පවතින මර්දනය ජිනීවා නුවරට් ඇස නොගැනීම ගැන දෙමළ පක්ෂ අවධානය

යුද අපරාධ පිලිබඳ වගවීම කෙරෙහි තැකීමක් නොකළ ආණ්ඩුවට එක්සත් ජාතීන්ගේ මානව හිමිකම් කොමසාරිස්වරිය රතු එළි දැල්වීම ගැන ප්‍රසාදය පළ කරන දෙමළ දේශපාලන නායකයන් දිගටම සිදුවෙන මර්දනය කෙරෙහි අවධානයට ලක් නොවීම ගැන නොසතුට පල කර තිබේ.

එක්සත් ජාතීන්ගේ සංවිධානයේ 53 වැනි මානව හිමිකම් සමුළුවේ වාචික වාර්තාව ජුනි 21 වැනිදා ඉදිරිපත් කරමින් මානව හිමිකම් නියෝජ්‍ය කොමසාරිස්වරිය පෙන්වා දුන්නේ ලංකාණ්ඩුව සංහිඳියාව, නීතිය හා වගවීම කෙරෙහි අවධානය යොමු කර නොමැති බවයි.

“අතීතය ගැන පියවර ගැනීමට වීරිය දැරීම සම්බන්ධයෙන් ගත් කල, වගඋත්තර දායකත්වයේ බරපතල හිඩැස එලෙසම පවතිනවා. තවද, දණ්ඩ මුක්තිය පවත්නා තාක් කල්, ලංකාව නිර්ව්‍යාජ සංහිඳියාවක් හෝ තිරසාර සාමයක් හෝ උදා කර නොගනී,” යැයි එක්සත් ජාතීන්ගේ සංවිධානයේ මානව හිමිකම් සඳහා වන නියෝජ්‍ය මහකොමසාරිස් නදා අල් නශීෆ් සිය වාර්තාව ඉදිරිපත් කරමින් පැවසුවාය.

දෙමළ දේශපාලන පක්ෂ නායකයන් පවසන්නේ දිගින් දිගටම පත්වූ ආණ්ඩු මගින් යුද අපරාධ පිලිබඳ වගවීම ගැන එක්සත් ජාතීන්ගේ සංවිධානය ඇතුළු ජාත්‍යන්තර සංවිධානවලට ලබාදුන් පොරොන්දු කඩකරමින්, දෙමළ ජනතාව රවටමින් සිටින අවස්ථාවේදී UNHRC හිදී සිදුකළ වාචික ඉදිරිපත් කිරීම ධෛර්යමත් කරවන හා සාධනීය පියවරක් බවයි.

එහෙත් දැනටමත් ආණ්ඩුව දියත් කරමින් සිටින මර්දනය ගැන මෙම වාචික වාර්තාවේ සඳහන් නොවීම ගැනද දෙමළ නායකයන්ගේ දැඩි සැලකිල්ල යොමුවී තිබේ.

මෙවර එක්සත් ජාතීන්ගේ මානව හිමිකම් වාචික වාර්තාව මගින් ලංකා ආණ්ඩුවට බරපතල අවධාරණයක් කර ඇති බැවින්, ඒ පිළිබඳව යම් ප්‍රසාදයක් පළ කළ හැකි බව ඉලංගෙයි තමිල් අරසු කච්චි මාධ්‍ය ප්‍රකාශක, පාර්ලිමේන්තු මන්ත්‍රී එම්. ඒ. සුමන්තිරන් පවසයි.

“කොහොමත් දිගින් දිගටම ලංකා ආණ්ඩුව වගවීම ගැන සැලකුවේ නැහැ. ත්‍රස්ත පනත ජාත්‍යන්තර මට්ටමට ගේන්න කියලා ගේන පනතත් මර්දනයට තමයි බලතල දීලා තියෙන්නේ. “

සුමන්තිරන් මන්ත්‍රීවරයා පෙන්වා දෙන්නේ දැනට පසුපසට ගෙන ඇති නව මර්දනකාරී පනත ඉදිරියේදී ක්‍රියාත්මක නොකළ යුතු බවයි.

“සමස්තයක් වශයෙන් ගත්විට, වාර්තාව පිළිගැනීමට අප කැමතියි. මේ පිටුපස ඇති හේතුව නම්, වගවීමට අදාළ පියවර ගත යුතු බවට ඉල්ලීම් ඉදිරිපත් වූවත්, කිසිවක් ඉදිරියට ගොස් නොමැතිවීම නිසා ඒ ගැන කිසිවක්ම සිදුනොවීමයි කියා එය දැඩිව කියා ඇත.” දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම් පවසයි.

ඔහු තවදුරටත් සදහන් කරන්නේ ලංකාණ්ඩුව විසින් සංක්‍රාන්ති යුක්තිය වැරදි ලෙස අර්ථකථනය කරමින්, දේශීය සහ ජාත්‍යන්තර ප්‍රජාව මුලාකරමින් සිටින බවයි.

