ආචාර්ය හර්ෂ ද සිල්වා බැංකු වසා දමා කරන්න යන වැඩේ එලි කරයි

දින පහක අඛණ්ඩ බැංකු නිවාඩුවක් ලබා දී දේශීය ණය ප්‍රතිව්‍යුහගතකරණය ක්‍රියාවලිය සිදුකරන ආකාරය සම්බන්ධයෙන් විපක්ෂයේ ප්‍රබල මන්ත්‍රීවරයෙක් ද වන රජයේ මුදල් පිළිබඳ කාරක සභාවේ සභාපතිවරයා කරුණු දක්වා තිබේ.

රජයේ මුදල් පිළිබඳ කාරක සභාවේ සභාපති ලෙස ආචාර්ය හර්ෂ ද සිල්වා එම පැහැදිලි කිරීම සිදු කර ඇත්තේ ඔහු නියෝජනය කරන සමගි ජන බලවේගය පාර්ලිමේන්තුවේදී දේශීය ණය ප්‍රතිව්‍යුහගතකරණ වැඩසටහනට විරුද්ධව ඡන්දය ප්‍රකාශ කිරීමට තීරණය කර තිබියදීය.

ඉතිහාසයේ පෙර නොවු අයුරීන් දීර්ඝ බැංකු නිවාඩුවක් ලබා දී සිදු කිරීමට යන දේශීය ණය ප්‍රතිව්‍යුහගතකරණය සම්බන්ධයෙන් ජනතාව තුළ ඇති වී තිබෙන ව්‍යාකූලත්වය නැති කිරීමට ආණ්ඩුව ක්‍රියා කළ යුතු බවට දිවයිනේ බැංකු කාර්ය මණ්ඩල නියෝජනය කරන ප්‍රධානතම වෘත්තීය සමිතිය වන ලංකා බැංකු සේවක සංගමය කොළඹදී මාධ්‍ය හමුවක් පවත්වමින් ඉල්ලා සිිටි දිනට පසුදා ට්ව්ටර් පනිවිඩ කිහිපයක් නිකුත් කරමින් මන්ත්‍රීවරයා අනතුරු අඟවා ඇත්තේ ඉදිරියේදී පැමිණෙන්නේ බරපතල කාලයක් බවයි.

රජයේ මුදල් පිලිබඳ කාරක සභාවේ සභාපති ලෙස, සිය තීරණාත්මක භූමිකාව සහ දේශීය ණය ප්‍රශස්තකරණය සමග මතුවන සුවිශාල කාර්යභාර්ය පිලිබඳ රට වැසියන් දැනුවත් කිරීමට කැමැත්ත පළ කරන මන්ත්‍රීවරයා ඉංශ්‍රිසි බසින් පැහැදිලි කර ඇත්තේ ශ්‍රී ලංකා ආර්ථිකයේ නැවත ගොඩනැගීම සහ සංවර්ධන සැලැස්මට මෙම නීති සම්පාදන ක්‍රියාවලියේ අතිමහත් වැදගත්කමක් පවතින බවයි.

හර්ෂ ද සිල්වා මන්ත්‍රීවරයා සදහන් කරන පරිදි විවාදයට ගැනීමට සහ පාර්ලිමේන්තුව තුළ අනුමත කිරීමට පෙර අදායමට සහ වියදමට අදාළ සියලුම කෙටුම්පත් රජයේ මුදල් පිලිබඳ කාරක සභාව හරහා යා යුතු වේ. රටේ ආර්ථිකය ගොඩනැගීමේ ක්‍රියාවලියේදී මෙම වැදගත් පියවරේ සාර්ථකත්වය තහවුරු කිරීම සඳහා රජයේ මුදල් පිලිබඳ කාරක සභා විසින් තීරණාත්මක අධීක්ෂණ සේවාවක් සපයනු ලබන බව ඔහු පෙන්වා දෙයි.

ස්ථාවරභාවය පවත්වාගැනීමට සහ වෙළෙඳපොල තුළ අනවශ්‍ය කලබලකාරී තත්වයන් වැළක්වීමට රජය විසින් සිකුරාදා නිවාඩු දිනයක් ලෙස ප්‍රකාශයට පත්කොට ඇති අතර, එය දින 5ක් බැංකු වසා තැබීමට හේතුවී ඇති බවට පෙන්වා දෙන විපක්ෂයේ මන්ත්‍රීවරයා අවධාරණය කරන්නේ පවතින තත්වයේ සංවේදී බව සහ අනවශ්‍ය ලෙස හදිසි වෙනස්වීම් ඇතිවීම වළක්වාගැනීමේ අවශ්‍යතාවය වැටහෙන බවයි.

දේශීය ණය ප්‍රශස්තකරණ සැලසුමේ කාලසටහන පිලිබදව ද රජයේ මුදල් පිළිබඳ කාරක සභාවේ සභාපති පැහැදිලි කර ඇත්තේ පහත අයුරිනි.

ඒ අනුව ජුනි 28 වැනි බදාදා, සැලසුම කැබිනට් මණ්ඩලයට ඉදිරිපත් කරයි. බ්‍රහස්පතින්දා සහ සිකුරාදා දිනවල රජයේ මුදල් පිලිබඳ කාරක සභාව විසින් එම සැලසුම මනා සැලකිල්ලෙන් සහ පුළුල් ලෙස පරීක්ෂාකරනු ඇති අතර, එහිදී බැංකුවල ස්ථාවරභාවයට සහ ජනතාවගේ මුදල්වල සුරක්ෂිතභාවයට ප්‍රමුඛතාවය ලබාදන බව ඔහු පවසයි.

