එක්සත් ජාතික පෙරමුණේ ඉදිරි ජනපතිවරණ අපේක්ෂකයා ලෙස අමාත්‍ය සජිත් ප්‍රේමදාස හට අවස්ථාව ලබා ගැනීමට අවශ්‍ය මෙහෙයුම හා ප්‍රචාරණය සම්බන්ධව මංගල සමරවීර ඇමැතිවරයාගේ නිවසේ සාකච්ඡාවක් පවත්වා තිබේ.
මංගල සමරවීර අමාත්‍යවරයාගේ නිල නිවසේ පැවති එම සාකච්ඡාවට සජිත් ප්‍රේමදාසට සහය දක්වන මන්ත්‍රීවරුන් 30කට වැඩි පිරිසක් සහභාගී වී ඇති අතර එජාප සභාපති කබීර් හෂීම්, හිටපු සභාපති මලික් සමරවික්‍රම, රංජිත් මද්දුම බණ්ඩාර, ගයන්ත කරුණාතිලක, හරින් ප්‍රනාන්දු, චන්ද්‍රානි බණ්ඩාර, රවින්ද්‍ර සමරවීර ඇතුළු මැති ඇමතිවරුන් රැසක් ද මේ අවස්ථාවට එක්ව ඇත.
සජිත් ප්‍රේමදාස අමාත්‍යවරයා හට අපේක්ෂකත්වය ලබා ගැනිමේ ආරම්භක පියවරක් ලෙස එජාප නායකයා වෙත බාර දීමට සන්දේශයක් අත්සන් තැබීම ද මෙම හමුවේදී සිදුව ඇති බවයි වාර්තා වන්නේ.
එම හමුවට පැමිණ සිටි මන්ත්‍රීවරු 33 දෙනාම ඊට අත්සන් තැබූ අතර 29 බ්‍රහස්පතින්දා දහවල් වන විට එජාප මන්ත්‍රීවරු 50 දෙනෙකුට වැඩි පිරිසක් එම ලියවිල්ලට අත්සන් තබා ඇත බව දැනගන්නට ලැබුණි.
පාර්ලිමේන්තුව තුල එක්සත් ජාතික පක්ෂය නියෝජනය කරන මන්ත්‍රීවරු ගණන 77ක් වන අතර ඉන් 60කට වැඩි පිරිසක් සජිත් ප්‍රේමදාස අපේක්ෂකයා කිරීමට සහාය පල කරන බවයි දේශපාලන ආරංචි මාර්ග පවසන්නේ.
රාජිත සේනාරත්න සහ චම්පික රණවක ද සජිත් ප්‍රේමදාස ජනාධිපති අපෙක්ෂක්යා වීම සම්බන්ධයෙන් සිය එකඟත්වය පළ කර ඇති බවට මාධ්‍ය විසින් වාර්තා කර ඇත.
Facebook Comments
