රහස් පොලිස් ඇස නොගැසුනු දිවි ගලවාගත් නාවික බිම්ගෙයි සිරකරුවෝ

0

රාජපක්ෂ පාලනයේ අවසන් දෑවුරුද්දේ කොළඹ සහ ඒ අවටින් පැහැරගෙන ගොස්, වධදී, අතුරුදහන් කරන ලද 11 දෙනකු පිළිබඳ මහේස්ත්‍රාත් පරීක්ෂණය ආරම්භ වී අවුරුදු දහයකටත් වැඩි කලක් ගතවී තිබේ.

ඔවුන් නාවික හමුදාවේ ඉහළම අධිකාරියේ අනුදැනුම ඇතිව දිවයිනේ වැඩිම ආරක්ෂාවක් සහිත ත්‍රිකුණාමල නාවික කඳවුරේ ගන් සයිට් නම් භූගත වධකාගාරයේ සිරකොට තබා ඝාතනය කරන ලද බව රහස් පොලිසිය අධිකරණයට ලබා දුන් වාර්තාවල දැක්වේ. එම ලියවිලි වලින්ම පෙනී යන වැදගත් කරුණක් නම්, ගන් සයිට් බිම්ගෙයි සිරකොට වධබන්ධනයට ගොදුරු කළ තවත් බොහෝ සිරකරුවන් පොලිස් විමර්ශනයට මගහැරී ගොස් ඇති බවයි.

එලෙස මගහැරුණු සිරකරුවන් අතර දිවි බේරාගෙන විදේශවලට පලා ගියවුන් මෙන්ම ශ්‍රී ලංකාවේ ජීවත් වන්නවුන්ද ඉන්නා බව ජාත්‍යන්තර මානව හිමිකම් නීතිවේදිනී යැස්මින් සුකාගේ ප්‍රධානත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) විසින් ත්‍රිකුණාමල බිම්ගෙයි වධකාගාරය සම්බන්ධයෙන් හය අවුරුද්දක් තිස්සේ කළ ගවේෂණයකින් හෙළි කර ඇත.

ඒ හැමදෙනාම පාහේ එල්ටීටීඊ සංවිධානයට සම්බන්ධ බවට සැකකොට අත් අඩංගුවේ රඳවා තබා සිටි අය නිසාම ඔවුන්ට එරෙහිව රජයේ ආරක්ෂක හමුදා විසින් සිදු කරන ලද අපරාධ හිතා මතාම නොතකා හැර ඇති බව ITJP සංවිධානය “ශ්‍රී ලංකා නාවික හමුදාව: සාමුහිකව ඇස් වසා ගැනීම (The Sri Lankan Navy: Turning a Collective Blind Eye)” නම් වාර්තාවෙන් පෙන්වා දෙයි.

“අතුරුදහන් වූ හෝ මියගිය හෝ වින්දිතයන් මෙන් නොව අපරාධකරුවන් සම්බන්ධයෙන් සාක්ෂි දිය හැකි එම අඩවියේම සිරකොට සිටි ශ්‍රී ලංකාවේත්, විදේශවලත් තවමත් ජීවතුන් අතර ඉන්නා ‘රාජ්‍ය ආරක්ෂක රැඳවියන්’ ජනමාධ්‍යයත්, මානව හිමිකම් ක්‍රියාධාරීන් සහ පොලිසියත් විසින් ඕනෑකමින්ම මගහැර ගොස් ඇත. ජීවතුන් අතර ඉන්නා මේ වින්දිතයන් පිළිගැනීමේ මැලිකම මතුවන්නේ එල්ටීටීඊ සාමාජිකයන් ගර්හාවට ලක් කිරීමත් ඔවුන් සටන් කළ නොහැකිව අත් අඩංගුවේ සිටියත්, සාමාන්‍ය වැසියන් හෝ ආරක්ෂක අංශ වල සාමාජිකයන් හා සමාන අයුරින් මානව හිමිකම් භුක්ති විඳිය යුතු නැති බවට හැඟීමක් පැවතීම නිසාය.”

