පුද්ගලික ගැටුමක් මත තරුණයෙකු ඝාතනය කිරීම ජාතිවාදි ප්‍රහාරයක් දක්වා වර්ධනය කල සිංහල දැඩි මතධාරි පිරිසකගේ මුස්ලිම් විරෝධි ප්‍රහාර පාලනය කිරීමට පොලිසිය විසින් තෙල්දෙණිය ප්‍රදේශයට ඇඳිරි නීතිය පනවා තිබේ.
දෙපිරිසක් අතර ඇති වූ ගැටුමකදී තුවාල ලැබූ පුද්ගලයෙකු මහනුවර රෝහලේ ප්‍රතිකාර ගනිමින් සිටියදී මාර්තු 03 සෙනසුරාදා මිය යාමත් සමග ප්‍රදේශයේ නොසන්සුන්කාරී තත්ත්වයක් හට ගෙන තිබු අතර 04 ඉරිදා මුස්ලිම් විරෝධී ප්‍රහාර මාලාවක් දියත් කර තිබුණි.
අදාළ පුද්ගලයා ඝාතනය කිරීමට සම්බන්ධ බවට සැකකරන තරුණයක් 4 දෙනෙකු පොලිසිය විසින් අත්අඩංගුවට ගනු ලැබ බන්ධනාගාර ගත කර තිබේ.
කෙසේ වෙතත් 04 ඉරිදා පහර දීමට සැක පිට පුද්ගලයන් 24 දෙනෙකු පොලිසිය විසින් අත්අඩංගුවට ගත් අතර ආදාළ පුද්ගලයන් නිදහස් කරන ලෙසට බෞද්ධ භික්ෂුන් පෙරටු කොට ගත් සිංහල දැඩි මතධාරින් තෙල්දෙණිය නගරයේ සිදුකල විරෝධය විසුරුවා හැරීමට කඳුළු ගෑස් ප්‍රහාරයක් එල්ල කල බවයි පොලිසිය පවසන්නේ.
මේ වන විට තෙල්දෙණිය ප්‍රදේශයට පොලිස් විශේෂ කාර්ය බලකා ආරක්ෂාව යොදා ඇති අතර 06 අඟහරුවාදා උදෑසන 6 වන තෙක් පොලිස් ඇඳිරි නීතිය පැනවු බව පොලිස් මුලාස්ථානය නිවේදනය කරයි.
තෙල්දෙණිය නගරයේ පිහිටි මුස්ලිම් ව්‍යාපාරික ස්ථාන හා මුස්ලිම් ජනයාට අයත් නිවාස විශාල ප්‍රමාණයක් ගිනිබත් කර ඇති බව ශ්‍රී ලංකා මුස්ලිම් මණ්ඩලය සිලෝන් ජර්නල්ස් කල විමසීමක දී කියා සිටියේය.
බියට පත් වී සිටින තෙල්දෙණිය සහ දිගන ප්‍රදේශයේ මුස්ලිම් ජනයා එම ප්‍රදේශය අතහැර ගොස් ඇති අතර පොලිසියට පවා තත්ත්වය පාලන කර ගැනීමට අපහසු වී ඇති බව ශ්‍රී ලංකා මුස්ලිම් මණ්ඩලයේ සභාපති එම්. එන්. එම්. අමීන් සඳහන් කළේය.
Facebook Comments
