යුද හමුදාව විසින් පවරාගෙන තිබෙන ඉඩම් නිදහස් කිරීම, දේශපාලන සිරකරුවන් නිදහස් කිරීම සහ අතුරුදහන් වුවන්ගේ ඥාතීන්ට සහන සැලසීම වැනි උතුරේ ජනයාගේ ඉල්ලීම් අනිවාර්යෙන්ම ඉටු කරන බවට රජයේ සම කැබිනට් ප්‍රකාශකවරයා සහතික වී ඇත.
එම ඉල්ලීම් යහපාලන රජය බලය ලබා ගැනීමට දෙමළ ජනයාට දුන් ප්‍රධානතම පොරොන්දු බව 11 බදාදා පැවති කැබිනට් තීරණ දැනුම් දීමේ මාධ්‍ය හමුවේදී ඇමැති රාජිත සේනාරත්න මාධ්‍ය වෙත කියා සිටියේය.
අග්‍රාමාත්‍ය රනිල් වික්‍රමසිංහට එරෙහි විශ්වාස භංගයට විරුද්ධව ඡන්දය පාවිච්චි කිරීම සඳහා දෙමළ ජාතික සන්ධානය පැනවූ කොන්දේසියක් ලෙසින් එම ඉල්ලීම් ඉටු කෙරෙන බවට ගෝඨාභය රාජපක්ෂගේ නායකත්වයෙන් යුත් එලිය සංවිධානය නගන චෝදනා ඇමැතිවරයා දැඩිව ප්‍රතික්ෂේප කරන ලද්දෙ දෙමළ ජාතික සන්ධානය කිසිදු කොන්දේසියක් ඉදිරිපත් නොකළ බව එම් ඒ සුමන්දිරන් මන්ත්‍රීවරයාද යාපනයේදී කරන ලද ප්‍රකාශය ද සිහිපත් කරමිනි.
“ඕවා තමයි කාලකන්නි මතවාද අහිංසක දුප්පත් මිනිහෙකුට ඉඩමක් දෙනකොට ඒකෙනුත් දේශාපාලන වාස ගන්න එක තමයි. ඒ තැන් වලට ගිහිල්ලා ඇස් දෙක ඇරල බලන්න ඒ මිනිස්සු විඳින දුකක්. තමන්ට හිමි වෙලා තිබුණ ඉඩමකින් දොට්ට දාලා” යැයි කැබ්නට් ප්‍රකාශකවරයා කියා සිටියේය.
“මේ ආමි එකේ බේකරිය දාල තියෙන්නෙත් මිනිස්සුන්ගේ ඉඩම් අරගෙනනේ. ආමි එකේ බේකරි දාගෙන ගෙවල් ගහගෙන මේක විකාරයක්නේ. දකුණේ ඇවිල්ල ගැහුවොත් මොකද තත්ත්වේ? ඔය කියන කට්ටියම තමයි රෙදි උස්සන් යන්නෙ මිනිස්සුන්ගේ ඉඩම් ගත්තයි කියලා.”
දෙමළ ජනතාවගේ ඉඩම් වහාම නිදහස් කරන ලෙස ඉල්ලා රජය තුල සටන් වදින බවට අමාත්‍ය රාජිත සේනාරත්න මාධ්‍ය හමුවේදී වැඩි දුරටත් සහතික විය.
Facebook Comments
