පසුගියදා අම්පාරේ එල්ල කරන ලද මුස්ලිම් විරෝධි ප්‍රහාරය සම්බන්ධව අපක්‍ෂපාතී හා සාධාරණ ලෙස නිසි ආකාරව ක්‍රියාත්මක වීම තහවුරු කිරීම මෙන්ම මහජන විශ්වාසය ගොඩනැංවීම සඳහා කටයුතු කරන බව නීතිය හා සාමය පිළිබඳ අමාත්‍යංශය පවසයි.
සිද්ධිය සම්බන්ධව සිදු කරන පරීක්ෂණ වල “අඩුපාඩු සිදු වූ බවට” ලැබී ඇති පැමිණිළි සලකා බලා පහරදීම සම්බන්ධයෙන් සම්පූර්ණ විමර්ශනයක් සිදුකරන මෙන් මඩකලපුව දිස්ත්‍රික් භාර නියෝජ්‍ය පොලිස්පතිවරයා වෙත උපදෙස් දී ඇති බවද 04 ඉරිදා එම අමාත්‍යංශය නිකුත් කල නිවේදනයක දැක්වේ.
”පසුගිය දින අම්පාර ප්‍රදේශයේ සිදුවූ අවාසනාවන්ත සිද්ධිය සම්බන්ධව නීතිය ක්‍රියාත්මක කිරීමේ දී අඩුපාඩු සිදුවූ බවට පැමිණිලි ලැබී ඇත. එසේම මෙම සිද්ධිය සම්බන්ධව අධිකරණයට ඉදිරිපත් කරන ලද බී වාර්තාව අසම්පූර්ණ බවට ද තොරතුරු වාර්තා වී ඇත. නීතිය හා සාමය අමාත්‍යංශය විසින් සිද්ධිය සම්බන්ධ සම්පූර්ණ විමර්ශනයක් සිදු කිරීම සඳහා මඩකලපුව දිස්ත්‍රික් භාර නියෝජ්‍ය පොලිස්පතිවරයා වෙත උපදෙස් ලබාදී ඇත.”
ප්‍රහරයට ලක් වීමෙන් හානි සිදු වු මුස්ලිම් ව්‍යාපාරික ස්ථාන වලට සහ මුස්ලිම් දේවස්ථානය ප්‍රතිසංස්කරණය කිරීම සඳහා කඩිනමින් වන්දි ලබා දීමටද කටයුතු කරන බව නීතිය හා සාමය පිළිබඳ අමාත්‍යංශය නිකුත් කල නිවේදනයේ වැඩි දුරටත් සඳහන් කර තිබේ.
ආහාර ගැනීම සඳහා සිංහල තරුණයක් පිරිසක් විසින් 26 සඳුදා මධ්‍යම රාත්‍රියේ අම්පාර නගරයේ පිහිටි මුස්ලිම් වෙළඳ සැලකට ගොස් ඇති අතර එහිදි තමන් ගත් ආහාර වලට වඳ බෙහෙත් දමා ඇති බවට එම තරුණයන් චෝදනා කර තිබුණි.
දෙපිරිස අතර සිදු වු බහින් බස් වීමකින් පසුව පැමිණි සිංහල තරුණයන් කණ්ඩායමක් විසින් එම වෙළඳ සැලට සහ තවත් මුස්ලිම් වෙළඳ සැල් හතරකටත් අම්පාර ජුම්මා මස්ජිත් මුස්ලිම් දේවස්ථානයටත් පහර දී ඇති බවයි ශ්‍රී ලංකා මුස්ලිම් කවුන්සිලය පවසයි.
Facebook Comments
