රජයේ ආරක්ෂක අංශ විසින් අතුරුදහන් කරවු තම නෑසියන් පිළිබඳව තොරතුරු හෙළි කරන ලෙස බල කරමින් ආරම්භ කර තිබු උපවාසය රාජ්‍ය ආරක්ෂක ඇමතිවරයාගේ ලිඛිත පොරොන්දුව මත තාවකාලිකව නවතා දමා ඇත.
වව්නියාවේදී උපවාසය පැවැති ස්ථානයට රජයේ නියෝජිතයා ලෙස ඊයේ (26) පැමිණි ආරක්ෂක රාජ්‍ය අමාත්‍ය රුවන් විජේවර්ධන ලබා දුන් ලිඛිතව පොරොන්දු වී ඇත්තේ පෙබරවාරි 09 දා තමන්ද සමග උපවාසකරුවන්ට අගමැතිවරයා සහ නීතිපතිවරයා සමග සාකච්ඡාවක් ලබා දීමට කටයුතු කරන බවයි.
එම පොරොන්දුව අනුව පිරිස තාවකාලිකව සිය උපවාසය අත්හළ අතර උපවාසයේ නිරතවුවන්ට ආරක්ෂක රාජ්‍ය අමාත්‍යවරයා ජලය පොවමින් උපවාසය අවසන් කරන ලදී.
සිරකරුවන්ගේ සහය
වව්නියේ පැවති උපවාසයට සහය පල කරමින් දෙමළ දේශපාලන සිරකරුවන් 26 බ්‍රහස්පතින්දා එක් දින සංකේත උපවාසයක නිරත විය.
ත්‍රස්තවාදය වැලැක්වීමේ පනත යටතේ අත්අඩංගුවට ගෙන කොළඹ මැගසින් බන්ධනාගාරයේ සහ අනුරාධපුර බන්ධනාගාරයේ රඳවා සිටින සැකකරුවන් පිරිසක් මෙලෙස ආහාර වර්ජනයේ නිරත වු බවයි දේශපාලන සිරකරුවන් නිදහස් කර ගැනීමේ ජාතික ව්‍යාපාරය කියා සිටියේ.
උපවාසයේ නිරතව සිටි පිරිසයට සහාය දක්වමින් යාපනය නල්ලුර් කෝවිල ඉදිරිපිටද උද්ඝෝෂනයක් ක්‍රියාත්මක කිරීමට අතුරුදහන්වුවන් සහ දේශපාලන සිරකරුවන් වෙනුවෙන් පෙනී සිටින උතුරේ සංවිධානයක් කටයුතු කර තිබුණි.
මහ ඇමති ජනපතිට ලියයි
මාරාන්තික උපවාසයක නිරතව සිටින පිරිස ආරක්‍ෂා කරන්නැයි උතුරු පළාත් මහ ඇමැති සී.වි. විග්නේෂ්වරන් ජනාධිපතිවරයා වෙත ලිපියක් යොමු කරමින් ඉල්ලා තිබේ.
උපවාස භූමියට රජයේ ඉහල බලධාරියකු පැමිණ නිශ්චිත විසඳුමක් ලබා නොදුනහොත් ජනතාව ආණ්ඩුව කෙරෙහි තබා ඇති විශ්වාසය බිද වැටිය හැකි බවද එම ලිපිය මඟින් ජනාධිපති මෛත්‍රීපාල වෙත අනතුරු අඟවා ඇත.
“උපවාසයේ නිරත එක කාන්තාවක් අත ඇති ඡායාරූපයක ඇගේ අතුරුදහන් දියණිය ඔබතුමා පසෙකින් හිටගෙන සිටින්නීය. අඩුම වශයෙන් ඇය ඉන්නා තැන හෝ වහාම සොයාබලා ඇගේ මෑණියන්ට බාර දීමට කටයුතු කළ හැකිය,” යැයි මහ ඇමති විග්නේස්වරන් සිය ලිපියෙහි වැඩි දුරටත් ලියා තිබේ.
Facebook Comments
