යුද පීඩිත පවුල් දහස් ගණනකට ‘අස්වැසුම’ ත් නෑ

ජනාධිපති රනිල් වික්‍රමසිංහගේ යටතේ ක්‍රියාත්මක වන දිළිඳු සහනාධාර වැඩපිළිවෙල සදහා පුද්ගලයන් තෝරාගැනීමේදී, සුදුසුකම් සහිත සුවිශාල පිරිසක් කපා හැර ඇති බවට චෝදනා කරමින් රට පුරා විරෝධතා මාලාවට මුලතිව් දිස්ත්‍රික්කයද එක්වී සිටී.

විශ්වාස කටයුතු සංඛ්‍යාලේඛන අනුව යුද පීඩිත පවුල් දහස් ගණනකට ද එම ප්‍රතිලාභය අහිමී වී ඇත.

පළාත් බද මාධ්‍යවේදීන්ට අනුව මුලතිව් දිස්ත්‍රික්කයේ පමණක් සමෘද්ධි සහනාධාරය ලැබු පිරිස 23901 ක් වන අතර ජුලි 1 වැනිදා සිට ක්‍රියාත්මක වීමට නියමිතව තිබු අස්වැසුම” සුබසාධක ප්‍රතිලාභ සදහා තෝරාගෙන ඇත්තේ 16211 ක් පමනි.

ජුනි 27 වැනිදා පුදුකුඩිඉරිප්පු උදයාර්කට්ටු සමෘධි බැංකුව ඉදිරිපිිට සිය ඉල්ලීම් ඇතුලත් සටන් පුවරු ප්‍රදර්ශනය කරමින් විරෝධතා දියත් කළ මුංගිලාරු, උඩයාර්කට්ටු, තේරාවිල් ඇතුළු ගම්වැසියන් අවධාරණය කළේ ප්‍රතිලාභ ලැබීමට සුදුසුකම් සහිත විශාල පිරිසකගේ නම් අලුතින් සකස් කළ නාම ලේඛනයට ඇතුලත්ව නොමැති බවයි.

අස්වැසුම සුබසාධක ප්‍රතිලාභ ලැබීමට සුදුසුකම් සහිත සියළු දෙනාට එම ප්‍රතිලාභ ලබා දෙන ලෙස ඔවුහු එහිදී ජනාධිපතිවරයාගෙන් ඉල්ලීම් කළහැ.

විරෝධතා දියත් කළ ගම්වැසියන් පුදුකුඩිඉරිප්පු ප්‍රාදේශිය ලේකම් එස්. ජෙයකාන්ත් හා මුලතිව් වැඩ බලන දිස්ත්‍රික් ලේකම් කේ. කගගේෂ්වරන් වෙත සිය ඉල්ලීම් ඇතුලත් සංදේශයක් භාර දීමට කටයුතු කළ බව පළාත් බද වාර්තාකරුවෝ වැඩි දුරටත් පවසති.

එම සංදේශයේ ඇතුලත් කරුණු සිවිල් සමාජ ක්‍රියාධර තම්බයියා යෝගේෂ්වරන් මාධ්‍යවේදීන් හා විරෝධතාකරුවන් හමුවේ ඉදිරිපත් කළේය. ඉතා දිළිඳු ජනතාවක් සිටින මුලතිව් දිස්ත්‍රික්කයේ පවුල් දහස් ගණනක් මෙම යෝජනා ක්‍රමයට ඇතුළත් නොකිරීම නිසා හටගත් වේදනාකාරී බව එහි සදහන්ව තිබේ.

” අපේ උතුරු පළාත පහුගිය යුද්ධයෙන් ගොඩක් දුක් වින්දා දැන් ටිකක් හුස්ම ගන්නවා. මෙම තත්ත්වයෙන් වැඩිම බලපෑමට මුහුණ පා සිටින්නේ මුලතිව් දිස්ත්‍රික්කය බව කවුරුත් දන්නා කරුණකි. නැවත පදිංචි වූ ජනතාව තම උපන් ප්‍රදේශවලින් කදවුරු වෙත හිස් අතින් ගිය දුක්ඛිත තත්ත්වය වචනවලින් විස්තර කළ නොහැක. එසේම කාන්තා මූලික පවුල්, වැන්දඹු පවුල්, වැන්දඹු සහ අතුරුදහන් වූවන් ඉතා ඉහළ මට්ටමක පවතී. ඉතා දිළිඳු ජනගහනයක් සිටින පවුල් මෙම යෝජනා ක්‍රමයට ඇතුළත් නොකිරීම ඉතා වේදනාකාරී ය.”

ජුනි 28 වැනිදා මුලතිව් දිස්ත්‍රික් ලේකම් කාර්යාලය ඉදිරිපිටට රැස්වු මුලතිව් කේපාපිලව් ප්‍රදේශයේ ජනයා ද අවධාරණය කර තිබුනේ මේතාක් සහනාධාර ලැබු තමන්ගේ නම්ද අලුත් ලේඛනයෙන් ඉවත් කර ඇති බවයි.