පොලිස් පරීක්ෂණය 11 දෙනකු මුහුණ පෑ අපරාධයට පමණක් සීමා වීම ගැන කනගාටුව පලකරන ITJP සංවිධානය, ජීවතුන් අතර සිටින ගන්සයිට් වින්දිතයන්ට ආරක්ෂිතව සාක්ෂි දිය හැකි වන පරිදි විධිවිධාන සලසන්නේ නම්, ආයතනගත ලෙසින් වධහිංසා කරන ලද ආකාරය පමණක් නොව, අපරාධකාරී නිලධාරීන් හා අණ දෙන්නන් පිළිබඳවද වැදගත් තොරතුරු හෙළි කරගත හැකි වනු ඇතැයි අවධාරණය කරයි.

ගෝඨාභයගේ මැදිහත් වීම

දැනට පරීක්ෂණ පැවැත්වෙන අතුරුදහන් 11 දෙනා එල්ටීටීඊය හා සම්බන්ධ නැති පිරිසක් බව සියලුම ආරක්ෂක අංශවල බුද්ධි සේවා උපුටා දක්වමින් පොලිසිය විසින් අධිකරණය හමුවේ තහවුරු කොට තිබේ. අධිකරණයට ඉදිරිපත් කර ඇති පොලිස් වාර්තාවලින් හෙළිවන පරිදි රඳවාගෙන සිටින එල්ටීටීඊ සැකකරුවන්ට එරෙහිව සිදුකෙරෙන කටයුතු සම්බන්ධයෙන් පරීක්ෂණ පැවැත්වීම පොලිසියට තහනම් කර ඇත්තේ එවක ආරක්ෂක ලේකම් ගෝඨාභය රාජපක්ෂයි.

අතුරුදහන් 11 දෙනා පැහැරගෙන ගොස් ඇත්තේ සන්නද්ධ නාවික හමුදා නිලධාරීන් විසින් බව හෙළි කරගැනීමෙන් අනතුරුව ඒ සම්බන්ධයෙන් ගතයුතු පියවර සම්බන්ධයෙන් ආරක්ෂක ලේකම්වරයාගෙන් උපදෙස් ඉල්ලා සිටි අවස්ථාවේදී, “රාජ්‍ය ආරක්ෂාව සම්බන්ධයෙන් ඇති විමර්ශන හැර සියලුම නීති විරෝධී ක්‍රියාකාරකම් සම්බන්ධයෙන් විමර්ශන සිදු කරන ලෙසට” ගෝඨාභය රාජපක්ෂ විසින් එවක අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යෙෂ්ඨ පොලිස් අධිකාරී විජය අමරසිංහට නිර්දේශ කරන ලද බව ප්‍රධාන විමර්ශන නිලධාරී පොලිස් පරීක්ෂක නිශාන්ත සිල්වා 2017 මාර්තු 13 දා වාර්තාවෙන් කොළඹ කොටුව මහේස්ත්‍රාත් උසාවියට දැනුම් දී තිබුනි.

“රාජ්‍ය ආරක්ෂක රැඳවියන්” ලෙසින් හඳුන්වනු ලැබූ එල්ටීටීඊ සැකකරුවන් සිරකොට තබාගෙන සිටි බව කඳවුර භාර නිලධාරියා ලෙස කටයුතු කර ඇති 11 දෙනා අතුරුදහන් කිරීමේ නඩුවේ සැකකාර ලුතිනන් කොමාන්ඩර් සුමිත් රණසිංහ පොලිසියට ලබා දී ඇති කට උත්තරයෙන්ද සනාථ වෙයි.

