දරා ගත නොහැකි ජිවන වියදම හමුවේ රට අත්හැර ඉන්දියාව වෙත පළා නොයන ලෙසට උතුරේ දේශපාලන නායිකාවක් දෙමළ ජනයාගෙන් ඉල්ලීමක් කර තිබේ.
“අනාථයන් විදිහට ඉන්දියාවට යනවාට වඩා අපේ රටේ බඩගින්නේ මැරෙන එක හොඳයි. අවුරුදු ගානක් යුද්ධයෙන් පීඩාවට පත් අපිට ආහාර හිඟය, බඩු මිල වැඩිවීම අලුත් දේවල් නොවෙයි. යුද්ද කාලේ කිසිම දෙයක් නැතුව අපි ජීවත්වෙලා තියෙනවා“යැයි උතුරු පළාත් සභාවේ හිටපු ඇමතිනී ආනන්දී ශෂිදරන් පවසන්නීය.
ආර්ථික අර්බුදය හේතුවෙන් උතුරේ දෙමළ ජනයා ඉන්දියාවට පළා යෑම ගැන මාධ්‍ය කළ විමසුමක දී ඇය කියා සිටියේ දෙමළ ජනයා බහුතරය වෙසෙන තමිල්නාඩුවට ගියත් එහි කිසිදු පිළිගැනීමක් නොමැති බවයි.
“අවුරුදු ගානක් අනාථ මඩම් වල ජිවත් වෙන්න වෙන්නේ. මෙහෙම එන අයව ඉන්දියාවේ පොලීසිය අත්අඩංගුවට අරගෙන විශේෂ කඳවුරු වලට දාලා නඩු අවසන් වෙන කම් හිර කරගෙන ඉන්නවා.“
ආර්ථික අමාරුකම් නිසා මන්නාරමේ සහ යාපනේ පසුගිය සති දෙක තුල පවුල් කිහිපයක් ඉන්දියාවට පිටත්ව ගොස් ඇති අතර දැනට ඔවුන් මණ්ඩපම් හි පිහිටි ලංකා අනාථයන් සඳහා වූ කඳවුරේ රඳවා ගෙන සිටී.
ඉන්දීය බලධාරීන් උපුටා දක්වමින් මාධ්‍ය වාර්තා කර ඇත්තේ ඉදිරි කාලය තුල ලංකාවේ සිට පැමිණෙන ගනන දෙදහසක් හා හාරදහසක් අතර විය හැකි බවයි.
යුද්ධය පැවති කාලයේ මෙසේ ඉන්දියාවට පළා ගොස් සිටින ලක්‍ෂයකට වැඩි ලංකා දෙමළ ජනයාට අනෙකුත් රටවලට ගිය ජනයාට මෙන් හඬක් නැගීමේ කිසිදු අවස්ථාවක් නොමැති බව ආනන්දී ශෂිදරන් පෙන්වා දෙන්නීය.
“දීර්ඝ කාලයක් ඉන්දියාවේ ජීවත්වෙන ලංකා දෙමළ ජනයාට අධ්‍යාපනය හා වෘත්තීය පුහුණු අවස්ථා ලබා දී තියෙනවා. එහෙත් කෙතරම් උසස් අධ්‍යාපනයක් ලැබුවත් අනාථයන් ලෙස රජයේ රැකියා ලබා ගන්න බැහැ. එහෙම ලබා ගන්න බැරි විදිහට තමයි අණ පනත් සකස් කරලා තියෙන්නේ.“
“මර්දනය හා බිය ගැන්වීම් වලට ලක්වෙලා ජිවත් වෙන්න කොච්චර දුෂ්කර වුනත්, ආර්ථික හේතු කියාගෙන තව දුරටත් ඉන්දියාවට යන එක සුදුසු නැහැ.“
Facebook Comments
