මුලතිව් දිස්ත්‍රික්කයෙන් හමු වූ සමූහ සුසානයක් යැයි සැක කරන භූමියේ කැනීම් කටයුතු ජාත්‍යන්තර අධීක්ෂණය යටතේ සිදුකරන ලෙස දෙමළ ජනතා නියෝජිතයකු ඉල්ලා සිටී.
යුද්ධයෙන් පීඩාවට පත් මුලතිව් දිස්ත්‍රික්කයේ මධ්‍යම කොක්කුතුඩුවායි ප්‍රදේශයේ ජලනල එළීමට පොළව හාරමින් සිටියදී සිරුරු කොටස් සහ ඇඳුම් හමුවූ භූමියේ කැනීම් ටී සරවනරාජා මහේස්ත්‍රාත්වරයාගේ නියෝගය පරිදි ජුලි 6 වැනි බ්‍රහස්පතින්දා ආරම්භ කිරීමට නියමිතව තිබියදී, දෙමළ ජනතාව තුළ භීතිය සහ කනස්සල්ල තවදුරටත් වැඩිවෙමින් පවතින බවයි දෙමළ ජාතික ජනතා පෙරමුණේ ලේකම් පාර්ලිමේන්තු මන්ත්‍රී සෙල්වරාසා ගජේන්ද්‍රන් පවසන්නේ.
“මේ සිද්ධිය ප්‍රදේශයේ ජනතාව තුළ විතරක් නෙමෙයි සමස්ත දෙමළ ජනතාව තුළම භීතියක් ඇති කරල තියෙනවා. මේකත් සමූහ මිනීවළක් හරි, බලහත්කාරයෙන් අතුරුදහන් කරනු ලැබූ අය වළලපු තැනක් හරි වේවි කියල ඔවුන්ට බයක් තියෙනවා” යි මධ්‍යම කොක්කුතොඩුවායි ප්‍රදේශයේ නිරීක්ෂණ චාරිකාවක නිරත වීමෙන් අනතුරුව මන්ත්‍රීවරයා සදහන් කළේය.
ඔහු වැඩි දුරටත් කියා සිටියේ 1984 වසරේ සිට ඉතා දීර්ඝ කාලයක් මෙම ප්‍රදේශය හමුදා ග්‍රහණයට නතුව පැවති බවයි.
“මෙම ප්‍රදේශය 2009 දක්වාම තිබ්බේ හමුදා පාලනය යටතේ. 1984 ඉදං කෝකිලායි, කොක්කුතුඩුවායි, කරුණාට්කේනි හි ජනතාවට එම ප්‍රදේශ වලින් ඉවත් වෙන්න කියල ගුවන් යානාවලින් හමුදාව පත්‍රිකා දාල තියෙනවා. ජනතාව මේ පැති වලින් ඉවත් කළාට පස්සෙ මේව තිබ්බේ හමුදා පාලනය යටතේ”
සෙල්වරාසා ගජේන්ද්‍රන් මන්ත්‍රීවරයා තව දුරටත් කියා සිටින්නේ එම ප්‍රදේශයේ විශාල හමුදා කඳවුරක් පැවැති බව ප්‍රදේශවාසීන් සදහන් කරන බවයි.
මෙසේ වළලා ඇත්තේ බලහත්කාරයෙන් අතුරුදහන් කිරීමට ගොදුරු වූ දෙමළ ජාතිකයන් හෝ පණපිටින් අල්ලාගෙන පසුව මරා දැමු එල්.ටී.ටී.ඊ සාමාජිකයන් විය හැකි බවට ජනතාව බියෙන් පසුවන බව පවසන මන්ත්‍රීවරයා ඉල්ලා සිටින්නේ මේ සම්බන්ධයෙන් ජාත්‍යන්තර අධීක්ෂණය යටතේ සම්පූර්ණ කැනීමක් සිදු කරන ලෙසයි.
“ශ්‍රී ලංකා රජය මෙම කැනීම් මෙහෙයුම් වසන් කරන්න ඉඩ තියෙනවා. ජාත්‍යන්තර ප්‍රජාව මේ ගැන ඔවුන්ගේ අවධානය යොමු කරන්න ඕනෙ. සත්‍යය හෙළිදරව් කරගන්න තියෙන එකම ක්‍රමය ජාත්‍යන්තර අධීක්ෂණය යටතේ මෙම කැනීම් සිදු කිරීම කියලයි මට හිතෙන්නේ.”
සිරුරු කොටස් හමුවූ දියේම එම ස්ථානය දැක බලා ගත් උතුරු පළාත් සභාවේ හිටපු මන්ත්‍රීවරයෙකු වන තුරෙයිරාසා රවිහරන් ද සැක පළ කර තිබුනේ එම සිරුරු කොටස් හිටපු එල්.ටී.ටී.ඊ සාමාජිකයන්ගේ විය හැකි බවටයි.
දිවයින පුරා සොයාගත් සමූහ මිනී වළවල් 20ක විමර්ශන වලට බාධා කිරීමට ශ්‍රී ලංකා රජය සහ එහි ආරක්ෂක අංශ හවුල් වූ ආකාරය පිළිබඳව මානව හිමිකම් සංවිධාන හතරක් දින කිහිපයකට පෙර කොළඹ දී වාර්තාවක් නිකුත් කළේය.
ජාත්‍යන්තර නිරීක්ෂණ යටතේ සංරක්ෂණය, නිරීක්ෂණය, DNA විශ්ලේෂණය සහ නිසි ලේඛණගත කිරීම් ඇතුළු අනාගත කැනීම් සම්බන්ධයෙන් අනුගමනය කළ යුතු නිර්දේශ කිහිපයක්ම ඔවුන් සිය වාර්තාව මඟින් ඉදිරිපත් කර තිබුණි.
Facebook Comments
