අපරාධ නඩුවක සාක්ෂි දීමට උතුරට යාමට බය වූ පොහොට්ටු ජනාධිපති අපේක්ෂකයා දෙමළ ඡන්ද ආයාචනා කිරීමට යාපනයට යාමෙන් ඔහු ජනතාව මුලාවේ දමන ආකාරය පැහැදිලි වන බව තවත් ජනාධිපති අපේක්ෂකයෙක් අවධාරණය කර තිබේ.
උතුරු නැගෙනහිර තමන්ට ආරක්ෂාවක් නැති හෙයින් එහි යාමට නොහැකි බවට අධිකරණයට ඒත්තු ගැන්වීමෙන් ගෝඨාභය රාජපක්ෂ උසාවියද නොමග යවා ඇති බව නව සම සමාජ පක්ෂ අපේක්ෂකයා පවසයි.
ගෝඨාභය රාජපක්ෂ ආරක්ෂක ලේකම් ධුරය දරන සමයේ අතුරුදහන්වු මානව හිමිකම් ක්‍රියාකාරීන් දෙදෙනෙකු වූ ලලිත් කුමාර් වීරරාජ් සහ කුගන් මුරුගානන්දන් වෙනුවෙන් යාපනයේ ගොනු කර හබයාස්කෝපුස් පෙත්සමට අදාළව ඔක්තෝබර් 27 දා අධිකරණයේ පෙනී සිටිය නොහැකි බවට ශ්‍රීලපොප අපේක්ෂකයා විසින් අභියාචනා අධිකරණයේ පෙත්සමක් ගොණු කර තිබුනේ ආරක්ෂාව තහවුරු වී නොමැති බව පවසමිනි.
එල්ටීටීඊය පරාජය කළ සමයේ තමන් ආරක්ෂක ලේකම් වශයෙන් සිටි බැවින් ආරක්ෂක හේතුන් මත යාපනය අධිකරණයේ පෙනී සිටිය නොහැකි බව සදහන් කරමින් ගෝඨාභය රාජපක්ෂ විසින් දක්වන ලද කරුණු පිළිගත් අභියාචනාධිකරණ විනිසුරු දීපාලි විජේසුන්දර ඔහු යාපනයට කැඳවීම අත් හිටුවන නොයෝගයක් නිකුත් කළාය.
උසාවි යාමට නියමිතව තිබුණු දිනයට පසුදා ඡන්ද ව්‍යාපාරයේ යෙදීමට උතුරු නැගෙනහිර යන හිටපු ආරක්ෂක ලේකම්ට “ඡන්ද හිඟා කෑමට” ආරක්ෂක ගැටළු මතුවන්නේ අපරාධ චෝදනා මගහැර යාමට බව නසසප ජනාධිපති අපේක්ෂකයා පවසයි.
“ලංකාවේ වැඩිම හමුදා ප්‍රමාණයක් ඉන්න උතුරු නැගෙනහිර ආරක්ෂාව මදි කියලා හිටපු ආරක්ෂක ලේකම් උසාවි යන්න බයයි. හැබැයි තමන්ට ජන්ද ඕනෙ වුනාම ජන්ද හිඟා කන්න යනවා ඒකට ආරක්ෂාව ප්‍රශ්නයක් නෑ. එතකොට මේ ආරක්ෂක කතාව උසාවිය නොමග යැවීමක්. මෙහෙම තමයි ජනතාව මුලා කරන්නේ තමන්ට තියෙන අපරාධ චෝදනා වලින් කට්ටි පනින්නෙ මෙහෙමයි. අධිකරණයේ ස්වාධීනත්වය විහිලුවට අරන් එයා දාන සෙල්ලම් නොවැම්බර් 16 වැනිදාට ඉවරයි. අන්න එදායින් පස්සේ හොඳටම ආරක්ෂා සහිතව තමන් කරපු අපරාධ වලට වන්දි ගෙවන්න පුලුවන් වැලිකඩට වෙලා,” යැයි නසසප අපේක්ෂක බද්දේ ගමගේ නන්දිමිත්‍ර කියා සිටියේය.
ආරක්ෂාව නොමැති බව පවසමින් යාපනය මහේස්ත්‍රාත් අධිකරණයට කැඳවීම වලක්වා ගැනීමෙන් අධිකරණය නොමඟ යවා ඇති ගෝඨාභය රාජපක්ෂ අධිකරණයට අපහාස වන ආකාරයට කටයුතු කරමින් සිටින බවද නසසප ජනාධිපති අපේක්ෂකයා සිලෝන් නිව්ස් අමතමින් සඳහන් කළේය.
මේ සම්බන්ධයෙන් පැමිණිල්ලක් ගොනු කිරීමට නීතිඥ උපදෙස් ලබා ගනිමින් සිටින බවද නව සම සමාජ පක්ෂ ජනපති අපේක්ෂක බද්දේ ගමගේ නන්දිමිත්‍ර වැඩි දුරටත් පැවසීය.
Facebook Comments