සිය ඉඩම් යුද හමුදාව විසින් බලහත්කාරයෙන් අල්ලාගෙන සිටීම නිසා ජීවිකාව අහිමි වී මහත් පීඩාවට පත්ව සිටින තමන්ට සුබසාධන දීමනාද කප්පාදු කර තිබීම සම්බන්ධයෙන් ඔවුන් එහිදී කනස්සල්ල පළ කර තිබුනි.

අභියාචනය කරන්නේ කොහොමද?

විරෝධතාකරුවන් සමග සාකච්ඡා පැවැත් වු මුලතිව් වැඩ බලන දිස්ත්‍රික් ලේකම් කේ කනගේස්වරන් ඔවුන්ට පොරොන්දු වී තිබුනේ සහනාධාර ලැබීමට සුදුසු සියළු දෙනා වෙත සහනාධාර ලබා දීමට කටයුතු කරන බවයි. ජුනි 10 වැනිදා දක්වා නැවත අභියාචනා ඉදිරිපත් කළ හැකි අය වෙත දැනුම් දීමටත් දිස්ත්‍රික් ලේකම් කටයුතු කර තිබේ.

සුබසාධක ප්‍රතිලාභ ලබා ගැනීමට සුදුසුකම් සහිත තමන්ගේ නම් ඉවත් කර ඇති බවට චෝදනා කරමින් පසුගිය දින කිහිපය තුළ උතුරු නැගෙනහිර දිස්ත්‍රික්ක ඇතුළු රට පුරා විරෝධතා මාලාවක් දියත් කර තිබුනි.

අස්වැසුම සුබසාධක ප්‍රතිලාභ ලබා ගැනීමට සුදුසුකම් නොලැබූ පුද්ගලයන්ට සහ පවුල් ඒකකවලට ඒ සඳහා හිමිකම් පෑමේ අභියාචනයක් ඉදිරිපත් කළ හැකි බව අස්වැසුම සුඛසාධක ප්‍රතිලාභ මණ්ඩලය සදහන් කරයි. එම අභියාචනා ලබන මස 10 වැනි දින දක්වා භාරගන්නා බව ඔවුන් නිවේදනය කර තිබේ.

රට පුරා සෑම ප්‍රාදේශීය ලේකම් කාර්යාලයකම සහ ගම් මට්ටමේ ඇති රජයේ කාර්යාලවල එම ප්‍රදේශයේ අස්වැසුම ප්‍රතිලාභ ලබා ගැනීමට සුදුසුකම් ලැබූවන්ගේ නාම ලේඛන මහජන ප්‍රදර්ශනයට තබා ඇත.

යම් පුද්ගලයකුට හෝ පවුල් ඒකකයකට හෝ අභියාචනා ඉදිරිපත් කිරීමට ක්‍රම දෙකක් ලබා දී ඇති අතර ඉන් පළමුවැන්න සුබසාධක ප්‍රතිලාභ මණ්ඩලයේ www.wbb.gov.lk යන වෙබ් අඩවියට පිවිසීමයි.

දෙවැනි ක්‍රමය වන්නේ තමන් අතින් පුරවා සකස් කරන ලද අයදුම්පතක් ප්‍රාදේශීය ලේකම් කාර්යාලයට භාර දීමයි.

අස්වැසුම් ප්‍රතිලාභ ලබා ගැනීමට සුදුසුකම් ලබා ඇති පුද්ගලයකුට විරෝධතා දැක්වීමට ද හැකි අතර, එම විරෝධතා නිර්නාමිකව හෝ ඉදිරිපත් කිරීමේ අවස්ථාව තිබේ.

1924 අමතන්න

යම් අයකුට තව දුරටත් ගැටලුවක් වේ නම් 1924 දුරකතන අංකයට කතා කර වැඩි විස්තර දැන ගත හැකි බව සුඛසාධක ප්‍රතිලාභ මණ්ඩලය පවසයි.

රජය පසුගිය මාසයේ නිවේදනය කර තිබුනේ සංක්‍රාන්තික, අවදානමට ලක් වූ, දුප්පත් හා අන්ත දිළිඳු යන සමාජ කාණ්ඩ 04ක් යටතේ “අස්වැසුම” සුබසාධක ප්‍රතිලාභ ගෙවීම් සිදු කෙරෙන අතර ආබාධිත තැනැත්තන්, වැඩිහිටි සහ වකුගඩු රෝගීන් සඳහා ද සුපුරුදු පරිදි අදාළ දීමනා ලබා දෙනු ලැබන බවයි.

ජනාධිපති මාධ්‍ය අංශය මැයි මාසයේ නිවේදනය කර ඇති පරිදි මෙහිදී සංක්‍රාන්තික ප්‍රතිලාභීන් 400,000ක් සඳහා මාසිකව රුපියල් 2500.00 බැගින් 2023 දෙසැම්බර් 31 වනදා දක්වාද, අවදානමට ලක් වූ ප්‍රතිලාභීන් 400,000ක් සඳහා මාසිකව රුපියල් 5000.00 බැගින් 2024 මාර්තු 31 වනදා දක්වාද ලබා දීමට නියමිත අතර, දුප්පත් ප්‍රතිලාභීන් 800,000ක් සඳහා මාසිකව රුපියල් 8500.00 බැගින් සහ අන්ත දිළිඳු ප්‍රතිලාභීන් සඳහා මාසිකව රුපියල් 15,000.00 බැගින් 2023 ජූලි 01 වනදා සිට වසර තුනක කාලයක් ලබා දීමට නියමිතය.