“තමා යටතේ ත්‍රිකුණාමලය සාගරික විද්‍යා පරිශ්‍රය තුල පිහිටි ඝන්සයිඩ් නමින් හඳුන්වන ලද භූගත සිරමැදිරි තුල එල්ටීටීඊ සංවිධානයට අයත් නාවික හමුදා සාමාජිකයන් ආරක්ෂක අමාත්‍යාංශයේ අනුමැතිය යටතේ රඳවා තබාගෙන සිටි බවත් පසුව ඔවුන් අදියර දෙකක් යටතේ සමාජ ගත කරන ලද බවත්, ” සුමිත් රණසිංහ ප්‍රකාශ කළ බව රහස් පොලිසිය 2017 අගෝස්තුවේ අධිකරණයට දැනුම් දී ඇත. “මෙසේ රඳවා සිටි රැඳවියන් කිසිදු අවස්ථාවක නිරීක්ෂණය කිරීමට ත්‍රිකුණාමලය මහේස්ත්‍රාත්තුමා වෙත හෝ පොලිස් ස්ථානයක් වෙත හෝ මානව හිමිකම් හෝ රතුකුරුස සංවිධානය වෙත ඉදිරිපත් නොකළ බවද කියා සිටී.”

ගන් සයිට් බිම්ගෙයි වද විඳ බේරාගත් අයකු ITJP සංවිධානයට ප්‍රකාශ කර ඇති පරිදි 2009 සිට 2012 දක්වා කාල පරිච්ඡේදයේ දී අල්ලා ගන්නා ලද එල්ටීටීඊ සැකකරුවන් විශාල සංඛ්‍යාවක් රහසිගත කඳවුරේ සිරගත කොට තබාගෙන ඇත.

මේ අතර ධීවර යාත්‍රා වල නැගී මුහුදු මගින් යුදකලාපයෙන් පලා යන්නට උත්සාහ කරද්දී අත් අඩංගුවට ගන්නා ලද අයද වෙයි.

පළමුව පේදුරු තුඩුවට ගෙනයන ලද ඔවුන් එතනින් ත්‍රිකුණාමල නාවික කඳවුරේ වධකාගාරයට බෝට්ටුවෙන් එවන ලද බව වාර්තාවේ සඳහන් වෙයි. මීට අමතරව කර්නල් සූසෙයි නමින් ප්‍රකට මුහුදු කොටි බලකායේ නායක තිල්ලෙයම්පලම් සිවනේසන්ගේ බිරිඳ හා දරුවන් ඇතුළු සාමාන්‍ය වැසියන් පිරිසක්ද මුහුදේදී අත් අඩංගුවට ගන්නා ලදුව නාවික කඳවුරේ නිවස්න වල අවුරුදු දෙකකට වැඩි කලක් රඳවා තබා තිබේ.

නාවික නිලධාරීන් දුන් තොරතුරු

ගන්සයිට් බිම්ගෙයි හිටපු සිරකරුවන් විසින් ITJP වාර්තාවට රහසිගතව ලබා දී ඇති සාක්ෂි පොලිස් පරීක්ෂණ වලින් හෙළිකරගත් තොරතුරු වලින් ඔබ්බට යමින් නීති විරෝධී සිරගතකිරීම්, වධහිංසා සහ අතුරුදහන් කිරීම් වලට නාවික හමුදා නිලධාරීන්ගේ ඇති සම්බන්ධය සනාථ කරන බව ITJP සංවිධානය පවසයි. තමන්ට තොරතුරු ලබා දුන් අය විසින් අඳින ලද රූප සටහන් හා සිතියම් මෙන්ම වධකාගාරයේත්, අපරාධ සහායක චෝදනා ලබන උසස් නාවික නිලධාරීන්ගේත් ඡායාරූපද පලකර ඇති වාර්තාවේ දැක්වෙන පරිදි ගන්සයිට් අඩවිය කොටස් තුනකින් සමන්විත වෙයි. එම තොරතුරු ලබා දුන් අය අතර දෙමළ සිරකරුවන්ට අමතරව කඳවුරේ රාජකාරි කළ නාවික භටයන් ඇතුළු සිංහලයන්ද ඉන්නා බව ITJP පවසයි.

