ගෙදර යන ගමං එල්ලා මැරීමේ ජනපති සිහිනය බොඳවේ

0

තම ධුරයෙන් විශ්‍රාම ගැනීමට පෙර මරණ දණ්ඩනය ක්‍රියාත්මක කිරීමේ ජනාධිපති අපේක්ෂාවට උසාවිය හරස් වී තිබේ.

මරණීය දණ්ඩනය ක්‍රියාත්මක කිරීමට ජනාධිපතිවරයා විසින් ගනු ලැබු තීරණයක් ක්‍රියාත්මක කිරීම වළක්වාලමින් පනවා තිබූ තහනම් නියෝගය දෙසැම්බර් මස 10 වැනිදා දක්වා තවදුරටත් දික් කිරීමට ශ්‍රේෂ්ඨාධිකරණය නියම කර ඇත.

මරණීය දණ්ඩනය ක්‍රියාත්මක කිරීම වැළැක්වීමේ නියෝගයක් නිකුත් කරන මෙන් ඉල්ලා ගොනුකර තිබූ මූලික අයිතිවාසිකම් පෙත්සම් 15 ක් බුවනෙක අලුවිහාරේ, එස්. තූරෙයිරාජා සහ ගාමිණි අමරසේකර යන මහත්වරුන්ගෙන් සමන්විත ත්‍රිපුද්ගල විනිසුරු මඩුල්ල හමුවේ 29 අඟහරුවාදා කැඳවු අවස්ථාවෙදී එම තහනම දික් කිරීමට නියෝග කළේය.

ශ්‍රේෂ්ඨාධිකරණය විසින් මරණ දඬුවම දීමට තමන් ගත් තීරණය අනුමත කලහොත් ධුරයෙන් විශ්‍රාම යාමට පෙර එල්ලුම් ගහ ක්‍රියාත්මක කරන බවට ජනාධිපති මෛත්‍රීපාල සිරිසේන පසුගිය දා කියා තිබුනි.

“තව දවස් කීපයකින් ආපහු ඒ නඩු දිනේ තියෙනවා. ඉතින් මම දන්නෙ නෑ ශ්‍රේෂ්ඨාධිකරණ විනිසුරු තුමන්ලා මොන තීන්දුවක් ගනීද කියලා. මරණීය දණ්ඩනය දෙන්න බැහැ කියලා ශ්‍රේෂ්ඨාධිකරණයෙන් තව කල් දාලා හරි එහෙම දෙයක් කලොත් මරණීය දණ්ඩනය දෙන එක කරන්න මට බැරුව යනවා. හැබැයි ශ්‍රේෂ්ඨාධිකරණය මරණීය දණ්ඩනයට මට ඉඩ දීලා ඒ නඩුව අවසන් කලොත් මම මගේ නිල කාලය යන්න කලින් මරණීය දණ්ඩනය දීලයි මම යන්නේ.”

හතලිස් වසරක් තිස්සේ නවතා දමා තිබු මරණීය දණ්ඩනය ක්‍රියාත්මක කිරීමට ජාත්‍යන්තර හා දේශීය වශයෙන් නැගෙන විරෝධතා නොතකා සිය අනුමැතිය ලබා දුන් බව ජනපති මෛත්‍රීපාල සිරිසේන පසුගිය ජුනි මාසයේ මාධ්‍ය ආයතන ප්‍රධානින් හමුවේ පැවසීය.

ශ්‍රී ලංකා මානව හිමිකම් කොමිසම, යුරෝපා සංගමය සහ ප්‍රබල තානාපති කාර්යාල කිහිපයක්ම මරණ දණ්ඩනය ක්‍රියාත්මක කිරීමට ගත් තීරණය ආපසු හරවන ලෙසට පසුගිය වසරේ ජනාධිපතිවරයාගේ ලිඛිතව ඉල්ලා තිබුනි.

කෙසේ වෙතත්, ප්‍රජාතන්ත්‍රවාදී පෙරමුණේ ජනපති අපේක්ෂක සජිත් ප්‍රේමදාස ද තමන් බලයට පත්වුවහොත් දේශිය හා විදේශිය නැ‍ගෙන විරෝධය නොතකා මත්ද්‍රව්‍ය ඡාවාරම්කරුවන් හට මරණ දඬුවම ලබා දෙන බව ප්‍රකාශ කර ඇත.

Facebook Comments

wedding people