දැනට සුබසාධක ප්‍රතිලාභ ලබන ආබාධිත තැනැත්තන් 72,000ක් සඳහා මාසිකව රුපියල් 5000.00 බැගින්ද, වකුගඩු ආධාර ලබන තැනැත්තන් 39,150ක් සඳහා රුපියල් 5000.00 බැගින්ද, වැඩිහිටි ආධාර ලබන තැනැත්තන් 416,667ක් සඳහා රුපියල් 2000.00 බැගින්ද ලබා දෙනු ඇත.

නිකං කෑමේ දේශපාලනය

විරෝධතාකරුවන් හෙලා දකින ජනාධිපති ලේකම් කාර්යාලය ‘සැබෑ ලෙසම සහන ලැබිය යුතු පිරිසක්’ සිටින බව ද පිලිගෙන තිබේ.

“සමෘද්ධිය – අත පය තියාගෙන නිකං කෑමේ දේශපාලනය!” මැයෙන් ජුනි 29 වැනිදා බෙදාහරින ලද ලිපියක් මගින් ජනාධිපති ලේකම් කාර්යාලයේ ප්‍රජා කටයුතු අධ්‍යක්ෂ ජෙනරාල් රජිත් කීර්ති තෙන්නකෝන් අවධාරණය කර ඇත්තේ සැබෑ ලෙසම සහන ලැබිය යුතු පිරිස ලක්ෂ 5 ට ආසන්න බවයි.

“ඉද හිට උද්ඝෝෂණයේ දී දකින්නට ලැබෙන, මෙයට පෙර සමෘද්ධි නොලැබුණු, මෙවර ද සහන ලැබී නැති පිරිසක් ද වෙති. රටේ අන්ත අසරණ, හිසට වහලක් නැති, රෝගී, වයෝවෘද මේ පිරිස සැබෑ ලෙසම සහන ලැබිය යුතු අයයි. මේ පිරිස ලක්ෂ 5 කට ආසන්නය.”

රජය පසුගිය මාසයේ නිවේදනය කර තිබුනේ සුබසාධක ප්‍රතිලාභ ලබා ගැනීම සදහා දිවයින පුරා ප්‍රාදේශීය ලේකම් කොට්ඨාස 340කින් ලැබි තිබෙන අයදුම්පත් අතුරින් මෙම සුබසාධක ප්‍රතිලාභ ගෙවීම සඳහා සුදුස්සන් හඳුනා ගැනීමේ වැඩසටහනෙහි තොරතුරු තහවුරු කර ගැනීමේ ක්‍රියාවලිය සිදු වෙමින් පවතින අතර දැනට තොරතුරු තහවුරු කොට අවසන් කර ඇති අයදුම්පත් අතරින් වැඩිම ප්‍රමාණයක් වව්නියාව දිස්ත්‍රික්කයෙන් වන අතර, එය ප්‍රතිශතයක් ලෙස 98 % ක් බවයි.

“පිළිවෙළින් මහනුවර දිස්ත්‍රික්කයෙන් 96.5% ක්, කිලිනොච්චි දිස්ත්‍රික්කයෙන් 96% ක්, යාපනය දිස්ත්‍රික්කයෙන් 96% ක් සහ ත්‍රිකුණාමලය දිස්ත්‍රික්කයෙන් 95.5% ක් ආදී වශයෙන් සමස්ත දිවයිනම ආවරණය වන පරිදි අයදුම්පත් 3,362,040ක තොරතුරු තහවුරු කර ගැනීම මේ වන විට සිදුකර තිබේ.” ජනාධිපති මාධ්‍ය අංශය පසුගිය මාසයේදී නිවේදනය කර තිබුනි.

ආර්ථික සවියක් අවැසි පුද්ගලයන්ට සහාය වීමට ආරම්භ කළ අස්වැසුම සුබසාධක ප්‍රතිලාභ ලබාදීමේ වැඩසටහන පිළිබඳ ඇතැම් පාර්ශ්වයන් සමාජය තුළ ගෙන යන වැරදි ප්‍රචාර හේතුවෙන් මේ වන විට ගැටලුකාරී තත්ත්වය රට පුරා මතුව ඇති බව පවසන මුදල් රාජ්‍ය අමාත්‍ය ෂෙහාන් සේමසිංහ “අස්වැසුම” සමාජ සුබසාධක ප්‍රතිලාභ ලබාදීමේ වැඩසටහන පිළිබඳ ජුනි 27 වැනිදා ජනාධිපති මාධ්‍ය කේන්ද්‍රයේ පැවති මාධ්‍ය සාකච්ඡාවට එක් වෙමින් සදහන් කර තිබුනේ වන විට ප්‍රසිද්ධියට පත් කර ඇති නාම ලේඛනය කිසිසේත්ම අවසන් ලේඛනය නොවන බව යි.