්‍රී ලංකාව දශක හතරකින් මුහුණ මුහුණ දෙන බරපතලම නියංසායට ගොදුරු වීමේ අවදානම ගැන එක්සත් ජාතීන්ගේ සංවිධානය අනතුරු අඟවා තිබුනේ මේ වසර මුලදී ය.

මේ වන විට ත්‍රිකුණාමලය, මඩකළපුව, අම්පාර, පොළොන්නරුව, අනුරාධපුරය, කුරුණෑගල, පුත්තලම, කිළිනොච්චිය,වව්නියා, මුලතිව්, යාපනය, මන්නාරම, බදුල්ල, මාතලේ, මහනුවර, හම්බන්තොට හා රත්නපුර යන දිස්ත්‍රික්කවලට නියඟය බලපා තිබේ.

ජනපති උපදෙස්

නියඟයෙන් පීඩාවට පත් ප‍්‍රදේශවල ජනතාවගේ සුබසාධන කටයුතු පිළිබඳ සොයා බැලීමට ප‍්‍රාදේශීය ලේකම් කොට්ඨාශ මට්ටමින් යුධ හමුදා නිලධාරින් පත්කරන ලෙස ජනාධිපති මෛත්‍රීපාල සිරිසේන අදාළ අංශ වෙත උපදෙස් දී ඇති බව රජය පවසයි.

වියළි කාලගුණික තත්ත්වයෙන් පිඩා විදින ජනතාවගේ පානීය ජල අවශ්‍යතා සහ සෙසු ජල අවශ්‍යතා සපුරාලීමට අවශ්‍ය ප‍්‍රතිපාදන අදාළ ආයතන වෙත යොමු කර තිබෙන අතර ඔවුන් වෙනුවෙන් වියළි ආහාර සලාකයක් ලබාදීමට ජනාධිපතිවරයා තීරණය කර තිබේ.