දහනම වෙනි සංශෝධනය 21වෙනි සංශෝධනය ආකාරයෙන් නැවත බලාත්මක කිරීම පළමු පියවර ලෙසත්, විධායක ජනාධිපති ක්‍රමය අහෝසි කිරීම දෙවන පියවර ලෙසත් සිදු කිරිමට පක්ෂ නායකයෝ එකඟ වී තිබේ.
21 වන ආණ්ඩුක්‍රම ව්‍යවස්ථා සංශෝධන කෙටුම්පත සම්බන්ධයෙන් සාකච්ඡා කිරීම සඳහා වන පක්ෂ නායක රැස්වීම අග්‍රාමාත්‍ය රනිල් වික්‍රමසිංහ ගේ ප්‍රධානත්වයෙන් අද (27) පස්වරුවේ අග්‍රාමාත්‍ය කාර්යාලය දි පැවැත්වුණ එතර එහිදී මෙම එකඟතාවයට පැමිණ ඇත.
ජනාධිපතිවරයාට ආරක්‍ෂක අමාත්‍යධුරය තබාගත හැකිද නැද්ද යන්න පිළිබඳව ද පක්ෂ නායකයන් තවදුරටත් සාකච්ඡා කිරීමට තීන්දුකර ඇත.
මෙම රැස්වීමේ අරමුණ වූයේ සංශෝධන කෙටුම්පත සම්බන්ධයෙන් පක්ෂ නායකයින්ට සිය නිරීක්ෂණ හා යොජනා ඉදිරිපත් කිරීමට ඉඩ සැලසීමයි.
21 වැනි ආණ්ඩුක්‍රම ව්‍යවස්ථා සංශෝධනය හැකි ඉක්මනින් සම්මත කළ යුතු බවට එහිදී පොදු එකඟතාවකට පැමිණ ඇත.
දෙමළ ජාතික සන්ධානයට අද රැස්වීමට පැමිණීමට නොහැකිවීම හේතුවෙන් ඔවුනගේ සහාභගිත්වය සමග ලබන සිකුරාදා (03) අවසන් රැස්වීමක් පවත්වා කෙටුම්පත අවසන් කිරීමට එම සාකච්ඡාවේදි තීරණය වි තිබේ.
මෙම සතිය තුළ කිසියම් පාර්ශ්වයකට වැඩිදුර පැහැදිලි කිරීම් ලබා ගැනීමට අවශ්‍ය නම් අධිකරණ අමාත්‍යවරයාගෙන් ඒ පිළිබඳව කරුණු විමසීමට හැකි බව ද අග්‍රාමාත්‍යවරයා නිවේදනය කර ඇත.
රැස්වීමට ජනතා විමුක්ති පෙරමුණ හැර සෙසු දේශපාලන පක්ෂ රැසක නියෝජිතයින් සහභාගි වූහ.
සමගි ජන බලවේගය නියෝජනය කරමින් පක්ෂයේ මහ ලේකම් රංජිත් මද්දුම බණ්ඩාර හා පක්ෂයේ නීතිඥයින් පිරිසක් එක්ව සිටියේය.
ශ්‍රී ලංකා නිදහස් පක්ෂය වෙනුවෙන් ඊට සහභාගි වූයේ එහි මහලේකම් දායාසිරි ජයසේකර සහ ජනාධිපති නීතිඥ ෆයිසර් මුස්තාපා යි.
ශ්‍රී ලංකා මුස්ලිම් කොංග්‍රස් නායක රාවුෆ් හකීම්, සමස්ත ලංකා ජනතා කොංග්‍රසයේ නායක රිෂාඩ් බදියුදීන්, දෙමළ ප්‍රගතිශීලි පෙරෙමුණේ නායක මනෝ ගනේෂන්, කම්කරු ජාතික සංගමයේ නායක පී. දිගම්බරන් යන මන්ත්‍රීවරුන් ද මෙම රැස්වීමට එක්ව සිටියේය.
උදය ගම්මන්පිල, ඩිලාන් පෙරේරා, වීරසුමන වීරසිංහ ඇතුළු පාර්ලිමේන්තු මන්ත්‍රීවරුන් රැසක් ද පැමිණියේය.
Facebook Comments
