ශ්‍රී ලංකාවේ ඉහළම නැව්පතියාට එරෙහිව අධි චෝදනා ගොනු කර ඇති නඩු විභාගයක් ඉදිරියට පවත්වාගෙන යෑම වළකාලමින් ජනාධිපති පරීක්‍ෂණ කොමිෂන් සභාව නියෝගයක් නිකුත් කර තිබේ.
හිටපු නාවික හමුදාපති, අද්මිරාල් ඔෆ් ද ෆ්ලීට් වසන්ත කරන්නාගොඩ සහ හිටපු නාවික හමුදා මාධ්‍ය ප්‍රකාශක රියර් අද්මිරාල් ඩී.කේ.පී. දසනායක ඇතුළුව 14 දෙනෙකුට විරුද්ධව කෙළඹ ඇතුළු තදාසන්න ප්‍රදේශ වලින් 11 දෙනෙකු පැහැරගෙන ගොස් අතුරුදහන් කිරීමට අදාළව ගොනු කර ඇති නඩු විභාගය ඉදිරියට නොපත්වන ලෙසයි මෙසේ නීතිපතිවරයාට නියෝග කර ඇත්තේ.
හිටපු නාවික හමුදාපතිවරයාට හා හිටපු නාවික හමුදා මාධ්‍ය ප්‍රකාශකට එරෙහිව ත්‍රිපුද්ගල මහාධිකරණ විනිසුරු මඩුල්ල හමුවේ දේශපාලන බලපෑම් මත නඩු පවරා ඇතැයි කියන සිද්ධිය සම්බන්ධයෙන් ජනාධිපති කොමිසමේ දැඩි අවධානය යොමුවීම හේතුවෙන් මෙම නියෝගය නිකුත් කළ බවයි නිවේදනයක් නිකුත් කරමින් එම කොමිසම පවසන්නේ.
2015 ජනවාරී 08 වැනිදාත් 2019 නොවැම්බර් 16 වැනිදාත් අතර කාලය තුළ සිදුවී ඇතැයි කියන දේශපාලන පළිගැනීම් පිළිබඳව පරීක්‍ෂා කොට කොට තොරතුරු ලබාගැනීම සඳහා පත් කළ මෙම ජනාධිපති පරීක්‍ෂණ කොමිසම විසින් ත්‍රිපුද්ගල මහාධිකරණය වෙත මෙසේ නියෝග නිකුත් කර තිබේ.
විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න (සභාපති) විශ්‍රාමික අභියාචනාධිකරණ විනිසුරු චන්ද්‍රා ජයතිලක හා විශ්‍රාමික පොලිස්පති චන්ද්‍රා ප්‍රනාන්දු යන අයවලුන් මෙම කොමිසමේ සමාජිකයින් ලෙස කටයුතු කරනු ලබයි.
හිටපු නාවික හමුදාපති, අද්මිරාල් ඔෆ් ද ෆ්ලීට් වසන්ත කරන්නාගොඩ සහ හිටපු නාවික හමුදා මාධ්‍ය ප්‍රකාශක රියර් අද්මිරාල් ඩී.කේ.පී. දසනායක විසින් තමන් දේශපාලන පළිගැනීමට ලක්ව ඇති බවට කොමිසම හමුවේ පැමිණිළි කරෙ ඇති අතර
කොමිසන් සභාන විසින් අදාළ පැමිණිල්ල විභාග කර නියෝගයක් හෝ නිර්දේශයක් ලබා දෙන තෙක් අදාළ නඩුව මහාධිකරණයේ පවාත්වාගෙන යාමට නීතිපතිවරයා හෝ ඔහුගේ බලතල සහිත කිසිඳු නිලධාරියෙකු විසින් සිදු නොකළ යුතු බවට කොමිසන් සභාව ඒකමතිකව තීන්දු කළ බවයි වැඩි දුරත් නිවේදනය කරන්නේ.
අතුරුදහන් සැමදෙනා මියගොස් ඇති බව ජනාධිපති ගෝඨාභය රාජපක්ෂ ප්‍රකාශ කර දින කීපයක් ගතවෙද්දි මෙම නියෝගය නිකුත් කර තිබේ.
හිටපු නාවික හමුදාපති අද්මිරාල් ඔෆ් ද ෆ්ලීට් වසන්ත කරන්නාගොඩට අමතරව හිටපු නාවික හමුදා මාධ්‍ය ප්‍රකාශක ඩී. කේ. පී. දසනායක, නිලන්ත සම්පත් මුණසිංහ ඇතුළු නාවික හමුදා නිලධාරීන් 14 දෙනෙකුට එරෙහිව අපරාධ චෝදනා 667ක් යටතේ මහාධිකරණය හමුවේ නඩු පවරා ඇත.
2008 අගෝස්තු 08 වැනිදාත් 2009 සැප්තැම්බර් මස 21 වැනිදාත් අතර කාලය තුළදී කොටහේන, වැල්ලවත්ත, තී‍්‍රකුණාමලය, මඩකලපුව ඇතුලූ ස්ථාන කිහිපයකදී කස්තුරි ආර්ච්චිගේ ජෝන් රීඩ්, රජීව් නාගනාදන්, ප‍්‍රදීප් විශ්වනාදන්, තිලගේෂ්වරන් රාමලිංගම්, මොහොමඞ් සාජිත්, ජමාල්ඞීන් ඩිලාන්, අමනන් ලියෝන්, රොෂාන් ලියෝන්, ඇන්තනි කස්තුරුආරච්චි, ත්‍යාගරාජා ජෙගන් සහ මොහොමඞ් අලි අන්වර් මරා දැමීමට කුමන්ත‍්‍රණය කිරීම, ඒ අනුව ඔවුන් පැහැරගෙන යෑම, අයුතු ලෙස සිරකර තැබීම, ඔවුන්ගේ දේපළ බලහත්කාරයෙන් ලබා ගැනීම, මෙම තරුණයින් අතුරුදන් කිරීමට අදාළ සාක්කි වසන් කිරීම ඇතුළු චෝදනා 667ක් සම්බන්ධයෙන් ඔවුන්ට එරෙහිව අධි චෝදනා ගොනු කර තිබේ.
Facebook Comments