“අතුරුදහන් වූවන්ගේ කාර්යාලයක් (OMP) පිහිටුවා ඇති නමුත්, එහි සැබෑ අරමුණු වෙත කිසිදා ලඟා වූයේ නැතිවා පමණක් නොව, ඒ සඳහා උත්සාහයක්වත් දැරුවේ නැත. වගවීම පිලිබඳ කිසිඳු කර්තව්‍යයක් සිදුනොවූ මුත්, OMP හරහා සංක්‍රාන්ති යුක්තිය සම්බන්ධයෙන් කටයුතු සිදුවෙමින් පැවතුණු බවට ලංකා ආණ්ඩුව ව්‍යාජ ප්‍රතිරූපයක් ගොඩනගමින් සිටිනවා .”

“එක්සත් ජාතීන්ගේ මානව හිමිකම් නියෝජ්‍ය කොමසාරිස් වරිය ආණ්ඩුවේ වගවීම ගැන පෙන්වා දීම වැදගත්. වගවීම නොවුනොත් ඉදිරියේදී කිසිවක් කළ නොහැකි,“ යැයි දෙමළ ජනතා ජාතික සන්ධානයේ නායක, පාර්ලිමේන්තු මන්ත්‍රී සී.වී. විග්නේශ්වරන් පෙන්වා දෙයි.

ත්‍රස්ත පනත මුළුමනින්ම අහෝසි කිරීම කෙරෙහි ද ඇගේ අවධානය යොමු වුයේ නම් අගනා බව ද TPNA නායක විග්නේශ්වරන් පවසයි.

“යුද්ධය අවසන් වෙලා දැන් අවුරුදු 14 ක් වෙලා. ඒත් තවම උතුරු නැගෙනහිර පළාත් වලින් රජයේ හමුදාව ඉවත්කරගෙන නැහැ. මේකත් මානව හිමිකම් කොමසාරිස්වරියට පෙන්වා දෙන්න තිබුණා.“

“දෙමළ දේශපාලන සිරකරුවන් නිදහස් කිරීම ගැනත් ඈට මතක් කරන්න තිබ්බා.“

ඊළාම් ජනතා විප්ලවකාරී විමුක්ති පෙරමුණේ නායක සුරේෂ් ප්‍රේමචන්ද්‍රන් පවසන්නේ UNHRC ඉදිරිපත් කළ නිරීක්ෂණ ලංකා රජයට දැඩි අනතුරු ඇඟවීමක් බවයි.

“දිගින් දිගටම පත්වෙන ආණ්ඩු විසින් එක්සත් ජාතීන්ගේ සංවිධානය ඇතුළු අනෙකුත් ගෝලීය සංවිධාන රැවටීමට ලක් කරනමින් මේ ගැටලුවේ බරපතල බව අවතක්සේරු කරා. දැන් ලැබී තියෙන අනතුරු ඇඟවීම සෘජු සහ පැහැදිලි වනවා විතරක් නොවේ, වගවීම ගැන තවත් ප්‍රමාදවීම ජාත්‍යන්තර මැදිහත්වීම්වලට කරන ඇරයුමක්.“

එක්සත් ජාතීන්ගේ මානව හිමිකම් මණ්ඩලයේ (UNHRC) නියෝජ්‍ය මහකොමසාරිස්ගේ වාචික වාර්තාව ගැන ඊලාම් ජනතා ප්‍රජාතාන්ත්‍රවාදි පක්ෂය (EPDP) සහ තමිළ් මක්කල් විඩුදලෛ පුළිහල් (TMVP) වැනි ආණ්ඩුවේ හවුල්කාර දෙමළ පක්ෂ සහ ආණ්ඩු පක්ෂ සංධානයේ දෙමළ පාර්ලිමේන්තු මන්ත්‍රීවරු මුනිවත රකිමින් සිටිති.

ශ්‍රී ලංකාවේ මානව හිමිකම් චර්යාව පිළිබඳව වාරික සමාලෝචන වාර්තාව මේ මස 10 වැනිදා ජිනීවාහිදී එක්සත් ජාතීන්ගේ මානව හිමිකම් මණ්ඩලය හමුවේ සාකච්ඡා කිරීමට නියමිතය. පෙබරවාරියේ පැවති එම සමාලෝචනයට ආණ්ඩුවේ නියෝජිත සහභාගී වූයේ විදේශ අමාත්‍ය අලි සබ්රි ගේ ප්‍රධානත්වයෙනි.

ඊට සහභාගී වීමෙන් දේශීය වශයෙන් අත් කරගන්නා ලද ප්‍රගතිය ස්වේච්ඡාවෙන් බෙදා හදා ගැනීමට සමාන අවස්ථාවක් උදා වන බව ලංකාණ්ඩුව විසින් ඉදිරිපත් කරන ලද වාර්තාවේ සඳහන් වේ.

ඇල්ජීරියාව, කටාරය සහ බ්‍රිතාන්‍යය මුල් වී පවත්වන ලද සමාලෝචනයෙන් අනතුරුව සම්පාදනය කරන ලද වාර්තාවේ රටවල් ගණනාවක් විසින් ශ්‍රී ලංකාවට යොමු කරන ලද නිර්දේශ 300 කට ආසන්න සංඛ්‍යාවක් දැක්වේ.