“ජුනි 29 වැනි බ්‍රහස්පතින්දා, රජයේ මුදල් පිලිබඳ කාරක සභාවේ සාමාජිකයින්ට දේශීය ණය ප්‍රශස්තකරණය සැලසුම පිලිබඳ පැහැදිලි කිරීම සඳහා අප මහබැංකුවේ අධිපතිට, භාණ්ඩාගාරයේ ලේකම්ට සහ අදාළ නිලධාරීන්ට ආරාධනා කරන අතර, මෙම සැසිය තුළින් අදාළ සැලසුමේ ප්‍රතිඵල සහ ප්‍රයෝගිකත්වය පිලිබඳ වැදගත් අදහස් සපයනු ඇත. උපරිම විනිවිදභාවය තහවුරු කිරීම සඳහා, රජයේ මුදල් පිලිබඳ කාරක සභාවේ සැසි කැමැත්තක් දක්වන සියලුම පාර්ලිමේන්තු මන්ත්‍රීවරුන්ට විවෘත කර ඇත.”

බ්‍රහස්පතින්දා පැවැත්වෙන දෙවන සැසියේදී, දේශීය ණය ප්‍රශස්තකරණ සැලසුම පිලිබඳ බැංකු, විශ්‍රාම පාරිතෝෂික අරමුදල් සහ රක්ෂණ අරමුදල් ඇතුළු සියලූම ණය දී ඇති පාර්ශවයන්ගේ මතයන් සහ අදහස් දැනගැනීම සඳහා ඔවුන්ටද ආරාධනා කර ඇති බව පවසන ආචාර්ය හර්ෂ ද සිල්වා පෙන්වා දෙන්නේ වඩාත් සමබර ප්‍රවේශයක් තහවුරු කිරීම සඳහා ඔවුන්ගේ අදහස් අතිශයින් වැදගත් බවයි.

රජයේ මුදල් පිලිබඳ කාරක සභාවේ සභාපති පාර්ලිමේන්තු මන්ත්‍රී ආචාර්ය හර්ෂද සිල්වා සිය ට්ව්ට්ර් ගිනුමේ සටහන් කර ඇති පරිදි පුළුල් සමාලෝචනයකින් පසු, ජුනි 30 වැනි සිකුරාදා, මේ පිලිබඳ සාකච්ඡාවක් ඇතිකරගැනීමට සහ එකිනෙකාගේ මතයන් දැනගැනීමට මහ බැංකුව, මුදල් අමාත්‍යාංශය සහ ණය දී ඇති පාර්ශව ඇතුළු සියල්ලෝම නැවතත් මුණගැසෙනු ඇත.

” අපගේ ඉලක්කය වන්නේ, මූල්‍ය පද්ධතියේ ස්ථාවරභාවය පවත්වාගනිමින් සහ ජාත්‍යන්තර මුල්‍ය අරමුදල විසින් අපට ලබාදී ඇති ඉලක්කයන්ට ලඟාවෙමින් දේශීය ණය ප්‍රශස්තකරණ ක්‍රියාවලිය ප්‍රතිඵලදායක ලෙස ක්‍රියාත්මක වීම තහවුරු කිරීමයි.”

රජයේ මුදල් පිලිබඳ කාරක සභාවේ පරීක්ෂාවෙන් පසු, දේශීය ණය ප්‍රශස්තකරණ සැලසුම මෙම සති අන්තයේදී, එනම් ජුලි 1 සෙනසුරාදා සහ 2 ඉරිදා දිනවලදී, පාර්ලිමේන්තුවේදී විවාදයට ගනු ඇත.

“මෙම සැලසුම අනුමත කිරීම සඳහා ඡන්දයක් පවත්වනු ඇති බවට සහ ඒ සමගම ණය-දළ දේශීය නිෂ්පාදන අනුපාතය 125% සිට 95% දක්වාත් දළ මූල්‍ය අවශ්‍යතාවය 37.5% සිට 13% දක්වාත් අඩු කිරීමට කටයුතු කරනු ඇති බවට අප අපේක්ෂා කරමු.” රජයේ මුදල් පිලිබඳ කාරක සභාවේ සභාපති සදහන් කරයි.

දේශීය ණය ප්‍රතිව්‍යුහගතකරණය සම්බන්ධයෙන් ජනාධිපති මාධ්‍ය අංශය විසින් විශේෂ රූපවාහිනී සාකච්ඡාවක් ද ජුනි 29 වැනිදා සිදු කළ අතර එයට සහභාගී වී තිබුනේ ආර්ථික කටයුතු පිළිබඳ ජනාධිපති ජ්‍යේෂ්ඨ උපදේශක ආචාර්ය ආර්.එච්.එස්. සමරතුංග, මුදල් අමාත්‍යංශ ලේකම් මහින්ද සිරිවර්ධන සහ මහ බැංකු අධිපති ආචාර්ය නන්දලාල් වීරසිංහය.

මහ බැංකු අධිපති ආචාර්ය නන්දලාල් වීරසිංහ එම සාකච්ඡාවේදී සදහන් කර තිබුනේ මෙරට බැංකු පද්ධතියට බලපෑමක් නොවන ලෙස, ප්‍රතිව්‍යුහගතකරණ වැඩපිළිවෙළ සැලසුම් කර ඇති බවයි.

පාර්ලිමේන්තුවේදී දේශීය ණය ප්‍රතිව්‍යුහගතකරණ වැඩසටහනට විරුද්ධව ඡන්දය ප්‍රකාශ කිරීමට තීරණය කළ බව පාර්ලිමේන්තුවේ විපක්ෂය වන සමගි ජන බලවේගයේ මහ ලේකම් රංජිත් මද්දුමබණ්ඩාර මාධ්‍යට පවසා තිබේ.