එක් සාක්ෂිකරුවකු උපුටා දක්වන ITJP පවසන පරිදි ගන්සයිට් 2 හා 3 තුල සිරගත කොට අවුරුදු තුනක් තිස්සේ වදහිංසා පමුණුවා තිබේ. වධකයන් දිගින් දිගටම බල කර ඇත්තේ ත්‍රිකුණාමල දිස්ත්‍රික්කයේ ආයුධ සඟවා ඇති ස්ථාන මෙන්ම අනිකුත් එල්ටීටීඊ සාමාජිකයන් හා හිතවතුන්ගේ නම් ද හෙළි කරන ලෙසයි.

වසර ගණනාවක් සිරගතකොට සිටි තවත් සාක්ෂිකරුවකු පවසා ඇති පරිදි කල් යත්ම සිර කඳවුරේ සිටි සංඛ්‍යාව කෙමෙන් කෙමෙන් අඩු වී තිබේ. මුලදී පනහක් පමණ සිටි සිරකරුවන් ගණන ඔහුගේ රැඳවුම් කාලයේ අවසාන භාගයේදී දෙදෙනකු, තුන්දෙනකු තරමට අඩුවී තිබේ.

“සමහරවෙලාවට අපේ කෑම්ප් එකෙන් හිරකාරයෝ අරන් යන්න වාහනයක් එනවා. සාමාන්‍යයෙන් එන්නේ රෑට. ඒත් දෙපාරක් දවල්ටත් ආපු ඒ වාහනේ තද නිල් පාට වෑන් එකක් කියලා මම දැක්කා. වාහනේ එනකොට පොලොව යට සෙල් වලින් කෑමොර දෙනවා ඇහෙනවා. ඒක ඇහුනේ හරියට වෑන් එකට ගෙනියන එක නවත්තන්න මිනිස්සු වීරිය කරනවා වගෙයි. වෑන් එක අවොත් ගියාට පස්සේ ඉන්න ගාන අඩුවෙලා වගේ තේරුනා. මට තේරුනු විදියට ගෙනිච්චි අය ආපහු ආවේ නෑ. මේ අය තව රැඳවුම් කඳවුරකට ගෙනිච්චද නැතිනම් වෙන මොකක් හරි උනාද කියලා මම දන්නේ නෑ.”

2008 සැප්තැම්බරයේදී තවත් සිව්දෙනකු සමග දෙහිවලදී පැහැරගන්නා ලද රජීව් නාගනාදන් ගේ මව සරෝජිනී නාගනාදන් අධිකරණයට පවසා තිබුනේ ගන් සයිට් වධකාගාරයේ සිට සිය දුරකතනයෙන් කතාකළ තම පුත්‍රයා කී පරිදි ගැටවර වියේ තරුණ තරුණියන් එහි ගෙනවිත් වෙඩි තබා මරා දමා ඇති බවයි.

ගන් සයිට් අඩවියේ දී ලිංගික හිංසනයට ගොදුරු වීම පිළිබඳවද ඇතැමුන් තොරතුරුද තමන් සතුව ඇති බව ITJP කියා සිටී.

වධකාගාරය සම්බන්ධයෙන් ITJP සංවිධානයට රහසිගතව දෙන ලද තොරතුරු කොළඹ කොටුව මහේස්ත්‍රාත් අධිකරණයට ඉදිරිපත් වී ඇති නිල ලේඛන වලින්ද තහවුරු කෙරේ. 2015 නොවැම්බරයේ ත්‍රිකුණාමල නාවික හමුදා කඳවුරට ගිය එක්සත් ජාතීන්ගේ නියෝජිත කණ්ඩායමද මානව හිමිකම් මණ්ඩලයට ඉදිරිපත් කළ වාර්තාවේද නිගමනය වන්නේ ගන්සයිට් අඩවියේ වධහිංසා සිදුකරන ලද බවයි.

Facebook Comments

wedding people